Mi Wok Long Painim Paradais
Em Stori Bilong Pascal Stisi
Em biknait long taun Besye long hap saut bilong Frans, na i no gat man i wokabaut long rot. Mi wantaim pren bilong mi i kamap long wanpela stua i gat ol buk bilong lotu long en, na long banis bilong stua, nau tasol ol i penim, mipela i wokim wanpela rait long ol bikpela blakpela leta. Dispela rait i kamapim tingting bilong Nietzsche, em wanpela man bilong Jemani ol i kolim olsem saveman. Dispela rait i tok: ‘Ol god i dai pinis. Supaman tasol i rot!’ Wanem samting i bin kirapim mi long mekim kain samting olsem?
MAMA i karim mi long Frans long 1951. Mi kamap bikpela insait long wanpela famili Katolik, em tumbuna bilong ol i bilong Itali. Taim mi liklik yet, mipela save go malolo long hap saut bilong Itali. Long dispela hap, olgeta wan wan ples i gat imis bilong Virgo Maria i stap long en. Mi save wokabaut wantaim bubu man bilong mi long ol mats bilong lotu long ples maunten na bihainim ol dispela bikpela imis ol i bin pasim klos long ol—tasol mi no bilip liklik. Mi pinisim skul bilong mi long wanpela skul bilong lotu ol Jesuit i bosim. Tasol mi no tingim wanpela tok i bin kirapim mi long bilip long God.
Taim mi putim nem bilong mi long yunivesiti long Monpelye bilong stadi long kamap dokta, mi wok long tingim, i gat wanem as na yumi stap. Papa bilong mi i bin kisim bagarap long pait na em i stap long bet, na olgeta taim ol dokta i save kam lukim em. Bikpela hap taim na strong i lus long oraitim ol man i bin kisim bagarap long pait, olsem na mi ting mobeta ol i pinisim olgeta pait. Tasol Pait Bilong Vietnam i stap yet. Tingting bilong mi i olsem: Bilong pinisim wanpela hevi, ol i mas pinisim samting i kamapim dispela hevi. Olsem: Bilong pinisim sik kensa long wetlewa, i gat wanpela rot tasol bilong pinisim—ol i mas pinisim nambawan bikpela samting i kamapim dispela sik, em tabak. Na olsem wanem long ol sik i painim ol man i sot long kaikai long ol kantri i stap rabis liklik, na ol sik i painim ol man i kaikai planti tumas long ol kantri i gat gutpela sindaun? Mi ting mobeta ol i stretim samting i kamapim ol dispela sik; nogut ol i wok long stretim ol sik tasol, a? Na mi laik save, i gat wanem as na planti hevi i stap long graun? Mi ting ol samting i no stret liklik—ol man i save mekim ol samting ol inap kisim bagarap long en, na mi ting ol gavman i gat asua.
Mi laikim tru wanpela buk em wanpela man i save sakim ol lo i bin raitim, na mi save kisim sampela tok bilong en na raitim long ol banis. Isi isi mi tu i kamap wanpela man i sakim ol lo—mi no bilip long wanpela samting na mi no bihainim ol lo i bosim pasin na wokabaut bilong ol man—mi no laik bai wanpela God o man i bosim mi. Mi ting God na lotu em samting ol maniman na ol bikman i bin kamapim bambai ol inap bosim na pulim ol samting bilong mipela ol narapela. I olsem ol i tok: ‘Wok strong long mekim wok bilong mipela hia long graun, na long paradais long heven bai yu kisim gutpela pe.’ Tasol dispela taim bilong ol god i bosim ol man em i pinis. Ol man i mas save long dispela samting. Ol tok mi raitim long ol banis em i wanpela rot bilong toksave long ol.
Dispela i mekim, na stadi mi mekim bilong kamap dokta em i kamap olsem nambatu samting long mi. Long dispela taim, mi putim nem bilong mi long go long narapela yunivesiti long Monpelye bilong lain long ol samting bilong graun na wara na win. Long dispela yunivesiti ol sumatin i save mekim bikhetpasin long ol lain i gat wok long bosim ol. Taim mi kisim planti save long ol samting bilong graun i wok gut wantaim olsem wanem, mi bel hevi taim mi lukim ol man i bagarapim gutpela graun bilong yumi.
