Samting God i Mekim Bilong Helpim Yu

Planti man i save long dispela skripsa bilong Baibel na planti buk samting i kamapim tok bilong en. Ol man i tok i nogat narapela hap long Baibel “i kamapim klia pasin laikim bilong God long ol man na rot bilong God i kisim bek ol.” Em as na long sampela kantri planti taim ol man i save yusim dispela skripsa o “Jon 3:16” long ol bikpela bung, long ol stika bilong kar, ol grafiti samting, na long ol narapela hap.

Ol man husat i raitim dispela tok ol i bilip olsem pasin laikim bilong God i opim rot long ol inap kisim laip oltaim. Olsem wanem long yu? Pasin laikim bilong God i mekim wanem long yu? Na yu ting God i mekim wanem bilong soim pasin laikim bilong em long yu?

“GOD I LAIKIM TUMAS OLGETA MANMERI”

Planti man i wanbel long tok olsem God i bin wokim ol samting long yunives, ol diwai na animal samting, na ol manmeri. Ol samting i gat laip ol i gat planti liklik samting long bodi bilong ol we i save wok gut tru, olsem na wanpela Man i gat bikpela save i mas wokim ol. Planti manmeri i save tenkyu long God long presen bilong laip long olgeta de. Ol i luksave tu olsem God i save lukautim ol long olgeta samting ol i nidim, Em i givim win, wara, kaikai, na ol samting i save helpim graun long i stap gut na bai ol man inap i stap laip na amamas long ol wok ol i mekim.

I stret yumi tenkyu long God long olgeta dispela samting, bikos em Man i bin Wokim yumi na Lukautim yumi. (Song 104:10-28; 145:15, 16; Aposel 4:24) Yumi inap pilim tru pasin laikim bilong God taim yumi tingim olgeta samting em i mekim na bai yumi ken stap laip. Aposel Pol i tok: “[God] i givim laip na win na olgeta samting long olgeta manmeri. Long rot bilong em yumi gat laip na yumi inap wokabaut na stap.”—Aposel 17:25, 28.

Tasol God i no kamapim pasin laikim long dispela rot tasol, nogat. Em i wokim yumi gutpela moa winim ol animal, na em i rispektim yumi na givim yumi laik bilong kisim save long em, na tu, em i helpim yumi long inapim dispela laik. (Matyu 5:3) Long dispela rot olgeta manmeri husat i daun long God ol inap stap insait long famili bilong Em, olsem “ol pikinini” bilong em.—Rom 8:19-21.

Olsem Jon 3:16 i tok, God i soim pasin laikim long yumi taim em i salim Pikinini bilong em, Jisas, i kam daun long graun bilong skulim yumi long God na Papa bilong em na em i dai bilong helpim yumi. Tasol planti man i no kliagut long wai Jisas i mas dai bilong helpim ol manmeri, na hau dai bilong Jisas i kamapim klia pasin laikim bilong God long yumi. Orait nau yumi ken skelim tok Baibel i mekim long as na Jisas i mas dai, na dai bilong em i mekim wanem samting long yumi.

“EM I GIVIM DISPELA WANPELA PIKININI”

Olgeta man i gat sin, olsem na yumi save sik, go lapun, na dai. Tasol dispela i no tingting bilong God Jehova long pastaim tru. Em i bin tokim namba wan man na meri olsem ol inap stap laip oltaim long Paradais long graun. Tasol i gat wanpela samting ol i mas mekim: Ol i mas bihainim tok bilong Em. God i tok sapos ol i no mekim olsem, ol bai dai. (Stat 2:17) Namba wan man i bikhet long wok bos bilong God, na long dispela rot dai i painim em na ol pikinini bilong em. Aposel Pol i tok: “Long rot bilong wanpela man tasol sin i kamap long graun. Na sin i bringim dai i kam. Na long dispela rot dai i painim olgeta manmeri, long wanem, olgeta i bin mekim sin.”—Rom 5:12.

