Askim

◼ Yumi mas was gut long wanem ol samting taim man i bung wantaim meri o meri wantaim man long taim bilong autim tok?

I gat as na yumi ken ting olsem ol brata na sista bilong yumi i laik bihainim tru stretpela pasin long wokabaut bilong ol. Tasol yumi stap long dispela graun i pulap na i orait long kain kain pasin doti na i no gat planti stretpela lo i bosim ol man. Ating yumi gat stretpela tingting, tasol yumi mas was gut oltaim, nogut yumi mekim samting i bagarapim nem bilong yumi o mekim sampela samting i no stret. Long taim bilong autim tok tu, yumi mas was gut long dispela samting.

Taim yumi autim tok, planti taim yumi bungim man o meri i kamapim olsem em i laikim tru tok i tru. Sapos wanpela brata i go long wanpela haus na bungim wanpela meri na i no gat narapela i stap long haus, ating i gutpela em i sanap long dua na autim tok na em i no ken i go insait. Sapos meri i amamas long harim tok, yumi ken stretim rot bilong i go bek wantaim narapela pablisa o long taim ol narapela long haus tu i stap. Sapos i no inap, i gutpela yumi tokim narapela pablisa long i go lukim em, olsem sista i ken i go lukim meri, o brata i ken i go lukim man. Yumi mas mekim wankain samting taim yumi lukautim ol Baibel-stadi.​—⁠Mt 10:⁠16.

Yumi mas was gut taim yumi makim poroman bilong autim tok wantaim em. Tru, sampela taim brata na sista i ken wok wantaim, tasol gutpela ol i ken wok wantaim grup. Long taim bilong autim tok, i no gutpela yumi yet tasol i raun wantaim wanpela brata o sista em i no poroman marit bilong yumi. Olsem na brata i lukautim grup, em i mas tingting gut taim em i makim ol pablisa, na ol yangpela tu, long wok wantaim.

Sapos oltaim yumi skelim gut ol samting, bai yumi no inap ‘mekim wanpela samting i pundaunim yumi yet’ o ol narapela.​—⁠2 Ko 6:⁠3.