Wok Wantaim Kongrigesen Bilong Narapela Tok Ples
APOSEL Jon i tok: “Mi lukim narapela ensel i flai i go namel long skai. Em i gat gutnius bilong i stap oltaim oltaim, na em i gat wok bilong autim dispela gutnius long ol manmeri i stap long graun. Em i autim long ol manmeri bilong olgeta lain man na bilong olgeta kantri na bilong olgeta tok ples na bilong olgeta kain skin.” (KTH 14:6) Bilong truim tok bilong dispela driman, ol Witnes Bilong Jehova i autim gutnius bilong Kingdom Bilong God long kain kain tok ples long olgeta hap bilong graun. Planti bilong ol dispela tok ples em i bilong ol man i lusim as ples bilong ol na kam sindaun long ol narapela kantri. Ol dispela man tu i harim gutnius bilong Kingdom long rot bilong ol strongpela Witnes Bilong Jehova em ol i bin lainim narapela tok ples.
Olsem wanem? Yu wanpela bilong ol Witnes i save wok wantaim wanpela kongrigesen bilong narapela tok ples? O ating yu tingting long mekim olsem? Bilong dispela wok yu laik mekim i ken kamap gut, yu mas i gat laik long helpim ol narapela na stretpela tingting long samting yu laik mekim. Bikpela tingting bilong yu em long helpim ol narapela long lainim tok i tru bilong Baibel, olsem na i gat gutpela as bilong dispela tingting—yu laikim God na ol narapela man. (Matyu 22:37-39; 1 Korin 13:1) Laik bilong yu long helpim ol narapela man long kisim save long God i strong moa winim pasin bilong kisim amamas, kaikai, na bung wantaim ol man bilong ol narapela kantri o lain. Olsem wanem? Yu pilim olsem em hatwok tru long lainim narapela tok ples? Sapos olsem, stretpela tingting long as na yu laik lainim dispela tok ples bai helpim yu. James i bin lainim tok Japan, em i tok: “No ken larim tok ples i mekim na yu givap.” Tingim olsem planti ol narapela paslain long yu i bin lainim narapela tok ples, dispela bai helpim yu long wok strong na holim stretpela tingting. Tasol olsem wanem yu inap lainim nupela tok ples? Wanem samting bai helpim yu long stap gut wantaim kongrigesen i mekim dispela tok ples? Na yu mas mekim wanem bilong i stap strong long samting bilong spirit?
Lainim Nupela Tok Ples
I gat planti rot bilong lainim nupela tok ples. Ol sumatin na tisa i gat narapela narapela pasin bilong lain na givim skul. Tasol samting i save helpim klostu olgeta sumatin long lain kwik na i no hatwok tumas long lain em sapos ol i go long sampela klas we wanpela tisa i gat gutpela save i ken skulim ol liklik. Ritim Baibel, ol buk na nius bilong Baibel long dispela nupela tok ples, na harim ol kaset long dispela tok ples sapos i gat, dispela bai helpim yu long lainim sampela tok moa, na bai yu save long planti ol tok ol i save kolim insait long kongrigesen. Ol program long redio na televisen i gat ol gutpela tok i stret long harim o lukim, em tu inap helpim yu long save gut long tok ples na pasin bilong ol man bilong dispela tok ples. Pasin bilong stadi na lain long tok ples inap sotpela taim long olgeta de i winim pasin bilong stadi longpela taim tru long wan wan taim tasol.
Pasin bilong lainim tok ples i kain olsem yu lain long swim. Yu no inap lain long swim gut sapos yu ritim long buk tasol. Yu mas go insait long wara na traim traim. Em wankain tasol long lainim wanpela tok ples. I hatwok long mekim tok ples sapos yu ritim tasol long buk. Yu mas bung wantaim ol man sapos yu inap mekim olsem—putim yau long toktok bilong ol, stap namel long ol, na toktok wantaim ol! Ol wok Kristen i gutpela rot bilong mekim olsem. Taim yu autim tok, planti taim yu inap mekim wok wantu long ol tok yu lainim pinis. Midori i wok long lainim tok Saina, em i tok: “Ating bai yu pret liklik, tasol man bilong haus inap lukim olsem yumi ol Witnes i taitim bun tru long lainim tok ples. Dispela inap kirapim bel bilong ol long putim yau. Yumi ken mekim liklik tok tasol long tok ples bilong ol olsem ‘Mi amamas long bungim yu,’ mekim long tok ples bilong ol, na pes bilong ol bai lait!”
