Nau Em Taim
1 Taim aposel Pol i raitim namba tu pas long ol Korin, em i kirapim ol long tingim gen dispela gutpela wok ol i bin tingting long mekim bilong helpim ol wanbilip bilong ol long Jerusalem em ol i sot long ol samting. Tasol wanpela yia i lus pinis na ol i no pinisim yet dispela wok ol i bin kirap long mekim. Olsem na Pol i tok strong long ol olsem: “Orait nau i gutpela sapos yupela i wok strong long pinisim dispela wok. Bipo bel bilong yupela i kirap long mekim dispela wok, na olsem tasol nau yupela i ken hariap long pinisim.”—2 Ko 8:11.
2 Long sampela taim ating yumi olgeta i bin putim sampela mak long wok yumi laik winim. Ating yumi bin tingting long mekim bikpela wok moa long autim tok, o long save gut moa long ol brata, o long inapim mak bilong holim sampela wok insait long kongrigesen, o long lusim sampela pasin kranki. Pastaim yumi gat bikpela laik tru long winim mak yumi putim, tasol bihain, ating yumi no wok strong moa long inapim dispela mak. Yumi no tingim, na sampela wik o mun o yia i bin lus na yumi stap olsem tasol. Sapos olsem, orait, yumi mas bihainim tok bilong Pol na “wok strong long pinisim dispela wok,” a?
3 Winim Ol Mak Yumi Putim: I no hatwok long putim sampela mak yumi laik winim, tasol i hatwok liklik long inapim ol dispela mak. Sapos yumi no mekim kwik samting yumi tingting pinis long mekim, ating bai yumi no mekim. Taim yu tingting pinis long mekim wanpela samting, orait nau yu mas tingting strong long mekim kwiktaim—no ken lusim taim. Bikpela samting em yu mas stretim gut wok bilong yu. Makim hap taim bilong pinisim dispela wok—no ken mekim ol narapela wok long dispela taim. Na i gutpela sapos yu makim wanpela de stret bilong pinisim dispela wok, na nau yu mas bosim gut skin bambai yu inap mekim olsem.
4 Taim yumi hatwok long winim ol mak, ating yumi save tingting olsem: ‘Bihain bai mi mekim.’ Tasol yumi no save wanem samting bai kamap bihain. Sindaun 27:1 i tok: “Yu no ken hambak na promis bai yu mekim wanpela samting long tumora. Long wanem, yu no save wanem samting bai i kamap nau.” Disaipel Jems i toksave olsem, nogut yumi hambak na ting yumi inap tru long mekim ol samting, long wanem, “[yumi] no save wanem samting bai i kamap long tumora. . . . Sapos yu save pinis long wanpela gutpela pasin yu mas mekim, tasol yu no mekim, orait yu mekim sin.”—Je 4:13-17.
5 I gat planti samting bilong pulim nabaut tingting bilong yumi na planti samting ol narapela i tokim yumi long mekim, na dispela inap mekim na bai yumi no tingim tumas ol mak yumi yet i laik winim. Olsem na yumi mas wok strong long tingim tingim ol dispela samting yumi laik mekim. Na gutpela sapos oltaim yumi kamapim long beten bilong yumi. Na askim ol pren bilong yu long kirapim tingting bilong yu na strongim yu—dispela tu inap helpim yu long mekim wok. Putim sampela rait samting long kalenda, em bilong kirapim tingting bilong yu long skelim ol samting yu bin mekim, i kamap gutpela o nogat. Samting yu “tingting gut pastaim” long mekim, yu mas wok strong long mekim.—2 Ko 9:7.
6 Mun Oktoba i gutpela taim bilong helpim yumi long winim ol mak yumi bin putim long yumi yet. Bai yumi wok long tilim sabskripsen bilong Wastaua na Kirap! Olsem wanem? Yumi inap putim sampela mak i no hatwok tumas long winim? Yumi inap tilim sampela magasin moa? Sapos yumi tingting long mekim sampela gobek moa na kirapim nupela Baibel-stadi, ating planti bilong yumi inap mekim.
7 “Dispela graun bai i pinis,” olsem na yumi no bihainim gutpela tingting sapos yumi surik long mekim ol samting i bikpela samting. (1 Jo 2:17) Long nau yumi inap holim ol gutpela wok insait long kongrigesen na kisim ol gutpela blesing taim yumi mekim wok bilong Jehova. Bilong kisim ol dispela samting, yumi yet i mas mekim wok.