Wok Bos Bilong Jehova i Win Tru!
“God Antap Tru i bosim olgeta manmeri.”—DAN. 4:17.
1, 2. Wanem sampela as na wok bos bilong ol man i pundaun?
WOK BOS bilong ol man i pundaun pinis! Yumi no gat tupela tingting long dispela samting. Ol man i no gat gutpela tingting na save long pasin bilong mekim wok bos—dispela em i namba wan as na wok bos bilong ol i pundaun. Yumi lukim ol dispela samting long nau, olsem planti man husat i mekim wok bos, ol i ‘laikim ol yet tasol, laikim tumas long kisim mani, litimapim nem bilong ol yet, hambak nabaut, givim baksait long ol pasin bilong God, i no gat rot bilong pinisim kros bilong ol, tok nogut long ol arapela, i no bosim laik bilong bodi, pait na bagarapim ol man nabaut, birua long olgeta gutpela pasin, mekim nogut long ol pren bilong ol yet, na tingim ol yet i bikpela man tru.’—2 Ti. 3:2-4.
2 Long bipo tru, tupela namba wan tumbuna bilong yumi ol i bin sakim wok bos bilong God. Taim tupela i mekim olsem, ating tupela i ting olsem tupela yet bai bosim wokabaut bilong tupela. Tasol tru tru, tupela i putim ol yet i go aninit long wok bos bilong Satan. Insait long 6,000 yia, ol man i mekim nabaut long wok bos—“hetman bilong dispela graun,” em Satan, i stiaim ol—na dispela i nogutim tru sindaun bilong yumi ol man. (Jo. 12:31, NW) Wanpela buk (The Oxford History of the Twentieth Century) i stori long sindaun bilong ol man long nau, na i tok olsem i no gat rot long “kisim sindaun i gutpela olgeta.” Buk i tok: “Ol man i no inap kisim dispela kain sindaun, na sapos ol i traim long kamapim kain sindaun olsem, dispela bai kamapim hevi, hatpela gavman, na woa.” Dispela buk i tokaut stret olsem wok bos bilong ol man i pundaun pinis!
3. Ating wok bos bilong God bai i olsem wanem sapos Adam na Iv i no bin mekim sin?
3 Sori tru olsem tupela namba wan tumbuna bilong yumi ol i bin sakim wok bos we inap tru long helpim sindaun bilong ol man—em wok bos bilong God! Yumi no save stret long wanem pasin em Jehova inap bihainim bilong mekim wok bos long graun sapos Adam na Iv i bin stap gut long em. Tasol yumi ken bilip tru olsem sapos olgeta lain man i bin daun long wok bos bilong God, ol bai i gat pasin laikim na ol bai mekim gut long olgeta kain man. (Ap. 10:34; 1 Jo. 4:8) Gutpela tingting na save bilong God em i nambawan tru, olsem na yumi ken bilip tu olsem sapos ol man i bin daun yet long wok bos bilong Jehova, bai ol i no mekim popaia na bosim wokabaut bilong ol yet. Wok bos bilong God inap mekim gutpela wok long “inapim laik bilong olgeta samting i gat laip.” (Sng. 145:16, NW) Em i nambawan gutpela wok bos. (Lo 32:4) Tasol sori tru olsem ol man i bin sakim dispela wok bos!
4. God i larim Satan long mekim wanem kain wok bos?
4 Maski Jehova i larim ol man long bosim ol yet, yumi no ken lusim tingting olsem em i holim yet rait bilong mekim wok bos. Strongpela king bilong Babilon tu i bin luksave olsem “God Antap Tru i bosim olgeta manmeri.” (Dan. 4:17) Long bihain, Kingdom Bilong God bai kamapim laik bilong Em. (Mt. 6:10) Tasol long nau, Jehova i larim Satan i mekim wok olsem “giaman god bilong dispela graun” bambai i gat rot bilong stretim ol tok em Satan i bin kamapim. (2 Ko. 4:4; 1 Jo. 5:19) Maski i olsem, Satan i no inap mekim ol samting em Jehova i no larim em long mekim. (2 Sto. 20:6; skelim Jop 1:11, 12; 2:3-6.) Na long olgeta taim i gat ol manmeri em ol i laik stap daun long God, maski dispela graun i stap aninit long wok bos bilong dispela bikpela Birua bilong God.
