Laip Stori

Gutpela Pasin Bilong Famili i Helpim Mi

STORI BILONG KATHLEEN COOKE

LONG 1911, taim bubu meri bilong mi, Mary Ellen Thompson, i bin visitim sampela famili long Glasgow, Skotlan, em i go harim wanpela tok bilong Charles Taze Russell, em man i bin go pas long ol Sumatin Bilong Baibel, bihain ol i kisim nem ol Witnes Bilong Jehova. Bubu i amamas long ol tok em i harim. Taim em i go bek long Saut Afrika, em i kirap bung wantaim ol Sumatin Bilong Baibel long hap bilong em. Long Epril 1914 em i wanpela bilong ol 16 Sumatin Bilong Baibel i bin kisim baptais long namba wan kibung long Saut Afrika. Long dispela taim pikinini meri bilong bubu, Edith, em i gat 6-pela krismas. Bihain Edith i kamap mama bilong mi.

Brata Russell i dai long 1916, na bihain ol Sumatin Bilong Baibel long olgeta hap bilong graun ol i bruk bruk. Long ol 60 bratasista long Durban, inap 12 tasol i stap gut long Jehova. Mama bilong papa bilong mi, Ingeborg Myrdal, na pikinini man bilong em, Henry, wanpela yangpela husat i bin kisim baptais i no longtaim i go pinis, ol i sanap strong wantaim ol narapela gutpela bratasista. Long 1924, Henry i kamap kolpota, em nem bilong ol Witnes Bilong Jehova long dispela taim em ol i save autim tok fultaim. Inap 5-pela yia em i autim tok long planti ples long hap saut bilong Afrika. Long 1930, Henry na Edith i marit, na 3-pela yia bihain mi kamap.

Stap Wantaim Ol Bubu

Inap sampela yia mipela i sindaun long Mosambik, tasol long 1939 mipela i go sindaun wantaim bubu meri na bubu man Thompson long Johannesburg. Bubu man i no gat laik long save long tok i tru bilong Baibel na sampela taim em i birua long bubu meri, tasol em i save mekim gut long mipela. Susa bilong mi, Thelma, i kamap long 1940, na mitupela i lain long helpim ol lapun manmeri. Planti taim long taim bilong kaikai long apinun mipela i sindaun longpela taim na stori long ol samting i bin kamap long dispela de na mipela i tingim bek ol samting i bin kamap bipo.

Famili bilong mipela i amamas long planti Witnes i kam visitim mipela, na moa yet ol bratasista i mekim wok fultaim. Ol tu i stori wantaim mipela long taim bilong kaikai, na ol samting ol i stori long en i kirapim mipela long amamas tru long ol gutpela samting bilong lotu mipela i holim. Dispela i strongim laik bilong Thelma na mi long kamap painia olsem ol.

Taim mipela i liklik yet, Papa, Mama na bubu meri i strongim laik bilong mipela long rit. Tripela i ritim ol gutpela stori buk o Baibel long mipela. Ol miting Kristen na wok autim tok i bikpela samting long laip bilong mipela. Papa i wasman (nau ol i kolim wasman siaman) bilong Johannesburg Kongrigesen, olsem na mipela olgeta i mas kam long ol miting paslain tru long ol miting i kirap. Taim mipela i gat kibung, Papa i wok strong long helpim wok bilong lukautim kibung, na Mama i helpim ol bratasista i kam long kibung long kisim ples slip.

Wanpela Gutpela Kibung Tru

Long 1948 wanpela gutpela kibung tru i kamap long Johannesburg. Long namba wan taim, sampela memba bilong hetkota bilong ol Witnes Bilong Jehova long Brooklyn, New York, i kam. Ol i makim Papa bilong mi wantaim ka bilong em long i stap olsem draiva bilong Nathan Knorr na Milton Henschel. Long dispela kibung mi kisim baptais.

Liklik taim bihain, Papa i kirap nogut taim papa bilong em i tokim em olsem em i bel hevi tru, long wanem, bihain long Brata Russell i dai, em i larim ol narapela i bin lusim ol Sumatin Bilong Baibel i pulim em. Sampela mun bihain em i dai. Tasol bubu meri Myrdal i stap gut long Jehova inap long taim em dai na i pinisim wok bilong em long graun long 1955.

