Bilip Tasol Long Samting Yu Lukim

Sampela i ting “yumi no inap save tru long God na laip bilong yumi long bihain, em ol samting lotu Kristen na ol narapela lotu i save tingim. O ating long dispela taim nau, yumi no inap save long en.”​​—SAVEMAN BERTRAND RUSSELL, 1953.

MAN i bin kamapim dispela kain tingting em Thomas Huxley, em i wanpela saientis i gat save long ol animal. Mama i karim em long 1825, na em i bin stap long taim bilong Charles Darwin na em i strong long helpim tok bilong evolusen. Long 1863, Huxley i raitim tok olsem em i no inap lukim wanpela samting i makim olsem i gat wanpela God i stap na em i save “laikim tru yumi na tingim yumi, olsem lotu Kristen i tok.”

Long nau, planti man bai i wanbel long tok bilong ol dispela man i gat nem, na ol i tok samting ol i lukim long ai, ol bai bilip long dispela tasol. Ol i save tok, pasin bilong bilip long wanpela man o wanpela samting yumi no inap lukim, em longlong pasin.

Orait yu ting Baibel i tok yumi mas bilip nating long God? Nogat. Baibel i soim olsem em i pasin kranki long bilip nating long tok bilong ol man taim ol i no kamapim samting bilong truim tok. Baibel i tok: “Ol man i gat liklik save tasol, ol i save bilipim olgeta kain tok. Tasol man i gat gutpela tingting, em i save was gut long ol pasin em i mekim.”​—Sindaun 14:15.

Orait olsem wanem long pasin bilong bilip long God? I gat sampela samting i makim olsem God i stap na em i save laikim tru yumi na tingim yumi?

Ol Pasin Bilong God i Kamap Ples Klia

Wanpela man bilong raitim Baibel, em Pol, em i bin toktok wantaim wanpela lain saveman bilong Atens na em i tok God “i bin wokim skai na graun wantaim olgeta samting i stap long en.” Pol i tokim ol olsem God i save tingting long ol man bilong graun na “em i no i stap longwe long yumi olgeta wan wan.”​—Aposel 17:​24-​27.

I gat wanem as na Pol i bilip tru olsem God i stap na Em i save tingting long ol manmeri Em i bin wokim? Pol i kamapim wanpela as taim em i raitim pas long ol wanlain Kristen long biktaun Rom. Em i tok long God olsem: “Stat long taim God i mekim kamap olgeta samting na i kam inap nau, ol man i lukim ol samting em i bin wokim. Long dispela rot ol man inap save long sampela pasin bilong God i stap hait.”​—Rom 1:20.

Ol stori i kam bihain long dispela i kamapim 3-pela pasin bilong God i kamap ples klia tru long ol samting em i bin wokim. Taim yu skelim ol dispela samting, askim yu yet, ‘Taim mi kisim save long ol dispela pasin bilong God, dispela i mekim wanem long mi?’

[Rait long pes 3]

Baibel i no tok yumi mas bilip nating long God

[Ol Piksa Kredit Lain long pes 2]

COVER: Snowflakes: SnowCrystals.com; beetle: Entom Pictures/​Paul Eekhoff; page 32: Earth: Based on NASA photo