Tokaut Long Nem Bilong Jehova na Ol Wok Bilong Em

¹ “Yumi kolim nem bilong Bikpela na singaut long em na tok tenkyu long em. Na yumi mas tokaut long olgeta lain manmeri long ol bikpela wok em i bin mekim. . . . Ol man i save go klostu long Bikpela, ol i ken amamas tru.” (Sng 105:​1, 3) Man bilong raitim Song i bin raitim dispela tok, em i amamas long tokim ol narapela long Jehova na ol “bikpela wok em i bin mekim.” Wanem ol bikpela wok? Em ol samting bilong gutpela wok king bilong em na gutnius bilong em long “kisim bek ol manmeri.”​—⁠Sng 96:​2, 3; 145:​11, 12.

² Yumi kamap klostu long taim bilong mekim Memorial bilong 2001, olsem na i gat planti as na yumi inap amamas long ol samting Jehova i mekim bilong helpim yumi. Olsem wanem yumi inap amamas? Kaikai Bilong Bikpela em i nambawan bikpela bung bilong ol Kristen tru i save kamap long olgeta yia. Dispela bung i winim tru olgeta narapela bung, em i bikpela samting long yumi mas mekim dispela bung, em i gat as tru bilong en, na i gat pasin bilong mekim dispela bung. Em taim bilong yumi olgeta i tingim ol samting Jehova na Jisas i bin mekim bilong kisim bek yumi. Olsem na long taim bilong Memorial yumi save olsem bai i gat bikpela wok bilong autim tok, na kamapim gutnius bilong “kisim bek ol manmeri”!

³ Bai Yu Mekim Wok Painia Haptaim? Long mun Epril long yia i go pinis, bikpela lain tru inap 404 brata sista i bin mekim wok painia haptaim. Olsem wanem? Long dispela yia, bai yumi tingim mun Mas na Epril olsem tupela bikpela mun bilong mekim bikpela wok bilong autim tok? Mun Mas i gat 5-pela Sarere, na Epril i gat 5-pela Sande. Planti pablisa i mekim wok skin long olgeta taim ol i tingting long autim tok planti aua long olgeta Sarere Sande, na ol i skelim olsem ol inap mekim wok painia haptaim. Painia haptaim i mas kisim 12-pela aua long olgeta wan wan wik bilong inapim 50 aua long wanpela mun. Skelim gut ol sedyul yu inap bihainim i stap long blok long pes 4. Olsem wanem? Wanpela bilong dispela sedyul i stret long yu? Sapos nogat, orait yu ken wokim wanpela sedyul i stret long yu bilong yu ken mekim wok painia haptaim long mun Mas na Epril.

⁴ Ol elda i mas kirap nau long kirapim ol pablisa long amamas long mekim dispela bikpela wok. Wanpela rot bilong mekim olsem em planti elda na wokman i ken tingting long mekim wok painia haptaim long mun Mas na Epril! Dispela tupela mun em i gutpela taim tu bilong ol pikinini na ol nupela long askim ol elda bilong save ol i winim mak bilong kirap autim tok long ol haus o nogat.

⁵ Pasin Bilong Wok Strong i Kamapim Planti Blesing: Ol kongrigesen i putim ol gutpela mak na ol i wok strong moa ol bai kisim planti blesing. Sampela kongrigesen inap wok strong long autim tok long hap teritori ol i no save autim tok planti taim long en, o ol i ken wok strong long autim tok long narapela narapela rot na i go lukim ol man i no bin stap long haus.

⁶ Olsem wanem? Sapos man i gat sik o em i lapun, dispela i ken pasim em na em i no inap givim bel long wok autim tok? Nogat. Sampela i gat dispela hevi, tasol ol i bin stretim rot bilong mekim wok painia haptaim. Taim dispela kain lain i insait moa long autim tok na ol i mekim bikpela wok bilong litimapim nem bilong Jehova, dispela inap strongim ol yet na kongrigesen.

⁷ Redi Gut Long Memorial: Long dispela yia Memorial bai kamap long Epril 8. Em bai kamap long Sande, olsem na planti tru inap i kam. Namba bilong ol man i bung bai bikpela tru sapos yumi mekim ol dispela samting (1) yumi yet i stap long dispela bung na (2) yumi singautim ol narapela long kam bung wantaim yumi. Yumi inap singautim husat?

⁸ Skelim buk yu save raitim nem bilong ol man i bin harim tok taim yu autim tok, maski yu no save go lukim ol planti taim. Tupela o tripela wik paslain long Memorial, go lukim ol dispela man na givim pepa bilong singautim ol i kam long Memorial. Sapos yu inap, tokim ol man i laik kam long Memorial long yu inap kisim ol i kam long ka.