Samting i Stiaim Laip Bilong Mi

Mi kirap mekim wok painia oltaim long Februeri 1, 1949. I no longtaim bihain na mipela i amamas tru long harim toksave long wanpela intenesenel kibung bai kamap long New York City long yia bihain. Mipela i gat strongpela laik long go, tasol em i bikpela pe tumas long mipela i go. Orait, long Februeri 1950, bubu man Thompson i dai, na bubu meri i yusim mani em i kisim bilong baim rot bilong mipela 5-pela long go.

Sampela wik paslain long mipela i go, mi kisim wanpela pas long hetkota bilong ol Witnes Bilong Jehova long Brooklyn, New York. Ol i singautim mi long go long namba 16 klas bilong Skul Gileat bilong ol misineri. Mi amamas tru; mi no gat 17 krismas yet! Taim skul i kirap, mi wanpela bilong ol 10-pela sumatin bilong Saut Afrika, husat i kisim dispela gutpela blesing tru.

Bihain long gretiuesen long Februeri 1951, etpela bilong mipela i go bek long Saut Afrika bilong mekim wok misineri. Inap sampela yia, mi na wanwok bilong mi i autim tok long ol liklik taun we ol man i mekim tok ples Afrikaans. Pastaim mi no save long dispela tok ples, na mi tingim yet wanpela taim mi go bek long haus long baiskol na mi krai, long wanem, mi no mekim gut wok bilong autim tok. Tasol bihain mi lain moa long mekim wok na Jehova i blesim wok bilong mi.

Marit na Wok Wasman Raun

Long 1955, mi kisim save long John Cooke. Paslain na bihain long Wol Woa 2 em i bin helpim ol brata long kirapim wok autim tok long Frans, Potugal, na Spen, na em i bin kamap misineri long Afrika long yia mi bungim em. Bihain em i raitim tok olsem: “Insait long wanpela wik, 3-pela bikpela samting i kamap . . . Wanpela gutpela brata i givim wanpela liklik ka long mi; ol i makim mi long mekim wok wasman distrik; na mi kirap laikim wanpela meri.”a Mipela i marit long Disemba 1957.

Taim mipela i pren, John i tokim mi olsem taim mi stap wantaim em bai i gat planti kain kain samting i kamap, na em i tok tru. Mipela i visitim ol kongrigesen long Saut Afrika, na planti taim long ol hap we ol blakskin i sindaun long en. Long olgeta wik mipela i hatwok long kisim tok orait long go long ol dispela hap, na i hatwok moa long kisim tok orait long slip long ol dispela hap. Sampela taim, mipela i slip long plua bilong wanpela stua i no gat kago long en, em long hap we ol waitskin i sindaun long en na i klostu long hap bilong ol blakskin, na mipela i was gut bambai ol man i wokabaut i go i kam i no ken lukim mipela. Planti taim mipela i mas slip wantaim sampela Witnes waitskin, em ol i save stap longwe inap planti kilomita.

Na mipela i hatwok long wokim ol kibung long bus. Mipela i soim ol piksa wokabaut ol Witnes Bilong Jehova i bin wokim, na dispela i helpim ol manmeri long amamas long lain brata bilong mipela i stap long olgeta hap. Mipela i kisim jenareta bilong mipela yet i kam, long wanem, planti taim i no gat pawa long ol dispela hap. Na tu, mipela i gat hevi long ol hap ol Inglan i bosim, long wanem, ol i tambuim ol buk na nius bilong mipela, na mipela i mas lain tu long tok ples Zulu. Tasol mipela i bin amamas long mekim wok bilong helpim ol brata.

Long Ogas 1961, John i kamap tisa bilong namba wan Skul Bilong Wok Kingdom long Saut Afrika, em wanpela skul i kamap inap 4-pela wik na i bilong helpim ol wasman bilong kongrigesen. John i wanpela gutpela tisa, na ol brata i pilim tru ol tok piksa bilong em, ol i no hatwok long kisim na i klia. Klostu wanpela yia na hap mipela i go long planti hap bilong skulim ol lain i mekim tok Inglis. Taim John i skulim ol brata, mi go autim tok wantaim ol Witnes long ol dispela hap. Na bihain, mipela i kirap nogut, mipela i kisim wanpela pas i singautim mipela long mekim wok long brens ofis long Saut Afrika klostu long Johannesburg, kirap long Julai 1, 1964.

