Yu Ting Yumi Mas i Gat Wanpela Mesaia?
ATING yu bai mekim dispela askim, “Yumi mas i gat wanpela Mesaia?” Na i stret yu tingting olsem wanpela Mesaia inap mekim sampela samting long yu o nogat.
Sampela man yu rispek long tok bilong ol, ol bai tok bekim bilong dispela askim i klia tru: Yu mas i gat wanpela Mesaia, na olgeta narapela man tu i mas i gat. Wanpela saveman bilong lo bilong ol Juda long taim bilong ol aposel i tok: “I gat planti promis bilong God i stap, na Krais i save tok ‘Yes’ long dispela olgeta promis.” Em nau, em i kamapim klia bikpela wok Mesaia i holim insait long samting God i tingting pinis long mekim, em i laik mekim gut long olgeta lain bilong graun. (2 Korin 1:20) Wok bilong Mesaia i bikpela samting tru, olsem na Baibel i mekim planti tok profet long i stap bilong em long graun. Long wanpela buk em planti milion manmeri i bin ritim insait long 70 yia i go pinis, Henry H. Halley i tok: “Ol i bin raitim Olpela Testamen bilong kirapim ol man long wetim na wokim rot bilong [Mesaia] i kam.” Tasol olsem wanem? Em i mas i kam? Bilong wanem yu mas tingim dispela?
Mining bilong tok “Mesaia” em “Man God i Makim,” na i wankain mining olsem nem “Krais,” em planti man i save long en. Dispela Man, em buk Encyclopædia Britannica, bilong 1970, i kolim olsem “nambawan man bilong kisim bek ol man,” em i mas i kam, long wanem, namba wan man na meri, Adam na Iv, i mekim pasin bikhet. God i bin wokim ol i nambawan olgeta, na ol inap wet long kisim laip i stap oltaim oltaim long Paradais, tasol ol i lus long kisim dispela samting. Wanpela ensel i bin bikhet na em i kisim nem Satan, em i tokim tupela olsem Man Bilong Wokim ol i pasim ol tumas, olsem na i gutpela moa sapos ol yet i skelim wanem samting i gutpela na wanem samting i nogut.—Stat 3:1-5.
Satan i giamanim Iv na em i bilipim dispela tok giaman. Ating Adam i tingting tumas long stap wantaim meri bilong em, winim pasin bilong stap gut long God, olsem na em tu i insait long pasin bikhet em Satan i kirapim. (Stat 3:6; 1 Timoti 2:14) Em nau, pasin bikhet bilong tupela i mekim na ol i lus long kisim laip oltaim long gutpela ples paradais, na tu, ol i givim sin na indai long ol pikinini em tupela i no kamapim yet.—Rom 5:12.
Man Bilong Wokim yumi, Jehova, kwiktaim em i tingim rot bilong stretim ol samting nogut dispela pasin bikhet i bin kamapim. Em bai helpim ol man long kamap wanbel gen wantaim em long rot bilong samting bai kamap bihain olsem wanpela stiatok long Lo Bilong Moses—ol i mas bekim wankain samting stret i lus o i bagarap. (Lo 19:21; 1 Jon 3:8) Ol i mas inapim dispela stiatok bilong Lo bambai ol tarangu pikinini bilong Adam na Iv i gat rot long kisim laip i stap oltaim oltaim long graun i kamap ples paradais, olsem Man Bilong Wokim ol i tingting pinis long givim long ol. Em nau, yumi tingim wok bilong Mesaia.
Taim God Jehova i makim strafe Satan bai kisim, Em i tokaut long namba wan tok profet bilong Baibel olsem: “Bai mi mekim yu i stap birua bilong meri, na meri i stap birua bilong yu. Na bai mi mekim ol lain bilong yu i birua long lain [“pikinini,” NW] bilong meri. Bai [em] i krungutim het bilong yu, na bai yu kaikaim lek bilong [em].” (Stat 3:15) Wanpela saveman bilong Baibel i tok: “[Dispela] tok i kirapim stori bilong ol tok promis bilong Mesaia i stap long Baibel.” Narapela saveman i tok, long rot bilong Mesaia, God “bai stretim bek olgeta bikpela hevi i bin kamap long sin bilong namba wan man na meri,” na dispela bai givim planti blesing long ol man.—Hibru 2:14, 15.
Tasol ating yu pilim olsem long nau ol man i no kisim ol gutpela blesing. Planti hevi nogut tru i wok long painim ol man na i luk olsem i no gat rot bilong stretim ol hevi. Olsem na buk The World Book Encyclopedia i tok “planti Juda i wet yet long wanpela Mesaia bai kam” na em “bai stretim ol rong na daunim ol birua bilong ol man.” Tasol Baibel i tok Mesaia i kam pinis. Yu ting i gat as na yumi ken bilipim dispela tok bilong Baibel? Stori i kamap bihain long dispela bai bekim dispela askim.