Ol miting Kristen tu inap helpim yumi. Long olgeta miting, traim long bekim tok wanpela taim. Ating pastaim bai yu pret, tasol no ken wari. Ol bratasista long kongrigesen i laik bai yu save gut long tok ples! Monifa i wok long lainim tok Korea, em i tok: “Mi amamas long sista i sindaun klostu long mi long taim bilong ol miting, em i raitim mining bilong sampela tok bilong helpim mi. Gutpela pasin em i mekim long i no les kwik long mi i helpim mi tru.” Taim yu save pinis long planti tok, nau yu kisim tingting wankain olsem dispela lain—yu bungim ol tok i go wantaim ol samting dispela tok i makim na yu no tanim tasol ol wan wan tok long tingting.
Namba wan mak yu mas winim taim yu lainim nupela tok ples em, mekim tok i klia na man inap kisimgut. Ol man i no bisi long yu lainim tok ples, tasol ating ol popaia yu mekim o krai bilong nek bilong yu inap pulim tingting bilong ol na ol i no putim yau long tok yu autim. Taim yu kirap nupela long lainim wanpela tok ples, putim gut yau long pasin bilong kolim stret wan wan tok na lo bilong kolim tok, dispela bai helpim yu long abrusim pasin bilong kolim kranki ol tok, em pasin i hatwok long lusim. Mark i bin lainim tok Swahili, em i tok: “Tokim wanpela i save gut long tok ples long stretim yu taim yu popaia, na tok tenkyu long em taim em i mekim olsem!” Tasol yu mas tingim taim na strong bilong ol lain husat i helpim yu. Ating yu askim wanpela long sekim tok yu redim, tasol taim yu redim ol miting na ol bekim—traim long yusim ol tok yu save pinis long en o ol tok yu bin sekim gut mining bilong en. Long dispela rot yu inap lain kwik na yu no pret long mekim tok ples.
Wok Long Kamap Gut Moa
Monifa i tok: “Wok bilong lainim narapela tok ples em wanpela bikpela hatwok tru mi bin mekim. I gat sampela taim we mi laik givap tasol. Tasol mi tingim olsem Baibel sumatin bilong mi i laik harim ol strongpela tok hait bilong Baibel mi kamapim long rot bilong liklik tok Korea mi inap long mekim, na amamas ol brata i kamapim taim mi inap kolim sampela tok moa long tok ples.” Bikpela samting em olsem, no ken givap wantu. Samting yu laik mekim em yu laik skulim ol narapela long tok i tru bilong Baibel bilong helpim ol long abrusim bagarap. (1 Korin 2:10) Bilong lain long skulim man long Baibel long narapela tok ples yu mas putim tingting olgeta long dispela wok, em samting yu mas strong long mekim inap sampela yia. Taim yu wok long lain, abrusim pasin bilong skelim ol samting yu no inap mekim gut wantaim samting ol narapela i mekim. Ol man i wok long lainim nupela tok ples ol i no wankain na ol i lain long narapela narapela rot. Tasol, i gutpela long luksave long wok yu mekim pinis long lainim nupela tok ples. (Galesia 6:4) Joon i lainim tok Saina, em i tok: “Pasin bilong lainim narapela tok ples i kain olsem yu wokabaut i go antap long wanpela lata. Taim yu ting olsem pasin bilong yu long mekim dispela tok ples i no wok long kamap gutpela moa, yu kirap nogut olsem wantu yu go antap long narapela step bilong lata, olsem pasin bilong yu long mekim dispela tok ples i kamap gutpela moa.”
Pasin bilong lainim nupela tok ples em i wanpela wok man inap mekim long laip olgeta bilong em. Olsem na amamas long lainim tok ples, tasol no ken ting toktok bilong yu bai gutpela olgeta. (Song 100:2) Bai yu mekim ol popaia. Em samting i save kamap taim man i lain long nupela tok ples. Taim wanpela Kristen i kirap autim tok long tok Itali, em i askim man bilong haus, “Yu save long brum bilong i stap bilong yumi?” Em i laik tok “as bilong i stap bilong yumi.” Wanpela Witnes i lain nupela long tok Polan i tokim kongrigesen long singim dok, em i laik tok singim song. Wanpela man i lainim tok Saina i mekim tok na em i tanim liklik krai bilong nek, na long dispela rot em i tokim odiens long bilip long kabot bilong Jisas, em no tok ofa bilong Jisas. Gutpela samting bilong popaia em olsem, taim ol i stretim yu na tokim yu long wanem tok i makim stret dispela samting, yu no inap lusim tingting long dispela tok, em bai stap oltaim long tingting bilong yu.
