Helpim Ol Narapela Long Helpim Ol Yet
1 Jehova i tok promis olsem em bai skulim yumi long olgeta samting yumi mas save long en. Long Song 32:8, em i tok: “Mi laik skulim yu gut, na soim yu long rot yu mas wokabaut long en.” Tasol yumi no tingting long helpim yumi yet tasol, nogat; yumi tingim ol narapela man na yumi laik helpim ol long save, sapos ol i bihainim ol gutpela tok bilong Baibel, dispela bai helpim ol long save long rot bilong helpim ol yet. (Ais 48:17) Yumi ken mekim olsem long mun Septemba, taim yumi tilim buk Stap Oltaim. I gat kain kain rot bilong helpim ol man long save olsem wanem Baibel inap helpim gut ol.
2 Long nau planti hevi i save kamap insait long marit, olsem na yu ken kamapim dispela tok em buk “Stap Oltaim” i stori long en:
◼ “Planti man mi bin toktok wantaim ol, ol i save tingting planti, long wanem, planti marit ol i no stap amamas na pasin bilong katim marit i go bikpela tru. Wanem tingting bilong yu long dispela samting? [Larim man i bekim tok.] Planti man i no save wanem samting i mekim na ol hevi i kamap insait long marit. Tasol sapos tupela marit i wok strong, ating bai ol i pas gut wantaim na marit bilong ol i no ken bruk, na ol bai stap amamas tru. Rot bilong i stap amamas i olsem: Tupela marit i mas bihainim ol tok bilong Baibel.” Kaunim Efesus 5:28, 29, 33. Opim buk long pes 243, na stori long paragraf 16 na 17, na nau tilim buk.
3 Papamama i mas poroman gut wantaim pikinini na tingim em na skulim em. Taim yu tilim buk “Stap Oltaim,” yu ken tok olsem:
◼ “Yumi olgeta i save tingting planti long wanem samting bai painim ol yangpela long bihain. Yu ting papamama i ken mekim wanem bilong helpim ol pikinini long kisim gutpela sindaun long bihain? [Larim man i bekim tok.] Mi laik kaunim wanpela gutpela tok bilong Baibel long yu ol i bin raitim 3,000 yia i go pinis. [Kaunim Sindaun 22:6.] Samting pikinini i lainim long skul, dispela inap helpim gut em, tasol samting papamama i skulim pikinini long en long taim em i stap long haus, dispela i win tru. Tru, papamama i mas lusim bikpela hap taim long tingim gut pikinini na mekim gutpela pasin sori long em, tasol gutpela samting tru bai kamap long dispela.” Opim buk long pes 245 na toktok long paragraf 20 na 21, na nau stori olsem wanem man i ken mekim wok long buk bilong helpim famili long stadi long Baibel.
4 Sapos yu laik bai man i putim gut yau, pastaim yu mas redim gut ol tok yu laik mekim. Taim yu no kamap yet long haus, yu mas tingim wanem samting bilong Baibel yu laik stori long en na bai yu ken kolim stret. Na tu, bilong pulim tingting bilong man, tingim wanpela liklik tok yu ken kamapim long magasin o long liklik nius, em yu laik tilim sapos man i no kisim buk. Long mun Septemba, long olgeta taim yu gat rot, wok long planim “kaikai” bilong ol tok i tru bilong Kingdom. (Sav 11:6) Long dispela rot bai yu inap helpim ol man long kisim ol gutpela samting bilong i stap oltaim.