Yu Stap Amamas Tru?

TRU tumas, ating bai yu askim yu yet, ‘Mi stap amamas tru o nogat?’ Ol saveman i gat laik tru long save, yu na ol narapela man bai bekim dispela askim olsem wanem, tasol i hatwok long kisim save long dispela. Bilong skelim amamas bilong man i bikpela olsem wanem, em i wankain olsem yumi laik skelim laik bilong man long meri bilong em, o bel hevi bilong man taim wanpela long famili i dai. Yumi no inap skelim o metaim tru dispela kain samting man i pilim long bel. Tasol ol saveman i save long wanpela samting i tru: Olgeta manmeri inap i stap amamas.

Tasol maski yumi ol man inap i stap amamas, ol bikpela hevi i mekim na i no gat pasin bilong stap amamas. Tingim dispela: Long sampela biktaun, ol ples matmat i pulap tru long ol man i dai long sik AIDS. Olsem na gavman i tok long ol i ken opim sampela olpela matmat bilong planim ol man i dai nau tasol. Long sampela hap bilong Afrika, planti man moa i kisim wok bilong wokim ol kofin. Na maski yu sindaun we, yu lukim pinis olsem ol man i gat bikpela sik o sampela bilong famili o ol pren i dai pinis, ol i no amamas​—ol i stap bel hevi tru.

Orait olsem wanem long ol kantri i gat planti mani na gutpela sindaun? Taim nogut inap kamap wantu na kamapim hevi bilong mani long ol man i no bin redi long dispela samting. Long Amerika, planti manmeri i ritaia pinis ol i mas kirap mekim wok mani gen, long wanem, ol i no kisim moa pensen samting. Na pe bilong baim dokta na marasin i save pinisim mani bilong famili. Wanpela loya i tok: “Mi lukim ol dispela man i kam bilong kisim helpim, ol i gat bikpela dinau tru na kain kain sik, na mi bel sori tru long ol. Planti taim mi mas tokim ol, ‘Yu mas salim haus bilong yu na bai yu gat mani bilong lukautim yu yet.’ ” Tasol olsem wanem long ol man i no gat hevi bilong mani? Yu ting ol tu inap bel hevi na i no stap amamas?

Sampela man i olsem wanpela man i gat nem long raitim musik, em Richard Rodgers. Ol i stori long em olsem: “Em i bin givim bikpela amamas long planti man.” Ol singsing em i bin raitim i givim amamas long ol narapela, tasol em yet i gat bikpela sik bilong bel hevi. Em i kisim samting em planti man i laik kisim​—mani na biknem​—tasol olsem wanem long amamas? Wanpela man bilong raitim stori bilong ol man i tok: “Wok bilong [Rodgers] i kamap gutpela tru, em i gat gutpela sindaun, na em i bin winim tupela Prais Pulitzer wantaim wanwok bilong em. Tasol planti taim em i stap bel hevi na em i no amamas.”

Ating yu lukim pinis olsem, ol man i ting mani em i rot bilong kisim amamas, ol i giamanim ol yet. Ripota bilong nius The Globe and Mail bilong Toronto, Kanada, i tok planti maniman i save stap “wanpis na i olsem i stap bilong ol i no gat as bilong en.” Na maneja bilong wanpela beng i tok, taim ol papamama husat i gat planti mani i save givim planti mani na ol presen samting long pikinini bilong ol, “planti taim dispela i mekim na bihain ol pikinini i no stap amamas.”

As Tru Bilong i Stap Amamas

Bilong plaua i ken kamap gutpela, yumi mas planim long graun i gat gutpela gris, givim wara, na em i mas kisim san samting i stret long en. Na olsem tasol, ol saveman i save olsem i gat sampela samting i helpim man long i stap amamas. Olsem: Gutpela helt, gutpela wok mani, kaikai inap long skel, haus, laplap, rot bilong inapim laik bilong wokim sampela samting, na ol pren tru.

Ating bai yu wanbel long tok olsem ol dispela samting inap helpim man long i stap amamas. Tasol i gat wanpela samting i bikpela moa. Em yumi mas kisim save long dispela ‘God i as bilong amamas,’ nem bilong em Jehova. (1 Timoti 1:11) Dispela save i helpim yumi olsem wanem? Jehova em i Man Bilong Wokim yumi, na em i wokim yumi bilong yumi inap i stap amamas. Olsem na em i save long wanem ol samting inap helpim yumi long stap amamas tru. Stori i kamap bihain long dispela i stori long pasin bilong em long stiaim ol man long rot bilong i stap amamas inap oltaim oltaim, maski ol i stap long wanem wanem hap o i gat wanem kain sindaun.

[Piksa long pes 4]

Olsem plaua yumi planim, pasin amamas i mas i gat ol samting i stret long en bambai em i ken kamap bikpela

[Piksa Kredit Lain long pes 3]

© Gideon Mendel/CORBIS