Pilim Tru Pasin Bilong Jehova Long Stap Gut Long Yumi na Fogivim Yumi

1, 2. (a) Bilong wanem yumi mas laikim tru ol pren husat i gat pasin bilong i stap gut long yumi na lusim rong bilong yumi? (b) Yumi bai bekim wanem ol askim long dispela stadi?

LONG tingting bilong yu, pren tru bai i gat wanem kain ol pasin? Wanpela sista nem bilong em Ashley, em i tok pren tru bai redi oltaim long helpim na fogivim yu taim yu mekim ol popaia. Yumi olgeta i laikim tru ol kain pren olsem. Ol i helpim yumi long pilim olsem yumi stap gut na ol narapela i laikim tru yumi.—Snd. 17:17.

² Jehova em nambawan gutpela Pren husat i stap gut long yumi na lusim rong bilong yumi. Man bilong raitim song i tok: “Bikpela, yu gutpela tru na yu save rausim sin bilong mipela. Yu save laikim tumas olgeta manmeri i save beten long yu.” (Sng. 86:5) Man husat i gat pasin bilong stap gut long ol narapela na lusim rong bilong ol, em i save bihainim wanem ol pasin? Olsem wanem Jehova i soim ol dispela gutpela pasin? Na olsem wanem yumi ken bihainim pasin bilong em? Taim yumi kisim save long bekim bilong ol dispela askim, pasin laikim bilong yumi long dispela gutpela Pren bilong yumi, Jehova, bai kamap strong moa. Dispela bai helpim yumi long pas gut moa wantaim ol bratasista bilong yumi.—1 Jon 4:7, 8.

JEHOVA I STAP GUT LONG YUMI

3. Man i gat pasin bilong stap gut long narapela, em i save bihainim wanem ol pasin?

³ Man inap stap gut long wanpela sapos em i laikim em tru. Oltaim em bai helpim na sambai long dispela man. Em i save mekim olsem long gutpela taim na long taim nogut tu. Baibel i kolim Jehova olsem “Man i save stap gut long ol manmeri bilong [em].” Jehova tasol i winim tru olgeta narapela man long pasin bilong i stap gut long narapela.—Rev. 16:5.

4, 5. (a) Olsem wanem Jehova i soim olsem em i gat pasin bilong i stap gut long ol narapela? (b) Taim yumi tingim pasin bilong Jehova long stap gut long ol wokman bilong em, olsem wanem dispela i strongim yumi?

⁴ Olsem wanem Jehova i soim olsem em i gat pasin bilong i stap gut long ol narapela? Oltaim em i save sambai long ol man husat i stap gut long em. Wanpela bilong ol em King Devit, em i givim biknem long Jehova, long wanem, Jehova i no lusim em, i olsem em i stap gut long Devit. (Ritim 2 Samuel 22:26.) Taim Devit i karim hevi, Jehova i stap gut long em na stiaim, lukautim, na helpim Devit long abrusim bagarap. (2 Sml. 22:1) Ol samting i painim Devit i helpim em long luksave olsem Jehova i truim tok bilong em long helpim ol wokman bilong em. Bilong wanem Jehova i bin stap gut long Devit? Long wanem, Devit i bin stap gut long Jehova. Jehova i laikim tru ol man husat i stap gut long em, na em tu i save stap gut long ol.—Snd. 2:6-8.

⁵ Taim yumi tingim pasin bilong Jehova long stap gut long ol wokman bilong em, dispela i save strongim tru yumi. Wanpela brata nem bilong em Reed, em i tok em i save amamas long ritim ol stori long ol samting Jehova i mekim bilong helpim Devit long taim bilong hevi. Brata Reed i tok: “Taim Devit i ranawe long birua na em i hait insait long hul bilong ston, oltaim Jehova i sambai long em. Dispela stori i save strongim mi tru! Em i kirapim mi long tingim olsem maski wanem kain hevi i painim mi, na i luk olsem i no gat wanpela i stap bilong helpim mi, Jehova bai sambai long mi sapos mi yet i stap gut long em.” Ating yu tu i pilim olsem.—Rom 8:38, 39.

6. Wanem ol narapela rot we Jehova i soim olsem em i gat pasin bilong i stap gut long ol narapela? Olsem wanem em i helpim ol wokman bilong em?