Tasol long dispela taim skin bilong John i no strong tumas. Long 1948 em i kisim sik TB na bihain long dispela planti taim skin bilong em i no gat strong. Skin bilong em i hat na het na ol bun i pen na em i no inap wok inap sampela de​—em i no inap mekim wanpela wok o lukim wanpela man. Liklik taim paslain long ol i askim mipela long go long brens ofis wanpela dokta i tok John i gat sik bilong bel hevi.

Mipela i no inap tingting long senisim laip o wok bilong mipela, olsem dokta i tokim mipela long mekim. Long brens ofis, ol i makim John long wok long Dipatmen Bilong Wok Autim Tok, na mi wok long ritim na stretim ol tok. Na mipela i amamas tru long mipela i gat rum bilong mipela yet! Paslain long mipela i marit, John i bin mekim wok autim tok long ol hap we ol man i mekim tok ples Potugal, olsem na long 1967 ol i askim mipela long helpim wanpela famili Witnes em ol i save mekim tok ples Potugal long autim tok long ol planti lain Potugal i sindaun long Johannesburg na klostu long Johannesburg. Dispela i mekim na mi mas kirap lainim narapela tok ples gen.

Ol manmeri i mekim tok ples Potugal i sindaun long planti hap, olsem na mipela i mas raun planti​—sampela taim mipela i mas raun inap 300 kilomita bilong visitim ol man i gat gutpela bel. Long dispela taim, ol Witnes i mekim tok ples Potugal em ol i sindaun long Mosambik, ol i kirap kam long ol kibung bilong mipela, na dispela i helpim tru ol nupela. Insait long 11-pela yia mipela i stap wantaim ol manmeri Potugal, mipela i lukim olsem liklik grup bilong mipela i gat 30 pablisa i kamap 4-pela kongrigesen.

Ol Senis i Kamap Long Famili

Long dispela taim, sampela senis i kamap long famili bilong mi. Long 1960, susa bilong mi, Thelma, i maritim John Urban, wanpela painia bilong Amerika. Long 1965 ol i go long namba 40 klas bilong Gileat na ol i mekim wok long Brasil inap 25 yia. Long 1990 ol i go bek long Ohio, Amerika, bilong lukautim papamama bilong John em ol i bin sik. Maski ol i mekim bikpela wok long lukautim papamama, ol i mekim yet fultaim sevis inap long nau.

Bubu meri Thompson i dai long 1965. Em i gat 98 krismas na em i stap gut long God na i pinisim wok bilong em long graun. Long dispela yia Papa i ritaia long wok mani bilong em. Olsem na taim ol i askim John na mi long helpim ol lain i mekim tok ples Potugal, Papa na Mama i kam helpim mipela. Wok bilong ol i helpim kongrigesen long i stap strong, na bihain long sampela mun, namba wan kongrigesen i kamap. Inap liklik taim bihain, sik kensa i mekim na Mama i no strong tumas, na em i dai long 1971. Papa i dai 7-pela yia bihain.

Karim Hevi Bilong Sik Bilong John

Long 1973 samting, mipela i luksave olsem helt bilong John i no wok long kamap gutpela. Isi isi em i mas lusim sampela gutpela wok bilong em, olsem em i no inap lukautim moa Stadi Wastaua i save kamap long brens ofis long olgeta wik, o mekim wok siaman long taim bilong skelim teks bilong de long moningtaim. Ol i senisim wok bilong em long Dipatmen Bilong Wok Autim Tok na em i kirap wok long Dipatmen Bilong Salim Ol Pas na bihain em i wok long gaden.

John i gat strongpela laik long mekim wok, na dispela i mekim na i hatwok long mekim sampela senis long laip bilong em. Taim mi tokim em long malolo liklik, em i save tok pilai long mi, mi olsem wanpela sen i pasim em​—na bihain em i save holimpas mi. Bihain mipela i pilim olsem mipela i mas lusim hap we ol i mekim tok ples Potugal na go long wanpela kongrigesen i save bung long Haus Kingdom bilong brens ofis.

