Ol Gutpela Bung Bilong i Go Autim Tok
1 Luk 10:1-11 i stori long wanpela bung Jisas i mekim wantaim ol 70 disaipel bilong em, em nau tasol em i bin makim ol long go autim tok, na em i laik helpim ol long redi long dispela wok. Em i givim sampela tok long ol bilong helpim ol long stretim gut wok bilong ol, na long redim ol tok ol i laik mekim, na save long samting ol i mas mekim long taim man i kros samting. Sapos yumi skelim ol dispela ves, dispela inap lainim yumi long sampela samting.
2 Olgeta 70 disaipel i stap long dispela bung Jisas i mekim wantaim ol. Sapos olgeta taim sampela brata sista i kam bihaintaim, bai taim i lus nating na brata i lukautim bung i mas makim gen husat bai wok wantaim husat na wanem hap teritori ol brata bai autim tok long en. Dispela inap pasim taim bilong olgeta long grup. Olsem na yumi olgeta wan wan i mas kam stret long taim ol i bin makim, na redi long lusim ples bung hariap na go stret long teritori.
3 Jisas i tokim ol disaipel long ol i mas autim tok bilong “kingdom bilong God.” (Lu 10:9) Yumi tu yumi mas autim wankain tok, na ating yumi amamas taim narapela i kamapim sampela gutpela tok yumi ken mekim wok long en. Brata i lukautim bung i ken kamapim sampela tok long buk Reasoning—buk i stori long 40 samting pasin bilong kirapim tok na sampela gutpela skripsa yumi ken kamapim long kain kain man. Em i ken kamapim wanpela o tupela tok yumi ken mekim wok long en, na dispela bai helpim yumi long tingim sampela tok yumi ken mekim na bai yumi no pret long toktok wantaim man bilong haus.
4 Jisas i tokim ol disaipel long tok ol i mas autim, na em i makim tu pasin bilong mekim dispela tok. (Lu 10:5, 6) Long Miting Bilong Wok Autim Tok i gat sampela soim bilong helpim yumi long kamapim gut tok. Brata i lukautim bung i ken stori long sampela soim i bin kamap long miting i go pinis, na helpim ol brata sista long save olsem wanem ol inap mekim wok long ol dispela soim long taim ol i autim tok long dispela de. Em i ken makim wanpela brata o sista long redi na mekim sotpela soim long pasin bilong mekim tok na kamapim tok bilong Baibel—dispela bai helpim yumi long tingim gut ol tok yumi laik mekim.
5 Na tu, Jisas i lainim ol disaipel bilong em long pasin olgeta wan wan i mas bihainim. (Lu 10:7, 8) Olsem tasol, ating brata i lukautim bung bai givim sampela tok long yumi bilong helpim yumi long abrusim sampela pasin em inap pasim man long harim tok bilong yumi. Ating bai em i tokim yumi long yumi no ken bung bung na sanap nating long rot o lusim nating taim na toktok wantaim ol man i birua long tok. Ating em bai kirapim tingting bilong yumi long yumi mas raitim sampela tok long notbuk samting na raitim stret ol dispela tok na tu, yumi mas kolim stret pe bilong ol samting yumi laik tilim long man bilong haus. Na ating em bai kirapim tingting bilong ol papamama long ol i mas was gut long ol pikinini bilong ol.
6 Ol 70 disaipel i bihainim ol tok em Jisas i bin givim long ol na bihain ol i “kam bek na ol i amamas tru.” (Lu 10:17) Sapos yumi bihainim ol tok yumi kisim long ol bung bilong i go autim tok, bai yumi tu inap kisim bikpela amamas moa long autim tok bilong Kingdom.—Ap 13:48, 49, 52.
[Ol Askim]
1. Sapos yumi skelim ol tok bilong Luk 10:1-11, dispela bai lainim yumi long wanem ol samting?
2. Taim yumi bung wantaim grup bilong i go autim tok, bilong wanem yumi mas kam stret long taim?
3. (a) Nambawan bikpela tok yumi autim em wanem samting? (b) Wanem samting i ken helpim yumi long mekim tok?
4. (a) Bilong wanem i gutpela sapos brata i lukautim bung em i stori gen long sampela soim i bin kamap long Miting Bilong Wok Autim Tok? (b) Wanpela brata o sista i ken mekim sotpela soim long wanem samting?
5. Kolim sampela samting ating brata i lukautim bung bai i tokim yumi long mekim.
6. Sapos yumi bihainim ol tok, wanem samting bai kamap?
This article is repeated in km 8/96.