Wanem Mak Ol Pikinini i Ken Winim?
1 Bilong ol samting i ken kamap gutpela long i stap bilong yu, yu mas tingim sampela gutpela wok yu laik mekim na inapim dispela wok. Sapos man i putim mak bilong mekim samting i olsem wanpela liklik samting nating o putim mak i antap tumas, ating bihain bai em i bel hevi na pilim olsem em i no bin inapim wanpela gutpela wok. Yu mas tingim gut wanem ol samting yu laik mekim bambai yu inap kisim “dispela laip em i laip tru.” (1 Ti 6:19) Yumi amamas olsem long rot bilong Baibel na long oganaisesen bilong em, Jehova i soim rot yumi mas bihainim!—Ais 30:21.
2 Jehova i soim gutpela rot long yumi, olsem na em i stap gutpela piksa bilong ol papamama i ken bihainim. Papamama i gat gutpela tingting ol i no larim pikinini i no gat planti save long makim wanem rot tru em i laik bihainim, nogat; ol i save skulim pikinini long wanem rot em i mas bihainim, na taim em i kamap bikpela pinis em bai “wokabaut [yet] long dispela rot.” (Snd 22:6) Papamama Kristen i save pinis ol i no ken bilip long ol yet tasol long wanem rot ol i mas bihainim, nogat; ol i mas bilip na wetim Jehova i soim rot long ol. (Snd 3:5, 6) Em bikpela samting moa yet long ol pikinini i mas mekim olsem, long wanem, ol i gat liklik save tasol.
3 Sapos papamama i helpim pikinini long tingim ol gutpela wok em i laik mekim bihain, dispela bai helpim em long “skelim gut olgeta pasin.” (Fl 1:10) Papamama i ken kirapim pikinini long pilim tru olsem famili-stadi em i bikpela samting na em inap kisim save long rot bilong en. Gutpela sapos pikinini i lain long redim pastaim ol tok bilong miting na sampela tok em i ken bekim long toktok bilong em yet. Pikinini i mas insait long wok bilong autim tok—em bikpela samting. Ol liklik pikinini i ken tilim liklik nius, kaunim skripsa, o tilim magasin. Taim pikinini i save pinis long kaunim buk, em i ken insait long Skul Bilong Wok Autim Tok—dispela bai helpim em long kamap strong hariap long ol samting bilong spirit. Em bikpela samting tru taim pikinini i winim mak bilong kamap pablisa i no baptais yet o kisim baptais.
4 Taim pikinini i gat 13 krismas samting, papamama i mas toktok wantaim em long wanem wok tru em i laik mekim bihain. Ol tisa na wanskul inap pulim em na bai em i tingting long kisim bikpela wok mani o bikpela wok i gat namba. Papamama i mas helpim pikinini long tingim gut ol samting em i laik stadi long en long skul, em ol samting bilong helpim em long lukautim em yet long ol samting bilong skin na mekim ol wok bilong Kingdom. (1 Ti 6:6-10) Gutpela sapos papamama i kirapim pikinini long stap singel, na bihain, sapos em i laik marit, bai em i redi long mekim ol bikpela wok em i mas mekim insait long marit. (Mt 19:10, 11; 1 Ko 7:36-38) Sapos papamama i mekim gutpela toktok long pasin bilong go mekim wok long narapela hap i no gat planti Witnes long en, na wok painia, na wok misineri, na wok long Betel, dispela bai kirapim pikinini taim em i liklik yet na bai em i gat laik long mekim gutpela wok long olgeta taim, em wok Jehova i laikim na i bilong helpim ol narapela na em yet.
5 Long lain bilong yumi i gat planti yangpela ol i save bihainim ol gutpela pasin Kristen na ol i tingting long mekim ol wok bilong God. Gutpela papamama bilong ol i bin helpim gut ol long mekim olsem. Sapos yu wanpela papa o mama, olsem wanem? Ol pikinini bilong yu i laik mekim wanem? Ol i wok long kamap strong na tingim ol wok bilong Kingdom ol i laik mekim? Wanpela bikpela samting yu ken mekim i olsem: Yu mas skulim ol pikinini long tok i tru na putim long bel bilong ol, na stori long en long olgeta de. Sapos yu mekim olsem, ating famili bilong yu bai stap gut long Jehova long mekim wok bilong em.—Lo 6:6, 7; Jos 24:15.