Mekim Ol Samting Bambai Miting Bilong Pablik-Tok i Helpim Yumi
1 Sampela yia i go pinis wanpela yangpela man i bin painim wanpela pepa i singautim ol man long kam long ol miting bilong kongrigesen. Em i laik painim tok i tru, olsem na long dispela Sande yet em i go long Miting Bilong Pablik-Tok. Em i kam paslain tru long miting i kirap. Wanpela pablisa i tok gude long em na taim ol i stori wantaim, pablisa i tok em i laik stadi wantaim em long Baibel. Tasol man hia i no laik. Tasol taim em i harim pinis gutpela pablik-tok em i senisim tingting bilong em na em i orait long stadi long Baibel. Dispela yangpela man i kisim kwik tok i tru na sampela mun bihain em i baptais. Dispela ekspiriens i ken lainim yumi long 3-pela samting.
2 Namba 1: Ol i toksave long ol miting bilong kongrigesen. Yu save mekim wok long pepa bilong singautim ol man long kam long Miting Bilong Pablik-Tok bilong kongrigesen bilong yu? Taim siaman i toksave long nem bilong pablik-tok i kamap long wik bihain, tingim ol man long teritori bilong yu, em yu ting ol i gat laik tru long harim dispela tok, maski nau ol i kaunim ol magasin samting bilong yumi o nogat. Sampela man i no amamas long kaunim, o ol i no save gut long kaunim, tasol ol i amamas long harim wanpela tok i stori long samting bilong Baibel.
3 Namba 2: Ol i mekim gut long man i kam namba wan taim long miting. Sapos yu tingting strong long kamap long Haus Kingdom kwiktaim, taim miting i no kirap yet, bai yu inap pren gut wantaim ol brata sista na ol man i laik harim tok i tru. (Hi 10:24) Sapos nupela man i kam long namba wan taim, ating em i no save wanem samting bai i kamap. Tokim em ol miting bilong yumi i kirap wantaim singsing na beten, na wanem samting bai kamap long miting. Sapos yu ting i gutpela, tokim em long sindaun wantaim yu na em i ken lukim Baibel na buk singsing bilong yu. Na tokim em, sapos em i gat sampela askim, bihain long miting bai yu toktok wantaim em long ol.
4 Namba 3: Ol i redim gut tok. Ol brata i mekim pablik-tok long kongrigesen i save lusim planti aua bilong redim dispela tok. Ol i mekim olsem bilong kirapim ol man i harim tok long laikim tru ol narapela man na mekim ol gutpela pasin long ol. Long nau yumi olgeta i mas karim hevi, na ol gutpela tok i tru bilong Baibel i helpim yumi long sanap strong. Tasol maski dispela pablik-tok i kamapim ol gutpela tok, sapos yumi no putim gut yau bai ol dispela tok i no inap helpim yumi. Olsem wanem? Sampela taim tingting bilong yu i wokabaut long taim bilong pablik-tok? Sapos yumi raitim sampela hap tok long pepa, olsem yumi save mekim long kibung, dispela inap helpim yumi. Gutpela yu lukim Baibel bilong yu na kaunim ol skripsa em brata i kamapim na stori long en.
5 Sosaiti i bin redim ol pablik-tok i stori long kain kain samting bilong Baibel. Ol elda i wok wantaim wasman siaman o wanpela brata em i makim, na ol i skelim wanem ol pablik-tok i gutpela bilong helpim tru kongrigesen. No ken lusim wanpela Miting Bilong Pablik-Tok, long wanem, ol dispela bikpela tok i bilong helpim yumi.