Lain Israel i Stap Aninit Long Wok Bos Bilong God
5. Lain Israel i bin mekim wanem tok promis long God?
5 Kirap long taim bilong Abel na i kam inap long taim God i kamapim lain Israel, planti gutpela manmeri i bin lotuim Jehova na bihainim ol tok bilong em. (Hi. 11:4-22) Long taim bilong Moses, Jehova i wokim kontrak wantaim ol tumbuna pikinini bilong Jekop, na ol i kamap lain Israel. Long 1513 B.C.E., ol Israel i tok promis olsem ol yet wantaim ol tumbuna pikinini bilong ol, ol bai daun long wok bos bilong Jehova, na ol i tok: “Mipela bai mekim olgeta samting olsem Bikpela i bin tok.”—Kis. 19:8.
6, 7. Taim God i mekim wok bos bilong em long lain Israel, dispela i bin kamapim klia wanem ol pasin?
6 I gat as na Jehova i makim ol Israel long i stap olsem lain bilong em stret. (Ritim Lo 7:7, 8.) Em i laik helpim ol long kisim gutpela sindaun, na i no dispela tasol, em i tingim nem bilong em na wok king bilong em—em ol bikpela samting tru. Lain Israel i gat wok long stap olsem witnes na kamapim klia olsem Jehova wanpela tasol em i God tru. (Ais. 43:10; 44:6-8) Olsem na Jehova i tokim ol: “Yupela i manmeri bilong God, Bikpela bilong yumi, long wanem, em i bin kisim yupela namel long olgeta lain manmeri i stap long graun na makim yupela bilong i stap lain manmeri bilong em yet.”—Lo 14:2.
7 Taim God i mekim wok bos bilong em long lain Israel, em i tingim olsem ol i sinman. Na tu, ol lo bilong em i gutpela olgeta na i kamapim klia ol pasin bilong em. Ol lo em Jehova i bin givim long rot bilong Moses, ol i kamapim klia olsem God em i holi, em i laikim stretpela pasin, em i redi long lusim rong, na em i no save les kwik. Bihain, Josua wantaim ol manmeri husat i stap long taim bilong em, ol i bihainim ol lo bilong Jehova na ol i stap bel isi na kisim ol blesing long ol samting bilong spirit. (Jos. 24:21, 22, 31) Ol samting i kamap long dispela taim i soim olsem wok bos bilong Jehova em i nambawan tru.
Wok Bos Bilong Man Bai Kamapim Samting Nogut
8, 9. Lain Israel i no bihainim gutpela tingting na ol i askim God long wanem samting? Wanem samting i kamap long dispela?
8 Sampela haptaim i lus na lain Israel i kisim pasin bilong givim baksait long wok bos bilong God, na ol i no stap aninit moa long lukaut bilong em. Long rot bilong profet Samuel, ol i tok strong olsem ol i laik bai wanpela man bilong graun i kamap king bilong ol. Jehova i tokim Samuel long bihainim laik bilong ol. Tasol Jehova i tok moa olsem: “Yu no ken ting ol i les long yu na ol i laik rausim yu. Nogat. Ol i no laik mi stap king bilong ol, na ol i rausim mi.” (1 Sml. 8:7) Jehova i larim ol Israel i makim wanpela man long kamap king bilong ol, tasol em i tok lukaut olsem wok bos bilong man bai kamapim samting nogut.—Ritim 1 Samuel 8:9-18.
9 Ol samting i kamap bipo i truim tok lukaut bilong Jehova. Lain Israel i bungim ol bikpela hevi taim ol i makim man bilong graun i kamap king bilong ol, na moa yet long taim dispela king i no stap gut long God. Yumi tingim dispela stori bilong lain Israel, na yumi no kirap nogut olsem stat long bipo yet na i kam inap long nau, i no gat gutpela samting i bin kamap long wok bos bilong ol man husat i no save long Jehova. Tru, sampela lain politik i save askim God long blesim wok bilong ol long kamapim bel isi na gutpela sindaun, tasol God i no inap blesim ol man husat i no daun long wok bos bilong em.—Sng. 2:10-12.
Nupela Lain Aninit Long Wok Bos Bilong God
10. Bilong wanem God i makim nupela lain long stap olsem senis bilong lain Israel?
10 Long laik bilong ol yet, lain Israel i no laik stap gut long wok bilong Jehova. Bihain, ol i sakim Man em God i bin makim olsem Mesaia, na Jehova i sakim ol na em i makim wanpela nupela lain long stap olsem lain bilong em. Olsem na long yia 33 C.E., God i bungim ol manmeri husat i lotuim em, em ol Kristen God i bin makim ol long holi spirit, na ol i kamap kongrigesen Kristen. Dispela kongrigesen i kamap olsem nupela lain i stap aninit long wok bos bilong Jehova. Pol i kolim ol olsem “lain Israel tru bilong God.”—Ga. 6:16.
