Wok Bos Bilong Satan Bai Pundaun
“Man i save mekim pasin nogut, bai em i no inap i stap gut.”—SAV. 8:13.
1. Dispela tok long ol man nogut bai sanap long kot, bilong wanem dispela tok i mekim gut bel bilong ol man?
I GAT taim bai kamap na ol man nogut bai sanap long kot. Ol i mas bekim tok long ol pasin nogut ol i bin mekim. (Snd. 5:22; Sav. 8:12, 13) Dispela tok i mekim gut bel bilong ol man, na moa yet em ol man husat i laikim tru stretpela pasin na ol man husat i bin kisim hevi long han bilong ol man nogut. Nambawan man namel long ol dispela man nogut husat bai sanap long kot em papa bilong pasin nogut, em Satan.—Jo. 8:44.
2. Bilong wanem na sampela haptaim i mas lus bambai God inap stretim dispela tok em ol i bin sutim long wok bos bilong em long Iden?
2 Long gaden Iden, Satan i tingim em yet olsem man i gat biknem, na em i pulim ol man long sakim wok bos bilong Jehova. Olsem na tupela namba wan tumbuna bilong yumi ol i stap long sait bilong em na ol i sutim tok long wok bos bilong Jehova na ol i mekim sin long ai bilong Em. (Ro. 5:12-14) Jehova i save olsem pasin bilong ol long bikhet na i no gat rispek, dispela bai kamapim ol hevi na ol i no inap abrusim. Na olgeta lain long heven na long graun ol i mas save long dispela samting. Olsem na sampela haptaim i mas lus bambai Jehova inap stretim dispela tok em ol i bin sutim long wok bos bilong em na kamapim klia tru olsem ol dispela bikhetman i bin mekim bikpela popaia stret.
3. Yumi mas i gat wanem tingting long gavman bilong ol man?
3 Ol man i bin sakim wok bos bilong Jehova, olsem na ol i kamapim kain kain gavman bilong ol yet. Taim aposel Pol i salim pas i go long ol wanbilip long Rom, em i tok ol i mas i stap aninit long ol “gavman” i bosim ol. Long taim bilong Pol, “gavman” i bosim ol em gavman bilong Rom, na Empera Niro i mekim wok bos insait long dispela gavman kirap long yia 54 C.E. i go inap 68 C.E. Pol i tok olgeta gavman i mekim wok bos, “God yet i putim ol na ol i stap.” (Ritim Rom 13:1, 2.) Yu ting dispela tok i makim olsem Pol i sapotim wok bos bilong ol man, na em i no sapotim wok bos bilong God? Nogat tru. Tok bilong em i makim olsem ol Kristen i mas soim rispek na stap aninit long wok bos bilong ol man, i go inap long taim Jehova i no larim ol moa long mekim wok bos bilong ol.
Rot i Go Long Bagarap
4. Stori gut long as na wok bos bilong ol man bai i pundaun.
4 Satan i stiaim wok bos bilong ol man, olsem na wok bos bilong ol bai i pundaun. Bilong wanem? Long wanem, ol i no bihainim savetingting bilong God. Jehova wanpela tasol em i man i gat savetingting i gutpela olgeta. Olsem na em tasol i save long rot bilong mekim wok bos we inap kamapim gutpela samting. (Jer. 8:9; Ro. 16:27) Ol man i save traim traim na popaia nabaut bambai ol i ken lain long mekim ol samting, tasol Jehova i no save mekim olsem. Em i save long nambawan gutpela rot bilong mekim ol samting. Olgeta kain gavman we i no bihainim ol stiatok bilong God, wok bilong ol i no inap kamapim gutpela samting. Kirap long namba wan taim yet ol samting i kamapim long ples klia olsem wok bos em Satan i mekim long rot bilong ol man, em bai pundaun. Na tu, wok bos bilong ol man bai pundaun, long wanem, Satan i tingting tasol long inapim laik bilong em yet na em i kirapim ol man long sakim wok bos bilong Jehova.
5, 6. Wanem samting i kirapim Satan long birua long Jehova?
5 Sapos man i gat gutpela tingting, em i no inap mekim wanpela kain wok we bai i pundaun. Tasol sapos em i strong long mekim dispela wok, i no longtaim na em bai luksave olsem em i bin popaia. Ol samting i bin kamap long graun i soim klia tru olsem ol man i no inap mekim gutpela wok sapos ol i birua long bikpela Man Bilong Wokim yumi. (Ritim Sindaun 21:30.) Tasol Satan i bin hambak na tingim em yet olsem man i gat biknem, na dispela i kirapim em long givim baksait long Jehova. Olsem na long laik bilong em yet, em i makim rot i go long bagarap.