Long olgeta yia, taim mi gat malolo long skul, mi save pasim ol ka bambai ol i ken kisim mi na long dispela pasin mi save raun inap planti tausen kilomita long Yurop. Taim mi raun na toktok wantaim planti handet draiva, mi yet mi lukim ol samting em pasin nogut na hevi i save mekim long planti man. Mi wok long painim paradais, na wanpela taim mi kamap long sampela gutpela nambis long naispela ailan Krit, tasol mi lukim wel i karamapim ol nambis. Mi bel hevi stret. Olsem wanem? I gat wanpela hap long graun i gat paradais i stap yet long en?
Mekim Wok Gaden
Long Frans, ol man i gat save long pasin bilong lukautim gut graun ol i laik bai ol man i kirap na wokim gaden olsem rot bilong stretim ol hevi. Mi laik mekim ol wok long han bilong mi. Olsem na mi baim wanpela olpela haus ol man i bin wokim long ston na i stap long wanpela liklik ples klostu long ples maunten Seven long hap saut bilong Frans. Long dua, mi raitim tok “Paradais Nau,” em wanpela tok ol hipi bilong Amerika i save mekim. Wanpela yangpela meri bilong Jemani i raun long hap bilong mipela em i kamap poroman bilong mi. Mitupela i sindaun nating—mi no laik tru long marit long pasin bilong gavman o long wanpela haus lotu!
Klostu olgeta taim, mipela i save wokabaut lek nating, na gras na mausgras bilong mi i longpela—mi no save komim. Mi amamas tru long planim kain kain prut na sayor samting. Long ol mun i olsem taim bilong san, skai i blupela na ol grasopa i singsing. Ol plaua i gat gutpela smel, na prut mipela i bin planim—grep na fik—ol i swit moa yet! I olsem mipela i stap long paradais.
Mi Kirap na Bilip Long God
Long yunivesiti mi bin stadi long skin bilong man, na mi bin kirap nogut long kisim save long ol liklik liklik hap bilong en i wok gut wantaim olsem wanem. Tasol nau long olgeta de mi inap lukim na tingim kain kain samting i gat laip, na mi pilim tru ol gutpela gutpela samting bilong en. Long olgeta de ol samting mi lukim i givim sampela save moa long mi. Wanpela taim mi wokabaut inap planti aua long ol liklik maunten na mi wok long tingim i stap bilong mi, na mi kisim save olsem i mas i gat wanpela Man i bin wokim ol samting. Orait nau mi pasim tok long bel olsem mi bilip long God. Pastaim mi bin pilim olsem mi stap wanpis, olsem mi sot long wanpela samting. Tasol long dispela taim stret mi kirap long bilip long God, mi tokim mi yet, ‘Pascal, bai yu no stap wanpis gen.’ Mi kisim bikpela amamas.
Bihain liklik, mi wantaim poroman i kamapim wanpela pikinini meri—Amandine. Mi laikim tru dispela liklik meri. Nau mi bilip pinis long God mi kirap long bihainim ol lo mi save pinis long en, em ol lo i makim stretpela pasin mi mas bihainim. Mi lusim pasin bilong stil na tok giaman, na bihain liklik mi save olsem dispela i bin helpim mi long abrusim planti hevi inap kamap namel long mi na ol narapela. Em nau, mipela i gat sampela hevi i bin kamap long mipela, na dispela paradais bilong mi i sot long sampela samting—em i no inapim mak bilong en. Ol lain bilong planin gaden wain ol i save mekim wok long marasin bilong kilim ol binatang na gras nogut na dispela marasin i save bagarapim ol diwai prut na sayor samting bilong mi. Na mi no save yet long bekim bilong dispela askim olsem i gat wanem as na pasin nogut i stap. Na tu, mi bin kaunim planti tok bilong helpim famili, tasol dispela i no bin mekim i dai ol kros i kamap namel long mi wantaim poroman. Mipela i no gat planti pren, na ol sampela i stap pren bilong mipela ol i no pren tru; sampela i bin wok long kirapim poroman bilong mi long pamuk. Mi ting i mas i gat wanpela paradais i winim dispela.
God i Harim Beten Bilong Mi
Planti taim mi beten askim God long stiaim wokabaut bilong mi. Long wanpela Sande long moningtaim, wanpela meri, nem bilong em Irène Lopez, wantaim liklik pikinini man bilong em, ol i kam long haus bilong mi. Em i mekim gutpela pasin long mi olsem pren. Em i wanpela Witnes Bilong Jehova. Mi putim yau long tok bilong em na mi orait long ol i kam gen. Tupela man i kam lukim mi. Long ol samting mipela i toktok long en, mi holim tupela samting long tingting—Paradais na Kingdom bilong God. Mi putim dispela tok long bel bilong mi na holim i stap, na insait long ol mun i kamap bihain, mi save olsem, bilong bel bilong mi i no gat tok na mi ken stap amamas tru, mi mas stretim pasin bilong mi na bai i stret wantaim mak God i laik bai yumi mas bihainim.