God i “laikim tumas stretpela pasin.” (Song 37:28) Maski God i tingim rong bilong namba wan man, em i no tok olsem olgeta man i mas karim pen na hevi na dai long rong wanpela man tasol i bin mekim. Taim God i putim stiatok long man i mas [“bekim laip i bin lus,” NW] em i inapim stretpela lo bilong Em, na em i opim rot bilong ol man long kisim laip oltaim. (Kisim Bek 21:23) Askim nau em olsem, Olsem wanem yumi inap kisim bek laip i gutpela olgeta em Adam i bin lusim? Bekim em olsem: Wanpela man i mas ofaim o givim sakrifais em veliu bilong en i wankain olsem bilong Adam—em laip i gutpela olgeta.

Ol tumbuna pikinini bilong Adam ol i no gutpela olgeta, olsem na ol i no inap givim kain gutpela ofa, tasol Jisas inap mekim olsem. (Song 49:6-9) Jisas i no gat sin taim mama i karim em, em i gutpela olgeta wankain olsem Adam i bin gutpela olgeta paslain long em i mekim sin. Olsem na Jisas i givim laip bilong em long baim bek olgeta man long kalabus bilong sin. Taim em i mekim olsem em i opim rot long ol tumbuna pikinini bilong namba wan man na meri long ol i ken kisim laip i gutpela olgeta em Adam na Iv i bin lusim. (Rom 3:23, 24; 6:23) Yumi mas mekim wanem bilong kisim ol blesing i kam long bikpela pasin laikim bilong God?

“OLGETA MANMERI I BILIP LONG EM”

Taim yumi skelim gen tok bilong Jon 3:16, em i tok olsem “olgeta manmeri i bilip long em [Jisas] ol i no ken lus. Nogat. Bai ol i kisim laip i stap gut oltaim oltaim.” Dispela i makim olsem i no olgeta man bai kisim dispela presen bilong laip oltaim. Sapos yumi laik “kisim laip i stap gut oltaim oltaim” yumi mas bilip long Jisas na bihainim tok bilong em.

Ating bai yu tingting olsem: ‘Wanem samting i insait long pasin bilong bihainim tok? Jisas i tok, “olgeta manmeri i bilip long em” ol bai kisim laip oltaim.’ Tru tumas, yumi mas i gat bilip. Tasol em i bikpela samting tu long tingim olsem long Baibel pasin bilong bilip tasol long Jisas i no inap helpim yu, yu mas mekim sampela samting moa. Man i no inap tok tasol olsem em i bilip long Jisas olsem Seivia na bai God i orait long em. Em i mas wok strong long bihainim ol tok Jisas i skulim ol man long en. Sapos em i no mekim wanpela samting, orait bilip bilong em i olsem samting nating. Baibel i tok: “Bilip i no kamapim ol gutpela wok, dispela bilip i dai pinis.” (Jems 2:26) Olsem na man i bilip long Jisas em i mas mekim ol samting bilong soim olsem em i bilip.

Pol i tok: “Pasin laikim bilong Krais i kirapim mipela, long wanem, mipela i save pinis olsem wanpela man [Jisas] i dai bilong helpim olgeta man . . . Em i mekim olsem bai ol man i stap laip ol i no ken bihainim laik bilong ol yet, nogat. Ol i mas bihainim laik bilong dispela man husat i kisim ples bilong ol na i dai na i kirap bek tu.” (2 Korin 5:14, 15) Taim yumi tingim olsem Jisas i dai bilong helpim yumi, dispela i mas kirapim yumi long mekim ol senis long laip bilong yumi, olsem daunim ol laik bilong yumi yet na bihainim Jisas. Yumi mas mekim ol samting em Jisas i skulim yumi long en na putim ol dispela samting i stap nambawan long laip bilong yumi. Kain senis olsem inap mekim sampela samting long ol pasin, ol disisen, na olgeta narapela samting yumi mekim. Ol man husat i bilip long Jisas bai kisim wanem blesing?

“OL I NO KEN LUS. NOGAT. BAI OL I KISIM LAIP I STAP GUT OLTAIM OLTAIM”

Laspela hap bilong Jon 3:16 i kamapim tok promis bilong God long ol manmeri husat i bilip long ofa bilong Krais na ol i bihainim ol lo bilong God. God i laik bai ol bilipman olsem “ol i no ken lus. Nogat. Bai ol i kisim laip i stap gut oltaim oltaim.” Dispela pasin laikim bilong God i helpim tupela kain lain em ol bai mekim narapela narapela wok long bihain.