⁶ Wanem ol narapela rot we Jehova i soim olsem em i gat pasin bilong i stap gut long ol narapela? Wanpela rot em olsem, oltaim Jehova i save bihainim ol lo bilong em. (Ais. 46:4) Ol lo bilong em i save stiaim olgeta disisen em i mekim, na ol lo bilong em i no save senis. (Mal. 3:6) Narapela rot em olsem, oltaim em i save truim ol tok promis bilong em. (Ais. 55:11) Jehova i gat pasin bilong i stap gut long ol narapela, olsem na em i save helpim olgeta wokman husat i stap gut long em. Em i helpim ol olsem wanem? Taim yumi givim bel tru long bihainim ol lo bilong Jehova, yumi ken bilip tru olsem em bai truim tok promis bilong em long helpim yumi long i stap gut.—Ais. 48:17, 18.

BIHAINIM PASIN BILONG JEHOVA LONG STAP GUT LONG NARAPELA

7. Wanem wanpela rot we yu inap bihainim pasin bilong Jehova long stap gut long ol narapela?

⁷ Olsem wanem yumi inap bihainim pasin bilong Jehova long stap gut long ol narapela? Wanpela rot em olsem, yumi ken helpim ol man husat i gat hevi. (Snd. 3:27) Olsem: Sapos yu save long wanpela brata o sista husat i bel hevi, long wanem, em i sik, famili i birua, o em i mekim sampela rong, orait yu ken mekim ol “gutpela tok . . . bilong mekim bel bilong en i stap isi.” (Sek. 1:13)a Taim yu mekim olsem, yu soim olsem yu stap pren tru husat i stap gut long narapela, na yupela i “pas gut na i wanbel” na pasin bilong yupela “i winim pasin namel long tupela brata.”—Snd. 18:24.

8. Olsem wanem yumi inap soim olsem yumi stap gut long poroman marit?

⁸ I gat ol narapela rot bilong soim olsem yumi gat pasin bilong i stap gut long ol lain em yumi laikim tru. Olsem: Sapos yumi marit, yumi save olsem yumi mas stap gut long poroman marit. (Snd. 5:15-18) Olsem na yumi mas abrusim pasin adaltri, na yumi mas mekim sampela samting moa. Yumi mas abrusim tu olgeta kain samting we inap pundaunim yumi long mekim pasin adaltri. (Mat. 5:28) Na tu, bilong soim olsem yumi stap gut long ol bratasista, yumi no ken mekim ol tok i bagarapim ol o mekim ol tok giaman long ol. Na yumi bai i no laik putim yau taim ol narapela i mekim ol kain tok olsem.—Snd. 12:18.

9, 10. (a) Em i bikpela samting moa long yumi mas stap gut long husat? (b)Yu ting olgeta taim bai isi long yumi bihainim tok bilong Jehova? Stori long wanpela eksampel.

⁹ Em i bikpela samting moa long yumi mas stap gut long Jehova. Olsem wanem yumi ken stap gut long em? Yumi mas laikim samting Jehova i laikim na heitim samting Jehova i heitim. Yumi mas bihainim pasin em Jehova i amamas long en. (Ritim Song 97:10.) Taim yumi kisim sampela save moa long tingting bilong Jehova, em bai isi moa long yumi bihainim ol tok bilong em.—Sng. 119:104.

¹⁰ Em tru olsem sampela taim bai i hatwok long yumi long bihainim tok bilong Jehova. Olsem na yumi mas taitim bun tru long stap gut long em. Olsem: Ating wanpela singel sista i laik marit, tasol em i no painim yet wanpela brata husat inap stap olsem gutpela poroman marit. (1 Kor. 7:39) Ol wanwok inap traim long painim wanpela long kamap boipren bilong em. Dispela sista inap pilim olsem em i stap wanpis stret. Tasol em i laik i stap gut long Jehova, olsem na em i mekim strongpela disisen olsem em i no inap prenim o maritim wanpela man husat i no lotuim God. Ol Kristen husat i bihainim wankain pasin olsem dispela sista, ol i stap olsem gutpela eksampel long pasin bilong stap gut long God. Jehova bai blesim olgeta man husat i mekim yet wok bilong em maski sampela samting i putim bikpela hevi long ol.—Hib. 11:6.

JEHOVA I SAVE LUSIM RONG BILONG OL MAN

11. Man i gat pasin bilong lusim rong, em bai mekim wanem?

¹¹ Man i gat pasin bilong lusim rong, em bai mekim wanem? Em bai i no inap holim yet bel kros long ol narapela husat i rongim em. Dispela i no makim olsem em i orait long rong ol i mekim o em i giaman olsem dispela rong i no bin kamap, nogat. Em i no laik holim yet bel kros. Wanpela gutpela pasin tru bilong Jehova em olsem, em i save lusim rong bilong ol man. Baibel i tok olsem Jehova i save “rausim sin” bilong ol man husat i tanim bel tru.—Sng. 86:5.