Bilong i stap bilong mipela i ken stret wantaim Tok Bilong God, pastaim poroman i orait long maritim mi. Tasol bihain em i raun wantaim ol poroman nogut i save tok bilas long God na long ol lo bilong em. Wanpela apinun mi kam bek long haus na mi kirap nogut tru. Meri pikinini i no stap. Em nau, poroman bilong mi i lusim mi pinis, na em i kisim liklik pikinini meri bilong mipela i gat 3-pela krismas i go wantaim em. Inap planti de mi wet wet long ol i kam bek, tasol nogat. Tasol mi no tok God i gat asua, nogat; mi beten askim em long helpim mi.
Bihain liklik, mi kisim Baibel na mi go sindaun long as bilong diwai fik mi bin planim na mi kirap long rit. Mi pilim tru ol tok bilong en. Mi bin kaunim kain kain buk bilong ol saveman, tasol i no gat gutpela tingting na save i stap long ol olsem i stap long Baibel. Mi pilim olsem God yet i bin givim tingting long ol man na ol i raitim. Ol tok bilong Jisas na pasin bilong em long save gut long pasin bilong man, dispela i mekim na mi kirap nogut. Buk Song i mekim gut bel bilong mi na mi kirap nogut long ol gutpela save i stap long Buk Sindaun. Kwiktaim mi kisim save olsem: Tru, pasin bilong lukim na tingim ol samting God i bin wokim, dispela em i gutpela rot bilong helpim man long go klostu long God, tasol dispela i no inap kamapim olgeta pasin bilong God—em inap kamapim “liklik hap tasol bilong bikpela strong bilong God.”—Jop 26:14.
Ol Witnes i givim mi ol buk olsem Tok i Tru i Bringim Man Long Laip Oltaim na Rot Bilong Kamapim Amamas Insait Long Famili.a Mi kaunim, na nau mi save long planti samting. Buk Tok i Tru i helpim mi long save long as na ol man i wok long bagarapim graun na wara na win, na i gat ol pait, na pasin nogut i wok long go bikpela, na pait nuklia inap kamap na bagarapim olgeta manmeri hia long graun. Na olsem retpela skai mi lukim, taim mi stap long gaden bilong mi, i makim olsem tumora bai i gutpela taim, ol dispela samting i kamap long nau i makim olsem Kingdom bilong God i kam klostu pinis. Na mi gat bikpela laik long soim buk Famili long poroman bilong mi na tokim em, mipela inap stap amamas sapos mipela i bihainim ol tok bilong Baibel. Tasol nau i no gat rot long mekim olsem.
Mi Wok Long Kamap Strong Long Ol Samting Bilong Spirit
Mi laik kisim sampela save moa, olsem na mi askim Robert, em wanpela Witnes, long kam lukim mi. Em i kirap nogut tru taim mi tokim em, mi laik kisim baptais, na em i kirapim stadi wantaim mi long Baibel. Kwiktaim mi kirap tokim ol narapela long ol samting mi wok long lainim, na mi kirap long tilim ol buk na nius mi bin kisim long Haus Kingdom.
Bilong kisim wok mani bilong lukautim mi, mi putim nem bilong mi long wanpela kos bilong lain long pasin bilong wokim ol samting long ston. Mi save ol tok bilong Baibel inap helpim gut ol man, olsem na taim rot i op, mi save autim tok long ol wansumatin na ol tisa. Wanpela apinun, mi bungim Serge long rot bilong wokabaut namel long ol klasrum. Em i holim sampela nius. Mi tokim em: “Yu amamas long kaunim nius, a?” Em i bekim tok: “Yes, tasol mi les long dispela kain nius.” Mi askim em: “Yu laik kisim sampela nius i gutpela tru long kaunim?” Mipela i stori gut long Kingdom bilong God, na em i kisim sampela buk i kamapim ol tok bilong Baibel. Long wik antap, em i kam wantaim mi long Haus Kingdom, na wanpela Witnes i kirapim Baibel-stadi wantaim em.
Wanpela taim mi tokim Robert mi laik go long ol haus na autim tok. Em i opim kabot bilong em na kisim saket na trasis na givim long mi. Long Sande long wik antap, mi go wantaim em long wok autim tok—em namba wan taim mi bin insait long dispela wok. Orait nau, long Mas 7, 1981, mi kisim baptais long ai bilong ol man bilong makim olsem mi dediket pinis long God Jehova.