Jisas i tok promis long namba wan lain ol bai kisim laip oltaim long heven. Em i tokim ol disaipel bilong em olsem em bai redim wanpela hap bilong ol na bai ol i kisim biknem na wok king wantaim em. (Jon 14:2, 3; Filipai 3:20, 21) Ol man husat bai kirap bek na kisim laip long heven, “ol bai stap pris bilong God na bilong Krais, na ol bai mekim wok king wantaim em inap 1,000 yia.”—Revelesen 20:6.

Liklik lain Kristen tasol bai kisim dispela blesing. Jisas i tok: “Yupela liklik lain sipsip, yupela i no ken pret. Papa bilong yupela i orait long givim Kingdom long yupela.” (Luk 12:32) Hamas manmeri i insait long dispela “liklik lain sipsip”? Revelesen 14:1, 4 i tok: “Mi lukluk i stap na mi lukim Pikinini Sipsip [Jisas Krais husat i kirap bek pinis] i sanap antap long Maunten Saion [long heven], na 144,000 manmeri i sanap wantaim em. Nem bilong en na nem bilong Papa bilong en i stap long poret bilong ol. . . . God i bin baim bek ol namel long ol manmeri na ol i stap olsem namba 1 kaikai i redi long gaden, na ol i bilong God na Pikinini Sipsip.” Taim yumi skelim namba bilong ol wantaim planti bilion manmeri husat i stap long graun, dispela 144,000 manmeri ol i “liklik lain sipsip” tasol. Ol bai mekim wok olsem ol king, olsem na ol bai bosim husat?

Jisas i stori long namba tu lain em ol i stap gut long God, ol bai kisim ol blesing i kam long Kingdom bilong heven. Long Jon 10:16, Jisas i tok: “Mi gat ol arapela sipsip, na ol i no bilong dispela banis. Mi mas bringim ol tu i kam, na ol bai putim yau long nek bilong mi. Na olgeta bai kamap olsem wanpela lain sipsip i gat wanpela wasman.” Ol dispela “sipsip” i amamas long ol bai kisim laip oltaim long graun long bihain, em samting Adam na Iv i kisim long pastaim. Hau na yumi save olsem ol bai kisim laip oltaim long graun?

Planti taim Baibel i stori long i stap bilong ol man bai olsem wanem taim Paradais i kamap long graun. Sapos yu laik kisim save long dispela, yu ken ritim ol dispela skripsa long Baibel bilong yu: Song 37:9-11; 46:8, 9; 72:7, 8, 16; Aisaia 35:5, 6; 65:21-23; Matyu 5:5; Jon 5:28, 29; Revelesen 21:4. Ol dispela skripsa i tok profet long ol woa, bikpela hangre, sik, na dai bai pinis. Ol i stori olsem bai i gat wanpela taim we ol man bai bildim haus bilong ol yet, wokim gaden long graun bilong ol yet, na mekim bikpela long ol pikinini bilong ol namel long ol man i stap wanbel.a Yu laik stap long kain ples olsem? I gat gutpela risen na yumi ken bilip tru olsem ol dispela promis klostu nau ol bai kamap tru.

GOD I MEKIM PLANTI SAMTING BILONG HELPIM YUMI

Taim yu tingim olgeta samting God i bin mekim bilong helpim yu na olgeta manmeri, i klia tru olsem em i mekim planti samting tru. Yumi stap laip, yumi gat gutpela save, gutpela helt, na olgeta samting yumi nidim bilong i stap laip. Olsem yumi lainim long Jon 3:16, bikpela samting em God i opim rot long yumi ken kisim planti gutpela blesing taim em i salim Jisas i kam dai bilong baim bek yumi.

Yu inap i stap amamas tru na kisim planti blesing long bihain taim yu kisim laip oltaim long wanpela gutpela ples we ol manmeri i stap wanbel, i no gat sik, woa, bikpela hangre, na dai i pinis olgeta. I gat sampela samting yu mas mekim bilong kisim ol dispela blesing. Bikpela askim nau em, Yu mekim wanem bilong tingim God?