Kisimgut Tok Bilong Baibel—Wanem Samting Bai Helpim Yu?
“YU BIN haitim ol dispela samting long ol man i gat gutpela save na tingting, na yu bin soim long ol man i stap olsem ol liklik pikinini tasol.” (Luk 10:21) Dispela tok Jisas i bin mekim long Papa bilong em long heven i soim olsem, yumi mas i gat stretpela tingting na bai yumi ken kisimgut ol tok bilong Baibel. Savetingting bilong Jehova i kamap klia taim em i givim wanpela buk em ol man i gat pasin daun na i larim God i skulim ol, ol tasol inap kisimgut tok bilong en.
Klostu olgeta man i hatwok long mekim pasin daun. Pasin antap i stap long skin bilong yumi olgeta. Na tu, yumi stap long “taim bilong las de,” namel long ol man i save ‘laikim ol yet tasol, bihainim kwik olgeta tingting kranki bilong ol yet, na tingim ol yet i bikpela man tru.’ (2 Timoti 3:1-4) Ol dispela kain pasin i save pasim rot bilong yumi long kisimgut Tok Bilong God. Pasin antap bilong ol man yumi stap namel long ol i save kalap long yumi tu. Orait olsem wanem yu inap kisim pasin daun bambai yu ken kisimgut tok bilong Baibel?
Redim Bel na Tingting
Esra, em wanpela lida bilong lain bilong God, em i “wok strong long kisim save long lo bilong Bikpela.” (Esra 7:10) Yu ting i gat rot bilong redim bel bilong yumi? Yes, i gat. Pastaim yumi mas kisim stretpela tingting long Baibel. Aposel Pol i tokim ol wanlain Kristen: “Taim yupela i kisim tok bilong God long maus bilong mipela, yupela i no kisim olsem tok bilong man. Nogat. Yupela i kisim olsem tok tru bilong God.” (1 Tesalonaika 2:13) Tru, ol man i bin raitim Baibel, tasol tok ol i raitim i kam long Jehova. Taim yumi save na bilip long dispela, bel bilong yumi bai redi long kisim ol tok yumi ritim.—2 Timoti 3:16.
Beten em i narapela rot bilong redim bel bilong yumi. Holi spirit i bin kirapim ol man long raitim Baibel, olsem na dispela holi spirit bai helpim yumi long kisimgut tok bilong Baibel. Yumi mas beten bilong kisim dispela helpim. Man bilong raitim song i tingim dispela na em i tok: “Mekim klia mining bilong lo bilong yu na bai mi bihainim. Bel bilong mi bai i kirapim mi long bihainim olgeta lo.” (Song 119:34) Yumi mas beten bilong kisimgut ol tok i stap long Baibel, na tu, yumi mas beten bambai bel i redi long bilip long ol dispela tok. Bilong kisimgut tok bilong Baibel, yumi mas redi long kisim ol tok i tru.
Taim yu tingim tingim ol samting long bel bilong kisim stretpela tingting, tingim ol gutpela samting yu inap kisim taim yu stadi long Baibel. I gat planti gutpela as na yumi ritim Baibel, tasol nambawan as tru na yumi ritim, em i helpim yumi long i go klostu long God. (Jems 4:8) Taim yumi ritim stori bilong ol samting Jehova i bin mekim taim narapela narapela samting i kamap, na em i amamas tru long ol man i laikim em, na pasin em i mekim long ol man i lusim em, em nau, yumi inap save em i wanem kain God. Nambawan samting i mas kirapim yumi long ritim Baibel, em yumi laik save gut moa long God na bai yumi ken pas gut wantaim em.
Ol Samting i Pasim Yumi Long Kisim Stretpela Tingting
Wanem ol samting inap pasim yumi long kisimgut Tok Bilong God? Wanpela samting, em yumi ting yumi mas i stap gut long bilip bilong sampela man. Olsem: Yumi ting ol bilip na tingting bilong sampela man i samting tru. Tasol olsem wanem sapos ol dispela man i no bihainim o tingim tru ol tok i tru bilong Baibel? Sapos olsem, ating bai yumi hatwok long kisimgut ol tok bilong Baibel. Olsem na Baibel i tokim yumi long skelim gut ol tok yumi bin lainim.—1 Tesalonaika 5:21.
Kain hatwok olsem i bin painim mama bilong Jisas, Maria. Papamama i bin skulim em long bihainim ol pasin na bilip bilong lotu Juda. Em i bihainim gut Lo Bilong Moses na em i bin go oltaim long haus lotu bilong ol Juda. Bihain em i save olsem God i no orait moa long ol pasin bilong lotu em papamama i bin skulim em long en. Olsem na Maria i bilip long ol tok bilong Jisas na em i insait long namba wan lain bilong kongrigesen Kristen. (Aposel 1:13, 14) Tasol taim Maria i mekim olsem, em i no daunim papamama o pasin na bilip bilong ol tumbuna bilong em, nogat. Em i laikim tru God na em i mekim olsem. Na yumi tu, sapos yumi laik bai Baibel i helpim yumi, yumi mas putim pasin bilong i stap gut long God i go pas long pasin bilong i stap gut long ol narapela, olsem Maria i bin mekim.
