Samting Bilong Helpim Yumi Long Taim Stret
1 Sapos yumi sot long samting na yumi kisim helpim long taim stret, em i gutpela samting tru, a? (Hi 4:16) Long “Ol Man Bilong Autim Tok Long Bel Isi God i Save Givim” Kibung Distrik, yumi bin amamas tru taim yumi kisim tupela samting bilong helpim yumi long taim stret.
2 Long ol man i save long tok Inglis, dispela nupela buk, The Secret of Family Happiness, i bin kamap long taim stret. Buk i toktok long 4-pela bikpela samting bilong helpim ol famili long i stap amamas: (1) Pasin bilong bosim skin, (2) daun long het bilong famili, (3) toktok gut wantaim, na (4) pasin sori. Ol tok i stap long buk Family Happiness bai helpim olgeta famili i bihainim ol dispela tok long kisim bel isi God i save givim. Sapos yu save long tok Inglis, makim taim bilong kaunim gut dispela nupela buk na kirap long bihainim ol tok bilong en insait long famili bilong yu.
3 Nupela buklet, God i Laik Yumi Mas Mekim Wanem? i bin kamap long taim stret bilong helpim yumi long hariapim wok bilong kamapim ol disaipel. Yumi ken mekim wok long dispela buklet bilong helpim ol man i no save gut long rit, tasol em i gutpela tu bilong helpim ol man i bikpela pinis na ol pikinini em ol i save gut long rit, long wanem, buklet i kamapim ol bikpela tok bilong Baibel long pasin i no hatwok long kisim. Ating em i gutpela samting bilong kirapim stadi long en na redim man long stadi long buk Save. Dispela buklet bai helpim planti man moa long pilim tru ol blesing ol inap kisim taim ol i mekim ol samting God i laik bai ol i mas mekim.
4 Yumi pilim olsem wanem long pasin sori Jehova i mekim bilong helpim yumi long taim stret? Devit i bin kamapim stret tingting bilong yumi, taim em i tok olsem ‘em i no inap sot long wanpela samting, em i kisim nupela strong, na God i lukautim em gutpela tumas!’ (Sng 23:1, 3, 5) Yumi amamas tru long givim dispela gutpela samting bilong spirit bilong helpim planti narapela em ol i gat laik long save na lotu long God tru, em Jehova.