Mi Kisim Helpim Taim Mi Bel Hevi
Long dispela taim mi kisim save long wanem hap stret Amandine wantaim mama bilong em—ol i bin go sindaun long narapela kantri—ol i stap long en. Sori tru, mama bilong em i tambuim mi long lukim pikinini meri bilong mi—lo bilong kantri ol i stap long en ol i orait long em i ken mekim olsem. Bel bilong mi i bagarap stret. Mama bilong Amandine i maritim wanpela man, na mi bel hevi stret taim mi kisim pas long gavman i tokaut olsem dispela man i bin adoptim pikinini meri bilong mi—mi no bin givim tok orait long ol long mekim dispela samting. I olsem mi no stap moa olsem papa bilong pikinini bilong mi. Mi go long kot, tasol kot i no orait long mi ken lukim pikinini bilong mi. Mi pilim olsem mi karim 50 kilogram long baksait bilong mi—mi karim bikpela hevi tru.
Tasol Tok bilong Jehova i helpim mi long kain kain rot. Wanpela taim mi bel hevi tru, olsem na mi wok long kolim ol tok bilong Sindaun 24:10: “Sapos taim nogut i painim yu na bun bilong yu i slek, orait yu no gat strong tru.” Dispela ves i helpim mi na mi no lusim strong olgeta. Narapela taim mi wok long traim long lukim pikinini bilong mi, tasol mi no inap, olsem na mi go autim tok na holim strong paus bilong mi i gat ol buk na Baibel long en. Long ol dispela kain taim, mi pilim pinis tok bilong Song 126:6 i stret tru. Em i tok: “Tru tumas, ol man i krai na karim pikinini kaikai i go bilong planim, bihain bai ol i singim song bilong amamas, na kisim ol kaikai i mau na i kam.” Wanpela bikpela samting mi lainim i olsem: Taim bikpela hevi i painim yu, wok strong long mekim olgeta samting bilong stretim dispela hevi. Mekim pinis, orait nau no ken tingim moa dispela hevi, na wok strong long mekim wok bilong Jehova. Em tasol i rot bilong helpim yu long i stap amamas.
Mi Wok Long Kisim Samting i Gutpela Moa
Papamama i lukim ol senis mi bin mekim, na ol i tok long helpim mi na bai mi inap mekim yet ol stadi bilong mi long yunivesiti. Mi tok tenkyu long tupela, tasol nau mi gat narapela samting mi laik mekim. Tok i tru i bin mekim mi i kamap fri long save bilong ol man bilong graun, na majik, na pasin bilong lukluk long ol sta bilong painim save. Nau mi gat ol pren tru—narapela i no ken kilim i dai narapela long pait. Na mi kisim pinis bekim bilong ol askim bilong mi, olsem i gat wanem as na planti hevi i stap long graun. Mi amamas tru long ol dispela samting, olsem na mi laik mekim wok bilong God long strong olgeta bilong mi. Taim Jisas i stap long graun em i givim bel tru long mekim wok bilong God, na mi laik bihainim dispela pasin bilong em.
Long 1983, mi lusim wok bisnis bilong mi long wokim ol samting long ston, na mi kisim wok bilong autim tok bilong God long olgeta de. Mi beten na mi painim wok haptaim long wanpela gaden bambai mi inap lukautim mi yet. Mi amamas tru long go long skul painia wantaim Serge, em dispela yangpela man mi bin autim tok long em, long skul bilong lain long wokim ol samting long ston! Mi mekim wok painia oltaim inap 3-pela yia, na nau mi pilim olsem mi laik mekim bikpela wok moa bilong Jehova. Olsem na long 1986, ol i makim mi long kamap painia salim long taun Provans, klostu long Paris. Planti taim, taim mi kam bek long haus long apinun, mi save brukim skru na beten na tok tenkyu long Jehova long gutpela de mi bin raun na tokim ol narapela long em. Tupela samting i givim bikpela amamas long mi i olsem: Pasin bilong toktok wantaim God na pasin bilong toktok wantaim ol narapela long God.
Narapela samting i givim bikpela amamas long mi, em mama bilong mi i gat 68 krismas i kisim baptais. Em i sindaun long Sebasan, em wanpela liklik ples long hap saut bilong Frans. Taim mama bilong mi i kirap long kaunim Baibel, mi salim sabskripsen bilong Wastaua na Kirap! long em. Em i gat pasin bilong wokim gut tingting, na kwiktaim em i pilim olsem dispela tok em i kaunim em i tru.