6 Bihain, wanpela king bilong Babilon i mekim wankain hambak pasin olsem Satan na em i tok: “Bai mi abrusim ol sta na i go antap tru long heven. Na bai mi putim sia king bilong mi antap tru long ol sta bilong God. Na tu bai mi sindaun antap tru long dispela maunten long hap not ol god i save kam bung long en. Bai mi go antap tru long ol klaut na bai mi stap olsem God Antap Tru.” (Ais. 14:13-15) Wok bos bilong dispela king i pundaun, na lain king bilong Babilon i pinis. Long wankain pasin, Satan wantaim lain bilong em bai i bagarap na pinis olgeta.
Bilong Wanem God i Larim Tasol?
7, 8. Jehova i larim sotpela haptaim bilong ol pasin nogut i kamap, na dispela i bin kamapim wanem ol gutpela samting?
7 Ating sampela man i laik save: Bilong wanem Jehova i no pasim ol man long sapotim Satan? Na bilong wanem Jehova i no pasim ol man long mekim wanpela kain wok bos we bai i pundaun? Em i God i Gat Olgeta Strong, na em inap long pasim ol man. (Kis. 6:3) Tasol em i no bin mekim olsem. Em i bin bihainim savetingting na em i no bin pasim ol man taim ol i mekim pasin bikhet; em i save olsem gutpela samting bai kamap sapos em i larim sampela haptaim i lus pastaim. Isi isi ol samting bai kamapim klia olsem i stret tru long Jehova i stap nambawan King i gat stretpela pasin na pasin laikim, na olgeta disisen bilong em bai helpim tru ol gutpela man.
8 Sapos ol man i bin sakim traim bilong Satan na larim God tasol i bosim wokabaut bilong ol, orait i no gat wanpela samting bai i givim hevi long ol! Tasol Jehova i larim sotpela haptaim long ol man yet i ken bosim wokabaut bilong ol, na dispela i bin kamapim sampela gutpela samting. Ol man i gat gutpela bel ol i bin pilim tru olsem em i savetingting long harim tok bilong God na bilip long em. Insait long planti handet yia, ol man i bin traim kain kain gavman, tasol i no gat wanpela bilong ol dispela gavman i bin helpim tru ol man. Dispela i bin strongim bilip bilong ol manmeri i lotuim God, olsem wok bos bilong Jehova em i nambawan tru. Jehova i larim Satan i mekim wok bos nogut bilong em na dispela i bin givim hevi long ol man, na i givim hevi tu long ol man husat i stap gut long lotuim God. Tasol God i larim sotpela haptaim bilong ol pasin nogut i kamap, na dispela i bin helpim tu ol man husat i stap gut long lotuim God.
Pasin Bikhet i Opim Rot Long Jehova i Kisim Biknem
9, 10. Stori long olsem wanem wok bos bilong Satan i opim rot long Jehova i kisim biknem.
9 Em tru olsem Jehova i larim Satan i pulim ol man na ol yet i bosim wokabaut bilong ol, tasol dispela i no daunim wok bos bilong Jehova. Nogat tru! Ol samting i bin kamap long graun i soim klia tru olsem tok bilong Jeremaia, em holi spirit i bin kirapim em long raitim, em i tru olgeta olsem ol man i no inap long bosim wokabaut bilong ol yet. (Ritim Jeremaia 10:23.) Na tu, pasin bikhet bilong Satan i opim rot long Jehova i ken kamapim long ples klia ol gutpela pasin bilong Em. Olsem wanem dispela samting i kamap?
10 Wok bos bilong Satan i kamapim ol samting nogut, na dispela i opim rot long yumi inap luksave long ol gutpela pasin bilong Jehova. Long dispela rot, Jehova i kisim biknem long ai bilong ol manmeri husat i laikim em tru. Ating yumi kirap nogut long dispela tok, tasol em tru olsem wok bos bilong Satan i opim rot long God i kisim biknem. Taim Satan i sutim tok long wok bos bilong Jehova, Jehova i bin bihainim pasin i nambawan tru bilong stretim dispela tok. Bilong save gut long dispela, yumi ken skelim sampela pasin bilong Jehova, na kisim save long olsem wanem wok bos nogut bilong Satan i bin kirapim Jehova long soim ol pasin bilong em long sampela narapela rot.