Taim sik bilong John i go nogut moa, mi amamas long lukim pasin bilong em long pas gut wantaim Jehova. Taim John i kirap namel long nait na sik bilong bel hevi i daunim em tru, mipela i stori wantaim i go inap long taim bel bilong em i stap isi liklik na em inap beten long Jehova. Bihain em yet inap karim dispela hevi, long wanem, em i strongim em yet na isi isi em i kolim tok bilong Filipai 4:​6, 7: “Yupela i no ken wari long wanpela samting  . . . ” Orait nau bel bilong em i stap isi na em i beten. Planti taim mi no slip na mi lukim olsem maus bilong em i meknais taim em i beten strong long Jehova.

Brens ofis bilong mipela i go liklik tumas, olsem na ol i kirap wokim wanpela nupela brens ofis ausait long Johannesburg. Planti taim mitupela John i save go long dispela hap we bel isi i stap, longwe long ol pairap na win nogut bilong taun. Ol i bin sanapim sampela haus inap long taim nupela brens ofis i pinis na taim ol i larim mitupela John i go sindaun long dispela hap, dispela i helpim tru em.

Ol Nupela Hevi

Taim tingting bilong John i no klia moa, i hatwok long em long mekim wok bilong em. Bel bilong mi i amamas tru taim mi lukim pasin bilong ol narapela long wok strong long helpim John. Olsem: Taim wanpela brata i go long wanpela pablik laibreri bilong mekim sampela wok painimaut, em i askim John long go wantaim em. Ol tanget na nius i pulap long paus bilong John bilong mekim wok long en long dispela de. Dispela i helpim John long pilim olsem em i mekim yet gutpela wok.

Bihain, sik Alsaima i mekim na John i no inap rit moa. Mipela i amamas long ol kaset bilong ol buk na nius bilong Baibel na ol singsing bilong Kingdom. Long olgeta taim mipela i bin harim ol. Planti taim bel bilong John i no stap isi sapos mi no sindaun wantaim em na harim ol kaset, olsem na taim mi sindaun wantaim em mi lusim bikpela haptaim bilong samap na wokim ol kolsiot samting. Dispela i mekim na long olgeta taim mipela i gat planti kolsiot na blanket!

Bihain, sik bilong John i mekim na mi mas lukautim em moa. Maski planti taim skin bilong mi i les long rit o stadi, mi amamas tru long lukautim em i go inap long taim em i dai. Dispela i kamap long 1998, liklik taim bihain long em i gat 85 krismas​—em i bin stap strong tru long Jehova i go inap long pinis. Mi amamas tru long lukim em gen long taim em bai kirap bek, na skin na tingting bilong em bai orait gen!

Kisim Nupela Strong

Taim John i dai pinis, i hatwok long mi long lain long stap wanpis. Olsem na long Me 1999, mi go visitim susa bilong mi, Thelma, na man bilong em long Amerika. Mi amamas tru na kisim nupela strong taim mi lukim gen planti gutpela pren, na moa yet long taim mipela i go long hetkota bilong ol Witnes Bilong Jehova long New York! Dispela i strongim mi tru long ol samting bilong lotu long taim stret mi mas kisim nupela strong.

Taim mi tingim bek laip bilong ol gutpela famili bilong mi, dispela i mekim na mi inap tingim planti gutpela samting i bin helpim mi. Long rot bilong ol long skulim mi, gutpela pasin bilong ol, na helpim ol i givim mi, mi lain long laikim moa ol manmeri bilong ol narapela kantri na lain. Mi lain long no ken les kwik, sanap strong, na redi long senisim pasin bilong mi. Na moa yet, mi kisim gutpela helpim bilong Jehova, em Man bilong harim beten. Mi wanbel long tok bilong man bilong raitim song, em i tok: “Ol man yu save makim na bringim i go long haus bilong yu, ol i ken amamas. Long dispela haus bilong yu yet, planti gutpela samting i stap. Olsem na taim mipela i stap long banis bilong yu, mipela i save belgut tru.”​​—Song 65:4.

[Futnot]

[Piksa long pes 8]

Bubu meri wantaim ol pikinini meri bilong em

[Piksa long pes 9]

Mi wantaim papamama bilong mi taim mi kisim baptais long 1948

[Piksa long pes 10]

Mi na 9-pela narapela sumatin bilong Saut Afrika wantaim Albert Schroeder, kuskus bilong Skul Gileat

[Piksa long pes 10]

Mi wantaim John long 1984