11, 12. Long ol samting bilong wok wasman, wanem ol samting i wankain long Israel bilong bipo na “lain Israel tru bilong God”?
11 Taim yumi skelim lain Israel bilong bipo wantaim nupela “lain Israel tru bilong God,” i gat sampela samting long ol i narapela narapela na i gat sampela samting i wankain. Insait long kongrigesen Kristen, i no gat wanpela man bilong graun i stap olsem king na i no gat wok long ofaim ol animal bilong helpim ol sinman, tasol ol dispela samting i bin kamap long lain Israel bilong bipo. Tasol samting i wankain long tupela lain wantaim em olsem, i gat ol man i stap olsem ol lida, o ol elda. (Kis. 19:3-8) Ol man husat i mekim wok olsem ol elda Kristen, ol i no stap olsem bos bilong lain sipsip insait long kongrigesen, nogat. Ol i mekim wok wasman insait long kongrigesen na givim bel tru long i go pas long mekim ol wok Kristen. Ol i mekim gutpela pasin long olgeta wan wan insait long kongrigesen, na givim biknem long ol.—2 Ko. 1:24; 1 Pi. 5:2, 3.
12 Taim “lain Israel tru bilong God” wantaim “ol arapela sipsip,” ol i tingim ol samting em God i bin mekim long lain Israel bilong bipo, dispela i kirapim ol long laikim moa yet Jehova na wok bos bilong em. (Jo. 10:16) Olsem: Ol samting i kamap long bipo i soim olsem ol king bilong Israel i gat strong long stiaim ol manmeri; ol inap kirapim ol manmeri long bihainim gutpela pasin o bihainim pasin nogut. Dispela i kirapim ol man husat i mekim wok olsem ol lida namel long ol Kristen long tingim olsem, maski ol i no stap olsem ol king na bosim ol man olsem ol king bilong bipo, oltaim ol i mas i stap gutpela piksa long pasin bilong bilip.—Hi. 13:7.
Wok Bos Bilong Jehova Long Nau
13. Wanem bikpela samting i bin kamap long 1914?
13 Ol Kristen long nau ol i autim tok long ol manmeri olsem klostu nau bai wok bos bilong ol man i pinis. Long 1914, Jehova i kamapim Kingdom bilong em long heven, aninit long wok bos bilong Man em i makim bilong i stap King, em Jisas Krais. Long dispela taim, em i givim namba long Jisas long “i go olsem man i winim pait na em i wok long winim planti pait moa.” (KTH 6:2) Em i tokim dispela nupela King olsem: “Yu bosim ol birua bilong yu.” (Sng. 110:2) Tasol sori tru, ol lain man i no laik daun long wok bos bilong Jehova. Ol i bihainim yet pasin i kamapim tingting bilong ol olsem “i no gat God i stap.”—Sng. 14:1.
14, 15. (a) Olsem wanem yumi stap aninit long wok bos bilong Kingdom Bilong God long nau? Yumi mas givim wanem ol askim long yumi yet? (b) Long nau, wanem ol samting i soim klia olsem wok bos bilong God i winim wok bos bilong ol man?
14 Liklik hap lain bilong “lain Israel tru bilong God,” em God i bin makim, ol i stap yet long nau—ol i olsem ol brata bilong Jisas—na ol i mekim wok yet olsem “maus bilong Krais na autim tok bilong en.” (2 Ko. 5:20) Ol i mekim wok olsem lain wokboi i gat gutpela tingting, na ol i redim na tilim kaikai bilong spirit long ol Kristen God i bin makim na long bikpela lain Kristen husat i bilip long kisim laip oltaim long graun. (Mt. 24:45-47; KTH 7:9-15) Ol manmeri i lotuim Jehova long nau, ol i stap gutpela tru long ol samting bilong spirit, na dispela i kamapim klia olsem Jehova i blesim dispela wok.
15 Yumi olgeta wan wan i mas askim yumi yet olsem: ‘Mi luksave long ol wok mi mas mekim insait long kongrigesen Kristen? Mi helpim wok bos bilong Jehova? Mi amamas long i stap aninit long wok bos bilong Kingdom Bilong Jehova? Mi tingting strong long mekim wok inap tru long skel bilong mi na autim tok yet long Kingdom Bilong God?’ Yumi olgeta i pas gut wantaim olsem wanpela lain tasol, na yumi redi long bihainim tok i kam long Gavening Bodi na yumi wok gut wantaim ol elda insait long kongrigesen. Long ol kain rot olsem, yumi soim olsem yumi laikim wok bos bilong God. (Ritim Hibru 13:17.) Long dispela taim we ol lain man i no stap wanbel, pasin bilong yumi long stap daun long wok bos bilong God bai helpim yumi long i stap wanbel long olgeta hap bilong graun. Na tu, dispela pasin bai helpim yumi long stap bel isi na bihainim stretpela pasin na givim biknem long Jehova, na soim klia olsem wok bos bilong em i nambawan olgeta.