11. Jehova i bin kamapim klia pasin laikim bilong em long wanem ol rot?
11 Pasin Laikim. Baibel i tokim yumi olsem “God yet em i as bilong dispela pasin bilong laikim ol arapela.” (1 Jo. 4:8) God i bin kamapim klia pasin laikim bilong em taim em i wokim yumi ol man bilong graun. Na God i wokim bodi bilong yumi long pasin i narakain na i nambawan tru, na dispela i kamapim gen pasin laikim bilong em. Na tu, Jehova i redim naispela ples bilong ol man i ken sindaun long en na i gat olgeta samting ol i mas kisim bilong i stap amamas. (Stt. 1:29-31; 2:8, 9; Sng. 139:14-16) Tasol taim pasin bikhet i kamap, Jehova i kamapim pasin laikim bilong em long ol narapela rot. Em wanem ol rot? Aposel Jon i kamapim tok em Jisas yet i bin mekim, olsem: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” (Jo. 3:16) Taim God i salim dispela wanpela Pikinini bilong em i kam long graun bilong baim bek ol sinman, em i soim pasin laikim bilong em long wanpela kain rot i nambawan tru. (Jo. 15:13) God i bin daunim laik bilong em yet bilong helpim yumi ol man, na dispela pasin i stap olsem gutpela piksa yumi ken bihainim; long wokabaut bilong yumi long olgeta wan wan de, yumi mas daunim laik bilong yumi yet na soim pasin laikim, olsem Jisas tu i bin mekim.—Jo. 17:25, 26.
12. Jehova i kamapim klia strong bilong em long wanem rot?
12 Bikpela Strong. “God I Gat Olgeta Strong,” em tasol inap long givim laip long ol samting. (KTH 11:17; Sng. 36:9) Taim mama i karim wanpela pikinini, i no gat wanpela hap tok i stap yet long tingting bilong pikinini—tingting bilong em i olsem wanpela pepa i no gat rait long en. Tasol taim pikinini i kamap bikpela, i gat ol wok na ol disisen em i mas mekim na kain kain samting i painim em, na olgeta dispela samting i stiaim em long kamapim ol pasin bilong em yet. Olsem na i go inap long taim em i dai, planti samting i stap pinis long tingting bilong em—i olsem em i raitim pinis planti tok long pepa. Olgeta dispela tok bai i stap long tingting bilong Jehova. Bihain, Jehova inap givim laip gen long em na inapim em wantaim ol pasin em i bin i gat paslain long em i dai. (Jo. 5:28, 29) Em i no laik bilong God long ol man i mas i dai, tasol dai i opim rot long Jehova i ken kamapim klia olsem strong bilong em i winim strong bilong matmat. Tru tumas, Jehova em i “God I Gat Olgeta Strong.”
13. Olsem wanem ofa bilong Jisas i kamapim klia stretpela pasin bilong Jehova?
13 Stretpela Pasin. Jehova i no save giaman; na oltaim em i save mekim pasin i stret. (Lo 32:4; Ta. 1:2) Oltaim em i save inapim tru lo bilong mekim tok tru na mekim pasin i stret, maski sapos i luk olsem dispela i no inap helpim em. (Ro. 8:32) Yumi ken ting olsem Jehova i bin bel hevi tru taim em i lukim gutpela Pikinini bilong em i dai long diwai pos olsem man bilong tok bilas long God! Tasol Jehova i laikim tumas ol sinman bilong graun, olsem na em i redi long larim dispela samting i kamap bambai em i ken strongim lo bilong stretpela pasin. (Ritim Rom 5:18-21.) Planti man i no bihainim stretpela pasin, olsem na dispela i opim rot long Jehova i ken kamapim klia olsem em tasol em i man bilong bihainim stretpela pasin.
14, 15. Wanem sampela rot we Jehova i bin kamapim klia gutpela tingting na save bilong em na pasin bilong i no les kwik?