12. (a) Jehova i save lusim rong bilong yumi i go inap long wanem mak? (b) Taim Pita i tok God i “tekewe” sin bilong man, dispela i makim wanem samting?

¹² Jehova i save lusim rong bilong yumi i go inap long wanem mak? Baibel i tok, Jehova “i save marimari moa yet.” Dispela i makim olsem em i save lusim tingting olgeta na i no tingim moa ol rong bilong yumi. (Ais. 55:7) Olsem wanem yumi save olsem Jehova i save lusim tingting olgeta long ol rong bilong yumi? Tingim tok promis i stap long Aposel 3:19. (Ritim.) Aposel Pita i tok sapos wanpela sinman i tanim bel tru, dispela i makim olsem em i sori tru long ol rong em i bin mekim. Taim wanpela man i mekim sin, em i mas mekim wanem na bai Jehova i lusim rong bilong em? Pita i tok em “i mas tanim bel na senisim pasin” bilong em. Man husat i tanim bel tru, em bai mekim disisen olsem em bai i no inap mekim gen wankain rong. (2 Kor. 7:10, 11) Em bai senisim pasin, olsem em i lusim pasin em i mekim na em i mekim olgeta samting em inap mekim bilong amamasim God. Taim em i mekim olsem, God bai “tekewe” sin bilong em. Tekewe i makim pasin bilong klinim o rausim wanpela samting. Olsem na taim Jehova i lusim ol rong bilong yumi, i olsem em i rausim ol sin bilong yumi. Taim Jehova i lusim rong bilong man, em bai lusim tingting olgeta.—Hib. 10:22; 1 Jon 1:7.

13. Taim Jehova i tok, “Bai mi lusim sin bilong ol na mi no ken tingim moa,” dispela i givim wanem skul long yumi?

¹³ Taim Jehova i lusim ol rong bilong yumi, olsem wanem yumi save olsem em i no tingim moa? Yumi inap kisim save long pasin bilong Jehova long lusim rong taim yumi skelim wanpela tok profet em Jeremaia i mekim long ol Kristen em God i makim. (Ritim Jeremaia 31:34.) Jehova i tok: “Bai mi lusim sin bilong ol na mi no ken tingim moa.” Olsem na taim Jehova i lusim rong bilong yumi, em i no save tingim yet ol dispela rong na bai oltaim em i ken sutim tok o givim strafe long yumi, nogat. Taim em i lusim ol rong bilong yumi, em i no save tingim moa.—Rom 4:7, 8.

14. Taim yumi tingim tingim long bel pasin bilong Jehova long lusim rong bilong yumi, olsem wanem dispela inap mekim gut bel bilong yumi? Stori long wanpela eksampel.

¹⁴ Taim yumi tingim tingim long bel pasin bilong Jehova long lusim rong bilong yumi, dispela inap mekim gut bel bilong yumi. Yumi ken stori long wanpela sista nem bilong em Elaine. Inap planti yia i go pinis kongrigesen i bin rausim em. Bihain long sampela yia, kongrigesen i kisim em bek. Elaine i tok, em i no bilip olsem Jehova i lusim rong bilong em. Em i pilim olsem Jehova i no laikim em tumas wankain olsem em i laikim ol narapela. Tasol taim Elaine i tingim tingim long bel ol tok Baibel i mekim long pasin bilong Jehova long lusim rong, dispela i mekim gut bel bilong em. Olsem: Em i ritim long Baibel olsem taim Jehova i lusim rong bilong yumi, dispela i kain olsem Jehova i wasim sin bilong yumi na yumi kamap klin. Olsem na i no gat as long yumi bel hevi long laip olgeta bilong yumi long rong yumi bin mekim.b Elaine i tok moa olsem: “Mi luksave olsem mi no bin bilip olsem Jehova inap lusim tru ol rong bilong mi, na mi ting mi bai stap bel hevi long laip olgeta bilong mi. Mi save olsem sampela haptaim bai lus, tasol mi stat long pilim nau olsem mi inap tru long go klostu moa long Jehova, na i kain olsem mi bin karim wanpela samting i hevi tru na wanpela i bin apim na rausim dispela samting.” Tru tumas, Jehova i laikim tru yumi na em i gat pasin bilong lusim rong bilong yumi!—Sng. 103:9.