Wok Bos Bilong Jehova i Win Tru
16. Olgeta man long nau i mas mekim wanem disisen?
16 Klostu nau bai taim i kamap bilong stretim ol tok i bin kamap long Iden. Olsem na nau em taim bilong olgeta wan wan man long mekim disisen, olsem ol i laikim wok bos bilong Jehova o ol i laikim wok bos bilong ol man. Yumi gat gutpela wok long helpim ol man husat i gat pasin daun na ol i ken mekim gutpela disisen. Klostu nau, long Armagedon, wok bos bilong Jehova bai pinisim na senisim gavman bilong ol man, em Satan i bin stiaim ol. (Dan. 2:44; KTH 16:16) Wok bos bilong ol man bai pinis, na Kingdom Bilong God bai mekim wok bos long olgeta hap bilong graun. Em nau, ol samting i kamap bai soim klia tru olsem i stret tru long Jehova i mekim wok bos.—Ritim KTH 21:3-5.
17. Wanem ol samting bai helpim ol man i gat pasin daun long mekim gutpela disisen long ol samting bilong wok bos?
17 Ol manmeri em ol i no mekim yet disisen long stap long sait bilong Jehova, ol i mas beten na skelim gut ol blesing em wok bos bilong God bai givim long ol man. Wok bos bilong ol man i no inap stretim hevi bilong pasin raskol, na pasin teroris tu. Wok bos bilong God bai pinisim olgeta man nogut long graun. (Sng. 37:1, 2, 9) Wok bos bilong ol man i bin kamapim planti pait, tasol wok bos bilong God bai “mekim i dai pait long olgeta hap graun.” (Sng. 46:9) Em nau, wok bos bilong God bai kamapim bek pasin pren namel long ol man na ol animal! (Ais. 11:6-9) Aninit long wok bos bilong ol man, oltaim ol man i stap rabis na ol i stap hangre, tasol wok bos bilong God bai pinisim ol dispela hevi. (Ais. 65:21) Maski sampela hetman bilong graun ol i laik tru long helpim sindaun bilong ol man, ol i no inap long pinisim hevi bilong sik na dai; tasol aninit long wok bos bilong God, ol lapun na ol sikman bai amamas long kamap yangpela gen na kisim bek strong. (Jop 33:25; Ais. 35:5, 6) Graun bai kamap olsem ples paradais na ol daiman tu bai kirap bek.—Lu. 23:43; Ap. 24:15.
18. Olsem wanem yumi inap kamapim klia olsem yumi bilip tru olsem wok bos bilong God em i nambawan tru?
18 Yes, wok bos bilong God bai pinisim olgeta hevi em Satan i bin kamapim taim em i pulim tupela namba wan tumbuna bilong yumi long givim baksait long Man Bilong Wokim ol. Na tingim tu olsem Satan i bin kamapim ol hevi insait long 6,000 yia samting, tasol long rot bilong Krais, God bai pinisim olgeta dispela hevi insait long 1,000 yia! Dispela em nambawan rot tru bilong kamapim klia olsem wok bos bilong God i winim tru wok bos bilong ol man! Yumi stap olsem ol Witnes bilong God bilong yumi, na yumi orait long em i stap olsem King bilong yumi. Olsem na long olgeta wan wan de na aua long i stap bilong yumi, yumi mas kamapim klia olsem yumi lotuim Jehova, na stap aninit long Kingdom bilong em, na yumi amamas tru long i stap olsem ol Witnes bilong em. Na long taim ol man i redi long putim yau, yumi mas tokim ol olsem wok bos bilong Jehova em i nambawan tru.
Yumi Kisim Wanem Save Long Wok Bos Bilong God Taim Yumi Ritim . . .
• Lo 7:7, 8?
• Hibru 13:17?
• KTH 21:3-5?
[Ol Piksa long pes 29]
Oltaim Jehova i bin strongim wok bos bilong em
[Piksa long pes 31]
Pasin bilong i stap daun long wok bos bilong God bai helpim yumi long i stap wanbel long olgeta hap