‘Mipela i Mas Bihainim Tok Bilong God Tasol, Bilong Ol Man, Nogat’

“God Bilong Mipela Em Inap Long Helpim Mipela”

SAMTING i laik kamap em bilong mekim ol man i pret na kirap nogut. Ol i bin sanapim wanpela traipela imis gol long ples stret bilong Dura, klostu long taun Babilon. Long wanpela bikpela bung ol i laik dediketim dispela imis na ol hetman bilong gavman i mas bung na brukim skru long imis taim ol i harim musik i krai. King Nebukatnesar bilong Babilon i tok pinis olsem sapos wanpela i no brukim skru long dispela imis em bai dai insait long bikpela paia. I no gat man bai sakim dispela kain tok, a?

Ol man i kirap nogut taim ol i lukim 3-pela man husat i lotuim Jehova​—em Satrak, Mesak, na Abetnego​—i no brukim skru. Tripela i save sapos ol i brukim skru, dispela i olsem ol i no lotu long God Jehova wanpela tasol. (Lo 5:​8-10) Taim Nebukatnesar i tokim ol long kamapim as bilong samting ol i mekim, ol i no pret long tokim king olsem: “Mipela i save lotu long God tru. Sapos yu mekim long mipela olsem yu tok, orait God bilong mipela em inap long helpim mipela long abrusim paia na strong bilong yu, na em bai i helpim mipela. Tasol sapos em i no helpim mipela, maski, mipela i no inap lotu long ol god bilong yu, na tu mipela i no inap brukim skru long dispela piksa gol yu bin sanapim.”​—Daniel 3:​17, 18.

Taim ol i tromoi 3-pela Hibru long hatpela paia, ol i abrusim bagarap long rot bilong wanpela mirakel. God i bin salim wanpela ensel bilong lukautim ol gutpela wokboi bilong em. Tasol paslain long dispela samting i kamap, ol i bin pasim tok pinis long ol no inap sakim tok bilong Jehova, maski ol inap i dai.a Siks handet yia bihain long dispela, ol aposel bilong Jisas Krais i gat wankain tingting taim ol i tokaut long ai bilong bikpela kot bilong ol Juda olsem: “Mipela i mas bihainim tok bilong God tasol. Mipela i no ken bihainim tok bilong ol man.”​—Aposel 5:29.

Bikpela Skul Yumi Kisim

Satrak, Mesak, na Abetnego ol i stap olsem gutpela piksa long pasin bilong bilip, bihainim tok, na stap gut long God. Tripela Hibru i bin kamapim bilip bilong ol long Jehova. Maus bilong bel bilong ol, em Baibel i bin skulim, i no larim ol long insait long samting bilong lotu giaman na pasin bilong litimapim kantri. Long wankain pasin ol Kristen bilong nau ol i bilip tru long God. Ol i larim maus bilong bel, em Baibel i bin skulim, i stiaim ol na ol i no save insait long samting bilong lotu giaman na ol narapela pasin i save brukim ol lo na stiatok bilong God.

Tripela gutpela Hibru i bilip long Jehova na ol i bihainim tok bilong em, maski Gavman Babilon i laik givim biknem na bikpela namba long ol. Ol i redi long kisim pen na dai bilong holimpas pasin bilong ol long i pas gut wantaim God. Olsem Moses long bipo, ol i “mekim wankain pasin olsem man i bin lukim God, na [ol] i stap strong tru.” (Hibru 11:27) Maski Jehova bai kisim ol bek long indai o nogat, 3-pela i strong long bihainim tok bilong em. Ol i no laik lusim bilip bilong ol na bai ol i ken stap laip. Aposel Pol i stori long gutpela piksa ol i makim taim em i stori long ol bilipman husat “i mekim ol traipela paia i dai.” (Hibru 11:34) Ol wokboi bilong Jehova long nau ol i kamapim wankain bilip na pasin bilong bihainim tok taim ol traim i kamap long ol.

Stori bilong Satrak, Mesak, na Abetnego i lainim yumi olsem God i save mekim gut long ol man i save stap gut long em. Man bilong raitim song i tok: “God . . . i no inap larim ol manmeri bilong en i lus.” (Song 37:28) Long nau yumi no ken ting olsem God bai wokim wanpela mirakel bilong kisim bek yumi olsem em i bin mekim long 3-pela Hibru. Tasol yumi ken bilip tru olsem maski wanem hevi i painim yumi, Papa bilong yumi long heven bai helpim yumi. God inap rausim dispela hevi, o givim strong long yumi long karim dispela hevi, o kirapim bek yumi sapos yumi bihainim em tru i go inap long yumi dai. (Song 37:​10, 11, 29; Jon 5:​28, 29) Taim samting i traim pasin bilong yumi long bihainim tru God, pasin bilong bilip, bihainim tok, na stap gut long God bai helpim yumi long bihainim tok bilong God, na bilong ol man, nogat.

[Futnot]

[Blok/Piksa long pes 9]

YU SAVE LONG DISPELA?

• Tripela Hibru i no winim yet 30 krismas taim dispela traim i painim ol.

• Ol i mekim paia i kamap hat nogut tru.​—Daniel 3:19.