Sori tru, planti man i no tingim liklik ol tok i tru bilong Baibel. Sampela i amamas tasol long bihainim ol pasin na bilip bilong lotu em ol tok giaman i as bilong en. Na long toktok na wokabaut bilong ol, sampela i soim olsem ol i givim baksait long tok i tru. Olsem na bilong kisim tok i tru bilong Baibel, yu mas redi long karim sampela hevi. Ating ol pren, ol neiba, ol wanwok, o famili bilong yu i no amamas long yu. (Jon 17:14) Tasol saveman Solomon i tok: “Yu mas strong long kisim save long ol pasin i tru . . . Yu no ken tromoi ol dispela gutpela pasin.” (Sindaun 23:23) Sapos yu ting tok i tru i bikpela samting, Jehova bai helpim yu long kisimgut tok bilong Baibel.
Narapela samting i pasim rot bilong kisimgut tok bilong Baibel, em yumi no laik bihainim tok bilong en. Jisas i bin tokim ol disaipel: “God i larim yupela i save pinis long as bilong tok hait bilong kingdom bilong heven. Tasol em i no soim long ol dispela manmeri. Bel bilong dispela lain manmeri i pas pinis, na yau bilong ol i les long harim toktok.” (Matyu 13:11, 15) Planti manmeri Jisas i bin autim tok long ol, ol i no laik harim, na ol i no laik senisim pasin bilong ol. Ol i narapela kain tru long bisnisman Jisas i bin stori long en long wanpela tok piksa. Taim em i painim wanpela bis i gutpela tru, orait em i go salim olgeta samting bilong em na i go baim dispela gutpela bis! Na olsem tasol, pasin bilong kisimgut ol tok i tru bilong Baibel i mas i stap olsem gutpela samting tru long yumi.—Matyu 13:45, 46.
Hatwok Long Larim Narapela i Skulim Yumi
Wanpela bikpela samting bilong kisimgut tok bilong Baibel, em yumi mas larim narapela i skulim yumi. Sampela man i hatwok long kisim sampela nupela tingting long wanpela man i olsem man nating tasol. Tasol ol aposel bilong Jisas Krais ol “i no bin skul. [Ol] i man nating tasol.” (Aposel 4:13) Pol i tokaut long as bilong dispela, olsem: “Ol brata, yupela i mas tingim taim God i bin singautim yupela na yupela i kamap Kristen. Planti bilong yupela i no bin i stap olsem saveman long ai bilong ol man bilong dispela graun. Na planti bilong yupela i no bin i gat strong. Na planti bilong yupela i no bilong ol lain famili i gat biknem. Tasol ol man God i makim, em ol man i gat kranki tingting long ai bilong ol arapela man, na long dispela pasin God i semim tru ol saveman bilong dispela graun.” (1 Korin 1:26, 27) Sapos yu pilim olsem i hatwok long mekim pasin daun na larim wanpela man nating i skulim yu, yu mas tingim olsem dispela man o meri em i rot bilong God long skulim yu. Em i gutpela samting tru long kisim skul long Jehova, em Nambawan Bikpela Tisa bilong yumi, a?—Aisaia 30:20; 54:13.
Kepten bilong ami bilong Siria, Naman, em i hatwok long kisim tok long wanpela man nating. Em i laik painim rot bilong oraitim sik lepra bilong em, olsem na em i go lukim profet bilong Jehova, Elisa. Tasol ol tok bilong God long pasin bilong oraitim dispela sik, em i kam long Naman long rot bilong wanpela wokboi. Dispela tok na pasin bilong givim tok long Naman i mekim na em i hatwok long mekim pasin daun, olsem na pastaim em i no laik bihainim tok bilong profet bilong God. Tasol bihain Naman i senisim tingting bilong em na em i kamap orait gen. (2 King 5:9-14) Yumi gat wankain hatwok taim yumi ritim Baibel. Ating yumi kisim save olsem, bilong kamap orait long ol samting bilong spirit na stretim pasin bilong yumi, yumi mas bihainim nupela rot long i stap bilong yumi. Olsem wanem? Bai yumi mekim pasin daun na larim wanpela man i skulim yumi long ol samting yumi mas mekim? Ol man i amamas long narapela i skulim ol, ol tasol inap kisimgut ol tok bilong Baibel.
Wanpela bikman long gavman bilong Kandasi, kwin bilong kantri Itiopia, em i soim olsem em i gat gutpela tingting. Em i sindaun long karis na i laik i go bek long Afrika, na disaipel Filip i ran i go klostu long karis na i askim dispela bikman olsem em i save long as bilong tok em i ritim o nogat. Long pasin daun man hia i tok: “Sapos i no gat man i tokim mi long as bilong dispela tok, orait bai mi inap save olsem wanem?” Orait taim em i kisimgut tok bilong Baibel, em i kisim baptais. Bihain long en “dispela man i amamas na i bihainim rot bilong en na i go.”—Aposel 8:27-39.
Planti Witnes Bilong Jehova ol i man nating tasol. Long olgeta wik ol i save mekim Baibel stadi wantaim 6 milion manmeri long haus bilong ol man. Baibel i skulim yumi long nambawan gutpela rot long bihainim, na i tokaut long gutpela samting ol man inap bilip tru na wet long en, na i soim rot bilong kisim save long God. Olsem na planti milion manmeri i lukim pinis olsem pasin bilong stadi long Baibel na kisimgut tok bilong en, em i givim bikpela amamas tru long ol. Yu tu yu inap kisim dispela amamas.
[Piksa long pes 7]
Naman i hatwok long kisim tok long wanpela wokboi nating
[Piksa long pes 7]
Pasin bilong kisimgut tok bilong Baibel i save mekim gut bel bilong yumi