Ripot Long Wok Bilong Kingdom
Bai Ol i Mekim Nogut Long Ol Kristen Tru
KIRAP long taim bilong Abel, planti wokman bilong Jehova i kisim nogut long han bilong ol man i birua long lotu bilong ol. (Luk 11:49-51) Yumi no kirap nogut long dispela, long wanem, Baibel i tokaut pinis olsem “olgeta man i laik pas wantaim Krais Jisas na i bihainim pasin bilong God, ol man bai i mekim nogut long ol.” (2 Timoti 3:12) Olsem na nau long planti kantri, winim 25, ol i tambuim wok bilong ol Witnes Bilong Jehova na mekim nogut long ol.
Long wanpela kantri ol i tambuim wok bilong ol Witnes Bilong Jehova na ol man bilong lotu i mekim nogut long ol, i gat olsem 12,000 pablisa i wok yet long autim gutnius na ol i save stadi long Baibel wantaim 15,000 manmeri. Ol i mekim wok bilong ol long savepasin. Ol i save mekim planti miting bilong ol long haus bilong ol man yet, na ol i save tingting gut taim ol i singautim ol man i laik harim tok long kam long miting.
Nau gavman i isi liklik long ol Witnes, na ol inap mekim planti wok bilong ol na ol man i no mekim nogut long ol planti taim. Tasol sampela lain bilong lotu i bin kirapim ol man long birua long ol Witnes.
Long wanpela taun, inap olsem 200 man bilong lotu i belhat na ol i mats i go long wanpela haus em 50 Witnes Bilong Jehova i mekim miting bilong kongrigesen long en. Sampela bilong dispela lain ol i karim ol bikpela ston na ol i singaut na kolim sampela tok bilong lotu. Ol i gat tingting long pait long ol Witnes na bagarapim haus. Ol Witnes i ting, inap longtaim pinis ol hetman bilong lotu i bin lukim ol i mekim ol miting long haus, na ol i wetim taim stret bilong kam pait long ol. Dispela lain i redi long go insait long haus na nau 15 plisman ol i kam na rausim ol. Ol Witnes i kirap nogut long dispela samting, long wanem, ol i no bin toksave long ol polis—ol i no gat taim long mekim.
Tasol sampela taim ol man i kamapim tru ol samting nogut ol i laik mekim. Sampela Witnes ol i kot na kisim taim long kalabus. Wanpela i wetim kot inap sampela yia, na ating lain bilong harim kot ol i les na i no mekim wanpela samting. Tasol ol bikman bilong lotu long dispela hap i strong long ol i mas kirapim gen kot, na Witnes i kalabus.
Long narapela hap ol Witnes i bung long haus bilong wanpela man bilong mekim bung bilong tingim dai bilong Jisas. Bihain liklik sampela plisman i kam holim man bilong haus wantaim elda i bin bosim miting. Ol i kisim tupela i go long polis-tesin na paitim ol nogut tru. Inap sampela aua ol i mekim nogut long ol na sutim ol askim long ol. Ol i mekim nogut tru long wanpela Witnes—ol i putim em i go daun insait long wanpela hul bilong wara i kol tru.
Tasol i gat wanem as na ol polis i mekim olsem long ol? Ol pris samting bilong lotu wantaim lain bilong ol, ol i bin kirapim ol polis long mekim. Bihain nambawan bilong ol polis i tokaut olsem em i no bin givim tok orait long ol polis long holim ol Witnes. Em i tok sori long ol na i givim strafe long ol dispela polis i bin paitim ol.
Long olgeta hap bilong graun ol Witnes Bilong Jehova i wok yet long autim gutnius bilong Kingdom bilong God, maski ol man i mekim nogut tru long ol. Ol i bihainim tok bilong Jisas, em i tok: “Harim. Mi salim yupela i go olsem ol sipsip i go namel long ol weldok. Olsem na yupela i mas bihainim pasin bilong ol snek, na tingim gut pastaim ol samting yupela i laik mekim. Na yupela i mas bihainim pasin bilong ol dispela pisin ol i kolim balus, na yupela i no ken tingting long mekim wanpela pasin nogut.”—Matyu 10:16.
[Piksa long pes 31]
Abel em i namba wan bilipman ol i bin mekim nogut long em