Lain Bilong Is i Bungim Lain Bilong Wes
‘LAIN bilong Is i no inap bung wantaim lain bilong Wes.’ Em tok bilong Rudyard Kipling bilong Briten, em man bilong raitim stori. Tok bilong em i kirapim yumi long tingim ol lain man i gat ol narapela narapela pasin na sindaun ol i kisim long ol tumbuna, na dispela i mekim na ol i bruk bruk, na narapela lain i birua long narapela lain, olsem nau i kamap long olgeta hap. Olsem na planti man i askim olsem: ‘God inap pinisim dispela pasin o nogat?’ Em inap! Na nau em i wok long mekim! Narapela hap tok bilong Kipling i kamapim dispela samting. Lain bilong Is na Wes bai bruk i go inap long wanem taim? Kipling i tok, ‘Inap long taim Graun na Skai i sanap long Kot bilong God.’
Wok bilong skelim ol man long kot, God i givim long Pikinini bilong em Krais Jisas. (Jon 5:22-24, 30) Tasol dispela taim bilong kot bai kamap long wanem taim? Husat bai kot, na wanem samting bai kamap long dispela? Ol bikpela pait bilong olgeta hap na ol bikpela hevi i painim ol man kirap long yia 1914, em Jisas yet i bin tok profet long en. Em i tok, ol dispela samting i olsem “mak” bilong yumi ken save, Jisas i stap pinis olsem king na yumi stap long taim bilong las de.—Matyu 24:3-8.
Long pinis bilong dispela bikpela tok profet, Jisas i kamapim klia olsem taim bilong yumi em i taim bilong kot. Em i tok long em yet olsem: “Taim Pikinini Bilong Man i kam bek olsem king wantaim olgeta ensel, orait em bai i sindaun long sia king bilong en. Na olgeta lain manmeri bai ol i kam bung long pes bilong em. Na em bai i tilim ol na putim ol long tupela lain, olsem wasman i save tilim ol sipsip i go long hap na ol meme i go long hap. Em bai i putim ol sipsip long han sut bilong en, na ol meme long han kais.” Long tok piksa i olsem olgeta lain bilong graun nau ol i bung long ai bilong Jas na ol i kot long samting ol i mekim taim ol i harim pinis gutnius—ol i kisim dispela tok o ol i sakim. Orait klostu nau, long taim bilong ‘bikpela hevi tru,’ bai Jas i kamapim ol samting bilong dispela kot, na ol man i bikhet long em na ol i olsem meme, “bai i go bilong kisim pe nogut, . . . tasol ol stretpela manmeri [ol i bihainim tok na ol i olsem sipsip] bai i kisim laip i stap oltaim oltaim.”—Matyu 25:31-33, 46; KTH 16:14-16.
‘Long Hap Sankamap na Long Hap San i Go Daun’
Kot bilong ol manmeri bilong dispela graun i bin kirap long taim bilong Namba Wan Pait. Long dispela taim ol pris pasto bilong ol misin ol i kolim Kristen ol i givim bel long helpim ol lain i insait long pait. Dispela i kamapim long ples klia olsem ol i bilong dispela graun na ol bai kisim “belhat bilong God.” (Jon 3:36) Tasol olsem wanem long ol Kristen em ol i laikim pasin bilong i stap isi na ol i bilip tru long God? Kirap long yia 1919 wok i kirap bilong bungim ol i kam long han sut bilong King Krais Jisas.
Ol i kam long olgeta hap—pastaim i gat wok bilong bungim laspela hap bilong lain 144,000 God i bin makim ol bilong i stap king wantaim Krais long Kingdom bilong heven. (Rom 8:17) Profet bilong God i bin tok long ol olsem: “Mi stap wantaim yupela, olsem na yupela i no ken pret. Ol lain bilong yupela i stap long hap sankamap na long hap san i go daun, bai mi bringim ol i kam bek. . . . Maski ol manmeri bilong mi i stap longwe tru long arere tru bilong graun, bai mi bringim ol i kam bek. Yupela i lain manmeri bilong mi stret, na . . . ol arapela lain i ken lukim yupela na givim biknem long mi.”—Aisaia 43:5-7.
Na kirap long 1935 samting, wok i kirap bilong bungim wanpela bikpela lain tru, nau ol inap olsem sampela milion. Em dispela ol “sipsip” Jisas i bin toktok long en long Matyu 25:31-46. Dispela lain i wankain olsem lain remnan God i bin makim ol—ol tu i bilip long dispela Man i tok: “Yupela i witnes bilong mi.” (Aisaia 43:10-12) Na wok bilong bungim dispela bikpela lain tu i wok long kamap, em ol “i stap long hap sankamap na long hap san i go daun, . . . long arere tru bilong graun.”
Ol dispela lain bilong i stap isi olsem sipsip ol i olsem wanpela bikpela lain brata i stap long olgeta hap. Ol i gat kain kain tok ples bilong dispela 231 kantri ol i sindaun long en, tasol ol i stap wanbel long lainim ‘gutpela tok ples,’ em gutpela tok bilong Kingdom i stap long Baibel. Olsem bai ol inap “singaut long nem bilong Jehova na wok gut wantaim long mekim wok bilong em.” (Sefanaia 3:9, NW) Ol i stap wanbel long bilip na laik na wok, na dispela i kamapim klia long ol man olsem lain bilong Is i bungim pinis lain bilong Wes na ol lain i stap long ol narapela hap bilong graun, bambai ol i ken mekim wok bilong Bikpela King Jehova na litimapim nem bilong em.
Orait nau bai yumi kamapim ripot bilong sampela kantri long dispela wok bilong bungim ol sipsip, na bai yumi kirap nogut long en.