Mekim Ol Baibel-Stadi Long Buk Stap Oltaim
1 Wanpela meri i stori long buk Stap Oltaim olsem: “Dispela buk i olsem namba tu long Baibel—winim ol narapela buk mi bin kaunim. Ol tok bilong en i stret na i kirapim mi long mekim wok!” Yumi olgeta i wanbel olsem dispela buk em i wanpela gutpela buk tru i winim olgeta narapela buk—buk hia i helpim ol man long save long ol tok bilong Baibel na i kirapim ol long kamap man bilong litimapim nem bilong Jehova.
2 Long yia 1982, em yia yumi kisim buk Stap Oltaim (tok Inglis), long Papua Niugini inap olsem 1,460 pablisa i bin mekim 1,525 Baibel-stadi. Long nau, inap olsem 2,957 pablisa i mekim 4,562 Baibel-stadi. Kirap long 1982 i kam inap long nau ol i bin wokim 62 milion buk Stap Oltaim long 115 tok ples. Tru tumas, dispela buk i helpim tru wok bilong autim tok na lainim ol man long olgeta hap bilong graun!
3 Putim Sampela Mak Yu Laik Winim: Jehova i bin mekim gut long ol manmeri long lain bilong em na ol i gat bikpela laik long helpim ol narapela long kisim save long ol tok bilong Baibel em inap helpim man long kisim laip oltaim. Ol dispela samting i mekim na lain bilong Jehova i go bikpela tru. (Ro 10:13-15; 1 Ti 2:4) Yumi save taim i sot pinis na yumi mas wok strong long autim tok bilong Kingdom.
4 Oganaisesen bilong Jehova i wok long kamap strong, tasol olsem wanem long yumi ol wan wan? Yumi gat strongpela tingting long mekim bikpela wok long kamapim ol disaipel? Bilong mekim olsem, yumi mas putim sampela mak yumi yet i laik winim. Olsem wanem? Yumi inap wok strong moa long go bek lukim ol man i laik harim tok? Long mun Epril na Me, gutpela sapos yumi wok long kirapim wanpela nupela Baibel-stadi na putim dispela olsem wanpela mak bilong winim.
5 Husat i Ken Mekim Baibel-Stadi?: Planti pablisa, em pasin na sindaun bilong ol i narapela narapela, ol i kisim bikpela amamas taim ol i mekim Baibel-stadi long buk Stap Oltaim. Ol tok bilong en i no hatwok long save long en, olsem na i no hatwok long mekim ol Baibel-stadi long dispela buk—ol nupela pablisa tu ol inap insait long dispela bikpela wok. Na tu, planti bilong yumi i bin stadi long dispela buk long stadi bilong yumi yet, olsem na yumi save gut long ol tok bilong en. Wanpela pablisa, taim em i no kirap yet long mekim wok long buk Stap Oltaim, em i no gat wanpela Baibel-stadi, na em i tok: “Nau mi mekim 3-pela Baibel-stadi na klostu bai mi kirapim namba 4 stadi. Mi tenkyu tru olsem dispela buk i no hatwok long mekim Baibel-stadi long en.”
6 Ol yangpela tu i save mekim planti Baibel-stadi long rot bilong buk Stap Oltaim. Wanpela yangpela brata i save larim dispela buk i stap antap long tebol bilong em long skul. Dispela i bin opim rot long em long toktok wantaim ol narapela i bin lukim dispela buk, na long kirapim sampela Baibel-stadi. Sampela yangpela, taim ol i autim tok long ol man long haus na bungim ol papamama, ol i save tokim ol, ol i laik stadi wantaim pikinini bilong ol long Baibel. Maski ol pikinini bilong yumi i yangpela tru, ol inap toktok wantaim ol narapela long tok promis Jehova i bin mekim, olsem man inap stap oltaim long paradais long graun.
7 Maski yumi yangpela o lapun, yumi olgeta i amamas long mekim Baibel-stadi. Olsem na gutpela sapos yumi ol wan wan i beten askim Jehova long helpim yumi, na taim rot i op yumi autim tok. Mekim wok long buk Stap Oltaim bilong helpim ol narapela long kisim save long ol samting ol i mas mekim na bai ol tu inap litimapim nem bilong God bilong yumi, em Jehova.—Sng 148:12, 13.
[Ol Askim]
1. Inap planti yia pinis, buk Stap Oltaim i mekim wanem wok?
2. Wanem samting i mekim na dispela buk i helpim tru wok bilong autim tok na lainim ol man long olgeta hap bilong graun?
3. (a) Wanem samting i mekim na lain bilong Jehova i go bikpela? (b) Kaunim 1 Timoti 2:4. Yumi ken mekim wanem bilong helpim ol man na bai God i “kisim bek” ol?
4, 5. Bilong wanem i no hatwok tumas long mekim Baibel-stadi long buk Stap Oltaim?
6. (a) Wanpela yangpela pablisa i bin mekim wanem bilong kirapim sampela Baibel-stadi? (b) Olsem wanem? Yupela ol yangpela pablisa i bin traim kirapim sampela Baibel-stadi long dispela rot?
7. Kaunim Song 148:12, 13. Olsem wanem buk Stap Oltaim inap helpim yumi olgeta long ‘litimapim nem bilong Jehova’?