BIHAINIM PASIN BILONG JEHOVA LONG LUSIM RONG

15. Olsem wanem yumi inap bihainim pasin bilong Jehova long lusim rong bilong ol narapela?

¹⁵ Yumi inap bihainim pasin bilong Jehova taim yumi tu i lusim rong bilong ol narapela. (Ritim Luk 17:3, 4.) Tingim: Taim Jehova i lusim rong bilong yumi, em i no save tingim yet rong bilong yumi. Olsem na taim yumi lusim rong bilong ol narapela, yumi tu i no ken tingim yet rong bilong ol na kolim gen long bihain.

16. (a) Taim yumi lusim rong bilong ol narapela, dispela i makim wanem samting? Na em i no makim wanem samting? (b) Yumi mas mekim wanem sapos yumi laik bai Jehova i lusim rong bilong yumi?

¹⁶ Taim yumi lusim rong bilong ol narapela, dispela i no makim olsem yumi orait long ol rong ol i mekim o yumi amamas taim narapela i no mekim stretpela pasin long yumi. Nogat. Dispela i makim olsem yumi no laik holim yet bel kros long ol. Na tu, em i bikpela samting long tingim olsem sapos yumi laik bai Jehova i lusim rong bilong yumi, orait yumi tu i mas lusim rong bilong ol narapela. (Mat. 6:14, 15) Jehova i save olsem yumi sinman, em “i tingim yumi i olsem das tasol.” (Sng. 103:14) Olsem na taim ol narapela i mekim sampela tok o pasin we i rongim yumi, orait yumi mas tingim olsem ol tu i sinman wankain olsem yumi na yumi mas lusim rong bilong ol.—Efe. 4:32; Kol. 3:13.

17. Wanem samting inap helpim yu long lusim rong bilong man husat i rongim yu?

¹⁷ Em tru olsem sampela taim i hatwok long lusim rong bilong ol narapela. Long taim bilong Pol, sampela hevi i kamap namel long ol Kristen em God i bin makim, na ol tu i bin nidim helpim long stretim ol dispela hevi. (Fili. 4:2) Sapos wanpela brata o sista i mekim sampela samting i bagarapim bel bilong yu, orait wanem samting i ken helpim yu long lusim rong bilong em? Tingim samting i bin kamap long Jop. Elifas, Bildat, na Sofar ol inap long stap olsem ol gutpela pren bilong Jop. Tasol ol i krosim em na sutim tok olsem em i bin mekim ol pasin i no stret. Olsem na dispela i bagarapim tru bel bilong Jop. (Jop 10:1; 19:2) Bihain, Jehova i tokim dispela 3-pela man olsem ol i no mekim stretpela pasin, olsem na ol i mas go long Jop na givim ofa bilong tekewe sin bilong ol. (Jop 42:7-9) Tasol Jehova i tokim Jop tu long mekim wanpela samting. Jop i mas mekim wanem? Em i tokim Jop long beten long helpim ol dispela man. Jop i beten na em i lusim rong bilong ol dispela man, olsem na Jehova i blesim em. (Ritim Jop 42:10, 12, 16, 17.) Dispela stori inap givim wanem skul long yu? Taim yu pilim tru long bel na beten long helpim man husat i rongim yu, dispela inap helpim yu na bai yu no holim yet bel kros long dispela man.

KISIM SAVE YET LONG OL PASIN BILONG JEHOVA NA BIHAINIM

18, 19. Yumi mas wok yet long mekim wanem?

¹⁸ Yumi bin amamas tru long kisim sampela save moa long ol gutpela pasin bilong Jehova. Yumi bin kisim save olsem ol man i no pret long go long em, em i save mekim wankain pasin long olgeta man, em i gat pasin bilong givim samting, em i stap gut long ol manmeri bilong em, na em i gat pasin bilong lusim rong bilong ol man. Tasol i gat planti samting moa long Jehova em yumi no save yet long en. Bihain yumi bai amamas long kisim sampela save moa long em inap oltaim oltaim. (Sav. 3:11) Yumi wanbel long tok bilong aposel Pol, em i tok: “Olaman! Ol blesing na savetingting na save bilong God i daun tumas olsem solwara.” Yumi inap mekim wankain tok olsem long pasin laikim bilong God na ol narapela 6-pela pasin em yumi skelim pinis long ol dispela stadi.—Rom 11:33.

¹⁹ Olsem na yumi mas wok yet long kisim save long ol gutpela pasin bilong Jehova, tingim tingim long bel, na bihainim long i stap bilong yumi. (Efe. 5:1) Taim yumi mekim olsem, pasin laikim bilong yumi long Jehova bai kamap strong moa, na yumi bai pilim olsem yumi go klostu moa long em. Yumi bai wanbel moa yet long tok bilong man husat i raitim song olsem: “Mi stap klostu long yu na dispela i gutpela tru.”—Sng. 73:28.