Amamas Long Pikinini Bilong Jehova!
1 Long Sande, Nisan 9, long yia 33, wanpela bikpela lain manmeri i holim han bilong diwai pam na ol i amamas long namba wan Pikinini bilong God, em Bikpela Krais Jisas, em i “dispela king i kam long nem bilong Bikpela.” (Lu 19:38; Hi 1:6) Long Mande na Tunde, em Nisan 10 na 11, Jisas i bin wok strong tru long autim tok, olsem na long ol dispela laspela de em i mekim bikpela wok tru.
2 Long nau, wanpela lain i bikpela moa i holim samting i makim ol lip bilong diwai pam na ol i singaut strong olsem: “God bilong yumi em i save sindaun long sia king bilong en, na Pikinini Sipsip, tupela tasol i save kisim bek yumi na mekim yumi i stap gut.” (KTH 7:9, 10) Long Mas 26 bai yumi bung bilong mekim Memorial bilong i dai bilong Krais. Nau dispela bikpela de i kam klostu moa, na olsem wanem, bai yumi inap wok strong moa long autim tok na dispela bai litimapim nem bilong Jehova?
3 Mekim Moa Yet Wok Autim Tok: Planti pablisa i mekim wok painia haptaim long mun Mas. Olsem wanem? Yu laik mekim wantaim ol long nau o long mun Epril? Sapos yu laik mekim, kwiktaim putim aplikesen bilong yu. Wanpela bilong ol elda bai amamas long bekim sampela askim bilong yu long dispela wok. Bilong mekim wok autim tok i gutpela sapos yu gat sampela bilong dispela buk bilong tilim long dispela mun, em buk Sampela Askim Bilong Ol Yangpela—Ol Gutpela Bekim.
4 Maski yu inap mekim wok painia haptaim o nogat, ating yu laik mekim bikpela wok bilong autim tok long mun Mas na Epril. Sapos inap kongrigesen bai stretim rot bilong mekim bung bilong autim tok long olgeta de long mun Mas, na ol i mas redim teritori bilong mekim dispela wok.
5 Olgeta kongrigesen i mas mekim bung bilong autim tok long Sarere, Mas 26. Maski i gat planti wok long redim ol samting bilong Memorial, gutpela sapos olgeta brata, em ol inap long mekim, ol i ken autim tok long Sarere long moningtaim. Autim tok long ol haus, na tu kisim save, ol man yu bin singautim ol long kam long Memorial ol i gat rot long kam, na ol i save gut long taim na ples bilong bung.
6 Singautim Ol na Strongim Bel Bilong Ol Narapela: Jisas i tokim ol man i bihainim em: “Yupela i mas mekim olsem bilong tingim mi.” (1 Ko 11:24) Ol disaipel bilong Krais, em God i makim ol long spirit holi, ol i bihainim dispela tok. Tasol olgeta wokboi bilong Jehova i mas go long Memorial bilong tingim dispela samting. Gutpela yu singautim sampela olsem ol Baibel-stadi, na ol wanblut, na ol man yu bin toktok wantaim ol long Baibel, na poroman marit bilong yu i no Witnes, na ol wanwok. Mekim wanpela lista na bai yu no ken lusim tingting long wanpela man.
7 Long taim bilong Memorial bai i gat narapela rot tu long strongim bel bilong man i laik harim tok i tru. Wok strong long kam hariap long miting na bai yu inap long sekanim ol man i kam long namba wan taim. Sapos planti Baibel-stadi bilong yu i kam, ating i gutpela sapos narapela pablisa i sindaun wantaim sampela long taim bilong miting. Singautim ol nupela man long kam long Miting Bilong Pablik-Tok. Elda em ol i makim bilong mekim pablik-tok i mas redim gut tok na mekim long pasin i kirapim tingting bilong man.
8 Long pinis bilong bung bilong Memorial bai yumi olgeta i mekim singsing 105, em “Amamas Long Pikinini Bilong Jehova,” na ating bai yumi amamas long tingim bikpela wok bilong God yumi mekim long dispela mun bilong litimapim nem bilong Jehova.
[Ol Askim]
1. Stori long ol samting i bin kamap long Nisan 9 i go inap Nisan 11 long yia 33.
2. Paslain long Memorial yumi mas strong long mekim wanem wok?
3. Long wanem gutpela rot yumi ken mekim moa yet wok autim tok?
4. Kongrigesen inap mekim wanem bilong helpim olgeta pablisa long mekim moa yet wok autim tok?
5. (a) Long Sarere, Mas 26, olgeta kongrigesen i mas stretim rot long mekim wanem samting? (b) Olsem wanem yumi ken helpim ol man yumi bin singautim ol long kam long Memorial?
6. Yumi inap singautim husat long kam long Memorial?
7. Olsem wanem yumi ken helpim ol man i laik harim tok long kam long Memorial?