Amamas Long Wok Bilong God i Go Bikpela
1 Ol Kristen long taim bilong ol aposel i bin givim bel tru long autim tok bilong Kingdom. Ol i bin amamas taim ‘namba bilong ol manmeri bilong ol sios i go bikpela moa long olgeta de.’ (Ap 16:5) Ol i bin wok strong long autim tok i go inap long Esia, Yurop, na Afrika, na planti i kamap bilipman.
2 Jisas i bin tok olsem, long taim bilong las de, wok bilong autim tok bai i go kamap long ‘olgeta hap bilong graun na olgeta lain bai harim’! (Mt 24:14) Long yia bilong wok bilong 1996, mipela i wok long kisim ol gutpela ripot olsem lain pablisa i go bikpela long planti kantri. Planti nupela kongrigesen i bin kamap. Wok i go bikpela, olsem na yumi mas wokim planti handet nupela Haus Kingdom na Haus Kibung, na tu yumi mas skruim sampela haus brens.
3 Wok Kingdom bilong Julai 1996 i bin kamapim ripot bilong sampela Haus Kingdom na haus misineri yumi bin wokim long Papua Niugini i no longtaim i go pinis, na em i tokaut tu long samting yumi laik wokim long bihain. Wankain samting olsem i wok long kamap nau long olgeta hap bilong Latin-Amerika. Long yia bilong wok bilong 1996, lain pablisa bilong Meksiko i bin i go bikpela tru inap 470,098 na ol i bin mekim 600,751 Baibel-stadi (averes), olsem na inap 466 nupela kongrigesen i kamap! Ol bai pinisim wok bilong skruim haus brens bilong ol long pinis bilong yia 1999. Wok i go bikpela long hap bilong Afrika na ol narapela kantri tu, olsem na yumi mas wok strong yet bilong wokim ol Haus Kingdom na haus brens samting.
4 Long olgeta hap, pe bilong ol samting bilong wokim ol haus i antap moa, na ol brata bilong yumi long planti hap ol i no gat planti samting bilong skin bilong givim. Tasol ol i givim bel long wok bilong Jehova na ol i kamap strong long ol samting bilong spirit na tu ol i kamap planti. Sindaun 28:27 i tokim yumi olsem, “man i save givim samting long ol rabisman, em bai i no inap sot long ol samting.” Sapos yumi amamas long givim sampela mani bilong helpim dispela wok bilong sanapim ol Haus Kingdom samting, long dispela rot narapela i ken helpim narapela. Na dispela bai mekim olgeta i kisim amamas bilong ol man i givim samting long narapela na kisim amamas long lukim Jehova i mekim wok i go bikpela!—2 Ko 8:14, 15; Ap 20:35.
[Piksa long pes 4, 5]
Brens-Ofis Long Paragwai
[Piksa long pes 4]
Brens-Ofis Long Ekwado
[Piksa long pes 4, 5]
Wok Bilong Skruim Haus Brens Long Meksiko
[Piksa long pes 4, 5]
Brens-Ofis Long Ripablik Dominika
[Piksa long pes 4]
Brens-Ofis Long Brasil na Hap Ol i Skruim
[Piksa long pes 4, 5]
Brens-Ofis Long Yurugwai Em Ol i Wokim Yet
[Ol Piksa long pes 5]
Ol Haus Kingdom i no gat bikpela pe bilong wokim long Latin-Amerika
1. Brasil
2. Nikaragua
3. Sili
4. Kalombia
5. Meksiko
6. Brasil
7. Peru
8. Veneswela
9. Meksiko