Betel—Em Wanpela Paradais Bilong Spirit
Taim Sosaiti Was Taua i tingting long katim namba bilong ol painia salim, mi wokim pepa bilong i go long Skul Bilong Lainim Wok Bilong Lukautim Kongrigesen, na bilong i go mekim wok long Betel, em brens-ofis bilong ol Witnes Bilong Jehova long Frans. Mi laik bai Jehova i makim wanem wok i gutpela long mi long mekim. Sampela mun bihain, long Disemba 1989, ol i singautim mi long go long Betel long Luvia, long hap not bilong Frans. Em gutpela, long wanem, long dispela rot mi inap helpim brata bilong mi wantaim tambu long lukautim papamama bilong mi taim bikpela sik i painim ol. Mi no inap mekim dispela samting sapos mi bin mekim wok misineri long wanpela hap i stap longwe inap olsem planti tausen kilomita.
Mama i kam lukim mi tripela taim samting long Betel. Maski i hatwok long em i no stap wantaim mi, planti taim em i tokim mi: “Pikinini, stap long Betel. Mi amamas yu mekim wok bilong Jehova long dispela rot.” Sori tru, papa na mama bilong mi i dai pinis. Mi wetim dispela taim na mi inap lukim ol gen hia long dispela graun i kamap Paradais tru!
Mi bilip tru olsem sapos i gat wanpela haus inap tru long dispela nem “Paradais Nau,” em Betel—em “Haus Bilong God”—long wanem, paradais tru em i samting bilong spirit, na ol samting bilong spirit em i namba wan samting long Betel. Rot i op long mipela ken wok long kisim ol pasin em spirit holi i save kamapim. (Galesia 5:22, 23) Mipela kisim ol gutpela kaikai bilong spirit long rot bilong toktok long wanpela skripsa bilong Baibel long olgeta de, na long famili-stadi bilong Wastaua, na dispela samting i helpim mi long stap strong na bai mi inap mekim wok long Betel. Na tu, mi inap bung wantaim planti brata na sista i save tingim ol samting bilong spirit na ol i bin stap gut long mekim wok bilong God inap planti yia. Dispela samting i mekim Betel em i wanpela ples bilong mi ken kamap strong long ol samting bilong spirit—no gat narapela ples i kain olsem. Tru, mi no bin lukim pikinini meri bilong mi inap 17 yia, tasol mi save long planti yangpela hia long Betel ol i givim bel long Jehova, na mi tingim ol i olsem pikinini bilong mi, na mi amamas long lukim ol i kamap strong long ol samting bilong spirit. Insait long 8-pela yia i go pinis, mi bin kisim 7-pela narapela narapela wok. Sampela taim mi bin hatwok liklik long mekim ol nupela wok, tasol bihain mi bin kisim planti gutpela samting long en.
Bipo mi bin planim wanpela kain bin i save kamapim planti bin, olsem wan handet. Na wankain olsem dispela, mi save olsem taim yumi planim samting i nogut, yumi save kisim samting i nogut tru. Pasin bilong kisim skul long rot bilong samting i save painim yumi na i no gat samting bilong stiaim yumi, long tok piksa, em i wankain olsem wanpela skul i pulim planti mani long yumi. I gutpela sapos mi no bin go long kain skul olsem; mobeta mi bin kamap bikpela long ol pasin Jehova i laik bai yumi bihainim. Ol yangpela em papamama Kristen i bin mekim bikpela long ol, ol i ken amamas tru! Tru tumas, sapos yumi planim gutpela samting, olsem mekim wok bilong Jehova, bai yumi kisim gutpela pe long en—bai yumi stap bel isi na belgut.—Galesia 6:7, 8.
Taim mi stap painia, sampela taim mi bin wokabaut klostu long dispela stua i gat ol buk bilong lotu long en, em long banis bilong en mi bin raitim wanpela tok. Mi bin go insait long dispela stua na toktok wantaim papa bilong en long dispela God i stap laip na long ol samting em i laik mekim. Tru tumas, God i stap! Na narapela samting i olsem: Jehova, em tasol em i God tru, em i gutpela Papa na em i no save lusim ol pikinini bilong em. (KTH 15:4) Mi laik bai planti manmeri moa long olgeta lain i ken kisim dispela paradais bilong spirit—na bihain, Paradais i kamap bek—long rot bilong litimapim nem bilong dispela God i stap laip, em Jehova, na long mekim wok bilong em!
[Futnot]
a Sosaiti Wastaua Bilong Nu Yok i wokim.
[Ol Piksa long pes 26]
Ol samting mi lukim i kirapim mi long bilip long God. (Han sut) Long Betel long nau