14 Gutpela Tingting na Save. Kwiktaim bihain long Adam na Iv i mekim sin, Jehova i tokaut long samting em bai mekim bilong pinisim olgeta hevi i kamap long rot bilong pasin bikhet bilong ol. (Stt. 3:15) Dispela pasin bilong Jehova long kirap kwik long mekim samting, na isi isi em i autim tingting bilong em long ol wokman bilong em, dispela i helpim yumi long luksave olsem em i gat gutpela tingting na save. (Ro. 11:33) I no gat wanpela samting inap pasim God long stretim ol hevi. Dispela graun i pulap long pasin pamuk, ol bikpela pait, pasin i no stret, pasin bilong sakim tok, wantok sistem, pasin bilong tupela maus, na ol man i no gat pasin marimari, na ol dispela hevi i opim rot long Jehova i kamapim klia gutpela tingting na save bilong em. Disaipel Jems i tok: ‘Ol man i kisim gutpela tingting na save i kam long God, ol i save bihainim klinpela tingting, stap wanbel wantaim ol arapela, isi long ol, harim tok bilong ol arapela, sori tru long ol arapela na mekim gutpela pasin, mekim wankain pasin tasol long olgeta man, na i no giaman long bihainim gutpela pasin.’—Jem. 3:17.
15 I No Les Kwik. Dispela pasin bilong Jehova i kamap ples klia tru taim em i bin mekim ol samting bilong helpim yumi, long wanem, yumi gat sin na yumi save mekim ol rong na popaia. Inap planti tausen yia Jehova i bin helpim yumi, na dispela i soim olsem em i gat dispela gutpela pasin inap tru long mak bilong en, na yumi mas tenkyu tru long dispela pasin bilong em. Olsem na i stret tru long aposel Pita i tok long yumi mas “tingim pasin bilong Bikpela bilong yumi long i no les kwik. Dispela pasin bilong em i opim rot bilong God i ken kisim bek yumi.”—2 Pi. 3:9, 15, NW.
16. Jehova i redi long lusim rong na bilong wanem dispela i save kamapim bikpela amamas?
16 Redi Long Lusim Rong. Yumi olgeta i sinman, na planti taim yumi save popaia. (Jem. 3:2; 1 Jo. 1:8, 9) Yumi mas tenkyu tru olsem Jehova i redi long “marimari moa yet” na “lusim sin” bilong yumi! (Ais. 55:7) Tingim: Sin i stap pinis long yumi taim mama i karim yumi, olsem na taim God i lusim ol rong bilong yumi, yumi inap pilim bikpela amamas. (Sng. 51:5, 9, 17) Taim yumi yet i pilim dispela gutpela pasin bilong Jehova, dispela i strongim pasin bilong yumi long laikim em na i kirapim yumi long bihainim pasin bilong em taim ol narapela i rongim yumi.—Ritim Kolosi 3:13.
Bilong Wanem Ol Manmeri i Gat Hevi?
17, 18. Wok bos bilong Satan i pundaun long wanem ol rot?
17 Insait long planti handet yia, olgeta wok bos bilong ol man long graun, em ol samting Satan i bosim, ol i bin pundaun planti taim. Long 1991, wanpela niuspepa (The European) i tok: “Yu ting ol manmeri bilong dispela graun i gat sik? Yes, ol i gat sik, tasol . . . God i no kamapim dispela sik—ol manmeri yet i bin kamapim dispela sik.” Dispela tok em i tru olgeta! Satan i pulim tupela namba wan tumbuna bilong yumi na ol i sakim wok bos bilong Jehova na ol yet i laik bosim wokabaut bilong ol. Long dispela rot, ol i kirapim wanpela kain wok bos we bai i pundaun. Ol manmeri long olgeta hap bilong graun ol i karim bikpela pen na hevi, na dispela i stap olsem mak na i soim olsem wanpela kain sik nogut i bagarapim pinis wok bos bilong ol man.
18 Ol man husat i gat pasin bilong tingim ol yet tasol, ol i laikim wok bos bilong Satan. Tasol man husat i gat pasin bilong tingim em yet tasol, em i no inap tru long daunim pasin laikim—pasin laikim i stiaim wok bos bilong Jehova. Wok bos bilong Satan i no bin kamapim amamas na gutpela sindaun. Ol samting i kamapim klia olsem wok bos bilong Jehova i win tru! Olsem wanem? I gat sampela samting i kamap long nau i strongim dispela tok? Yes, yumi bai skelim ol dispela samting long stadi i kamap bihain long dispela.
Yumi Kisim Wanem Skul Long Wok Bos Taim Yumi Ritim . . .
• Rom 13:1, 2?
• Kolosi 3:13?
[Ol Piksa long pes 25]
Wok bos bilong Satan i no bin helpim ol man
[Ol Kredit Lain]
U.S. Army photo
WHO photo by P. Almasy
[Piksa long pes 26]
Strong bilong Jehova i winim strong bilong matmat
[Piksa long pes 27]
Pasin laikim na stretpela pasin bilong Jehova i kamap ples klia long ofa bilong Pikinini bilong em