Wok Wantaim Kongrigesen
I no tok ples tasol i brukim ol lain man, nogat. Planti taim pasin bilong ples, kain kain skin, na kantri, ol dispela samting i brukim moa yet ol lain man. Tasol i no olsem yu no inap winim ol dispela samting, nogat. Wanpela saveman i wok long skelim ol lain lotu i mekim tok Saina long Yurop, em i luksave olsem ol Witnes Bilong Jehova ol i stap olsem wanpela lain maski ol i bilong wanem wanem kantri. Em i tok: Namel long ol Witnes, “kain kain kantri na lain i no bikpela samting long ol, na tok ples em i rot tasol bilong kisim save long tok bilong God.” Tru tumas, ol trupela Kristen i save bihainim ol stiatok bilong Baibel na dispela i helpim ol long daunim pasin bilong tingim kantri o lain bilong ol yet. Long ol man i ‘kamap nupela man pinis . . . yumi no ken tingim moa olsem yumi lain Grik o Juda, o bilong kain kain tok ples o bilong kain kain kantri,’ nogat.—Kolosi 3:10, 11.
Olsem na olgeta long kongrigesen i mas wok wantaim bilong kamapim pasin wanbel. Bilong mekim olsem, man i mas redim tingting na bel bilong em bilong kisim nupela tingting, pasin bilong pilim ol samting, na mekim ol samting. Pasin bilong ol man bilong ol narapela narapela kantri i no wankain na yumi no laik bai dispela samting i brukim yumi i go tupela lain. Pasin bilong no tingim tumas laik bilong yumi yet bai helpim yumi long abrusim dispela hevi. (1 Korin 1:10; 9:19-23) Lain long amamas long ol gutpela pasin bilong ples bilong olgeta man. Tingim, pasin bilong laikim olgeta lain em i as bilong ol pasin pren na pasin wanbel tru tru.
Planti kongrigesen bilong narapela tok ples, taim ol i bin kirap nupela ol i liklik grup tasol, i gat ol man i wok long lainim nupela tok ples na sampela man em nau tasol ol i kirap long lainim ol stiatok bilong Baibel. Ol tingting kranki inap kamap insait long ol kain grup olsem winim ol kongrigesen i bin i stap longpela taim. Olsem na ol strongpela Kristen i mas helpim kongrigesen long i stap strong. Taim yu mekim gutpela pasin long ol narapela na kamapim pasin laikim long ol, dispela i save helpim ol nupela man long kamap strong long ol samting bilong spirit.
Ol man i laik helpim wanpela kongrigesen bilong narapela tok ples ol i mas i gat stretpela tingting long ol arapela na no ken askim ol long mekim samting ol i no inap mekim. Rick, wanpela elda bilong kain kongrigesen olsem, em i tok: “Sampela Witnes ol i nupela na ating ol i no bin kisim gutpela trening long ol wok bilong oganaisesen olsem ol narapela long ol kongrigesen i bin stap longpela taim. Ol i no gat gutpela save long mekim ol wok, tasol ol i laikim ol arapela na ol i amamas long mekim wok. Na planti man i laikim tok bilong Baibel ol i kam insait long tok i tru.” Taim yu redi long helpim ol long wanem wanem rot yu inap long mekim, yu helpim tru kongrigesen maski yu wok yet long lainim tok ples. Olgeta long kongrigesen inap helpim kongrigesen long kamap strong long samting bilong spirit sapos ol i wok gut wantaim.
Stap Strong Long Samting Bilong Spirit
Wanpela brata i bin kam nupela long wanpela kongrigesen bilong narapela tok ples i harim wanpela mama i helpim pikinini long redim bekim bilong em. Pikinini i tok: “Mama, inap mi mekim sotpela bekim tasol?” Mama i tok: “Nogat, yumi mas larim ol sotpela bekim long ol man i wok long lainim tok ples.”