⁹ Long sampela kongrigesen, ol i no save tilim olgeta pepa bilong singautim ol man i kam long Memorial. Kuskus bilong kongrigesen i mas stretim gut ol samting na ol brata sista inap kisim ol dispela pepa paslain long taim bilong tilim. Daunbilo long dispela pepa yu ken raitim long taipraita o raitim gut long pen taim na ples bilong bung. O sapos Memorial bilong yupela bai kamap long Haus Kingdom, orait yu ken givim pepa bilong singautim man i kam long miting i gat atres bilong Haus Kingdom wantaim pepa bilong Memorial. Tingim, taim yu givim pepa bilong singautim man i kam long Memorial, yu mas givim stret long han bilong em.

¹⁰ Tingim Ol Man i Lusim Wok Autim Tok: Yumi save amamas taim wanpela Baibel-stadi i dediket long Jehova na em i kisim baptais long wara bilong makim dediket bilong em. Tasol long olgeta yia, sampela i no save kam bung moa wantaim yumi na ol i no autim tok moa long nem bilong Jehova na ol bikpela wok em i bin mekim. I gat as tru na yumi tingting planti. Tru, ol dispela man ol i no lusim tok i tru, tasol ol i lusim wok autim tok, long wanem, ol i bel hevi, o ol yet i gat sampela hevi, o ol i tingting planti long ol samting bilong i stap bilong ol. (Mt 13:​20-22) Ol man i slek olgeta long ol samting bilong spirit, ol i mas kisim helpim bambai ol i ken kam bek long kongrigesen, nogut ol lain bilong Satan i daunim ol olgeta. (1 Pi 5:⁠8) Long taim bilong Memorial long dispela yia, yumi laik wok strong long helpim ol man i slek na bai ol i ken kirap gen long autim tok, sapos ol i winim mak bilong mekim dispela wok.

¹¹ Kuskus bilong kongrigesen i mas toksave long ol wasman bilong Buk-Stadi long nem bilong ol pablisa long grup bilong ol, em ol i no save autim tok. Komiti Bilong Wok Autim Tok bai i go pas long stretim rot bilong go lukim ol dispela man i no save autim tok. Sapos komiti i ting dispela pablisa i mas stadi long Baibel bambai em i ken kamap strong, orait komiti i mas makim wanpela pablisa inap helpim em long stadi wantaim em. Ating ol i no gat wok long stadi inap longpela taim tumas, tasol pablisa i mekim stadi i ken raitim aua, raitim olsem gobek na Baibel-stadi long ripot bilong em.

¹² Long mun Epril long yia i go pinis, wanpela sista i autim tok long ol haus na em i bungim wanpela yangpela man long rot na em i tilim wanpela nius long em. Dispela man i tok meri bilong em i wanpela Witnes i no save autim tok. Em i askim sista long Haus Kingdom i stap we na em i tokim sista long i kam lukim em na meri bilong em. Sista i go lukim ol na long wik bihain tupela i kam long miting na ol i orait long stadi long Baibel.

¹³ Redi Long Mekim Bikpela Wok! Dispela man bilong raitim Song i bin tok olsem yumi mas tokaut long nem bilong Jehova na ol bikpela wok em i bin mekim, em i tok moa olsem: “Yumi singim ol song bilong amamas long em na bilong litimapim nem bilong em. Na yumi tokaut long ol gutpela gutpela samting em i bin mekim. Yumi amamas na givim biknem long em.” (Sng 105:​2, 3) Yumi mas mekim bikpela wok moa bilong autim tok na mekim Memorial bilong dispela yia i kamap gutpela tru, winim olgeta taim bipo, na long dispela rot yumi kamapim klia olsem yumi tingim nem bilong Jehova na ol “gutpela gutpela samting em i bin mekim”!

[Blok long pes 4]

Sampela Sedyul Bilong Winim 12-pela Aua Long Wanpela Wik Bilong Mekim Wok Painia Haptaim

De Ol Aua

Mande 1 2 − −

Tunde 1 − 3 −

Trinde 1 2 − 5

Fonde 1 − 3 −

Fraide 1 2 − −

Sarere 5 4 3 5

Sande 2 2 3 2

Olgeta: 12 12 12 12

Olsem wanem? Wanpela bilong dispela sedyul i stret long yu? Sapos nogat, yu ken wokim wanpela sedyul i stret long yu.