Sapos ol man i bikpela pinis i no inap toktok gut wantaim ol narapela inap planti mun o yia, dispela inap bagarapim tingting na bel bilong ol, na i daunim ol long ol samting bilong spirit. Janet i save gut long tok Spen nau, em i tok: “Mi save bel hevi kwik taim mi no inap mekim planti tok long tok Spen.” Hiroko i bin lainim tok Inglis, em i tingim bek tingting em i bin kisim, olsem: ‘Save bilong ol dok na pusi long tok Inglis i winim save bilong mi.’ Na Kathie i tok: “Pastaim mi bin i gat sampela Baibel stadi na notbuk bilong mi i pulap long nem bilong ol gobek, tasol taim mi go long kongrigesen bilong tok Spen, mi no gat wanpela. Mi pilim olsem mi no bin mekim gutpela wok.”
Long kain taim olsem, stretpela tingting em i bikpela samting. Taim Hiroko i bel hevi, em i tingting olsem: “Sapos ol narapela i bin lainim narapela tok ples, mi tu inap lain.” Kathie i tok: “Mi tingim man bilong mi, em i wok long mekim gut tok ples na mekim planti wok insait long kongrigesen. Dispela i helpim mi long winim dispela hevi na mi wok strong. Em hatwok yet, tasol isi isi mi lain long mekim wok autim tok na lainim man, na dispela i mekim mi amamas.” Man bilong em, Jeff, i tok: “Bel bilong yu bai bagarap sapos yu no inap kisimgut olgeta samting i kamap long ol toksave na long ol miting bilong ol elda. Mi mas tok stret na daunim mi yet na askim ol long tokim mi gen long olgeta samting, tasol ol brata i amamas long helpim mi.”
Bilong helpim yu na bai skin i no les long ol samting bilong spirit taim yu wok wantaim kongrigesen bilong narapela tok ples, yu mas tingim yu yet pastaim long ol samting bilong spirit. (Matyu 5:3) Kazuyuki i bin autim tok long tok ples Potugal inap planti yia, em i tok: “Em i bikpela samting long yumi mas kisim ol kaikai bilong spirit bilong kisim strong. Olsem na mipela famili i save stadi na redim ol miting wantaim long tok ples bilong mipela yet, na tu, long tok Potugal.” Sampela i save go long ol miting long tok ples bilong ol yet sampela taim. Na tu, yumi mas malolo gut, em bikpela samting.—Mak 6:31.
Skelim Gut
Sapos yu tingting long i go wok wantaim wanpela kongrigesen bilong narapela tok ples, orait skelim gut ol samting yu mas mekim. (Luk 14:28) Taim yu mekim olsem, ol bikpela samting yu mas skelim gut em ol samting bilong yu yet long ol samting bilong spirit na pasin bilong yu long pas gut wantaim Jehova. Beten askim Jehova long helpim yu long skelim gut dispela samting. Skelim gut olsem dispela senis bai mekim wanem long meri na ol pikinini bilong yu. Askim yu yet, ‘Mi gat mani bilong lukautim mi, na olgeta samting bilong strongim mi long samting bilong spirit na bel taim mi mekim dispela wok inap planti yia?’ Em i savetingting long mekim samting em bai helpim gut yu na famili long ol samting bilong spirit. Maski yu stap we na mekim wok bilong autim tok bilong Kingdom, i gat planti wok bilong mekim na i gat bikpela amamas.
Ol man em ol inap mekim wok long wanpela kongrigesen bilong narapela tok ples, ol bai kisim ol gutpela samting. Barbara i go wantaim man bilong em long wanpela kongrigesen bilong tok Spen, em i tok: “Em wanpela gutpela samting long laip bilong mi, mi amamas tru long en. Em i olsem mi kirap nupela gen long lainim tok i tru. Mi amamas tru long mipela i bin mekim olsem, long wanem, mipela i no inap i go wok misineri long narapela kantri.”
Long olgeta hap bilong graun, planti tausen manmeri i gat kain kain krismas ol i kirap mekim dispela hatwok bilong lainim narapela tok ples na bai ol i ken mekim bikpela wok moa bilong autim tok. Sapos yu wanpela bilong ol, orait holim strong stretpela tingting na tingim ol gutpela samting bai kamap. Nambawan samting em yu mas bilip long Jehova bai blesim ol hatwok yu mekim.—2 Korin 4:7.
[Piksa long pes 18]
Samting i save helpim ol sumatin long lain kwik na i no hatwok tumas long lain em sapos ol i go long ol klas we tisa i gat gutpela save i ken skulim ol
[Piksa long pes 20]
Taim yu wok long lainim nupela tok ples, no ken larim dispela i pasim yu olgeta long mekim ol samting bilong helpim yu long stap gut long ol samting bilong spirit