Amamas Long i Stap Wanbel Wantaim Jehova na Pikinini Bilong Em
Nambawan Bikpela Bung Long Yia Bai Kamap Long Mas 28
1 Taim yumi mekim Kaikai Bilong Bikpela, long taim san i go daun pinis long Mas 28, 2002, yumi kamapim olsem yumi amamas long i stap wanbel wantaim God Jehova na Jisas Krais. Long dispela bikpela bung, lain remnan em God i bin makim ol bai amamas long ol i “stap wanbel” wantaim ol narapela em ol i bilong kisim Kingdom, na ol i wanbel wantaim Papa, na Pikinini bilong em. (1 Jo. 1:3; Ef. 1:11, 12) Planti milion bilong lain “arapela sipsip” ol bai tingim gen gutpela samting ol i holim bilong i stap wanbel wantaim Jehova na Pikinini bilong em, na ol i gat wanpela tingting tasol long mekim wok bilong God!—Jo. 10:16.
2 Ol i Pas Gut na Wok Gut Wantaim: Oltaim Jehova na Jisas i bin amamas long i stap wanbel. Inap planti bilion yia paslain long God i bin wokim ol man, tupela i bin amamas long pas gut wantaim. (Mai. 5:2) Olsem na narapela i laikim tru narapela na tupela i pas gut wantaim. Taim dispela namba wan Pikinini bilong God i no kam daun yet long graun, em i stori long em yet em i olsem gutpela tingting na save, na em i tok: “Olgeta de mi bin mekim [Jehova] i amamas, long wanem, mi bin amamas tumas long lukim ol samting em i bin wokim.” (Snd. 8:30) Em i bin bung inap planti bilion yia wantaim man i As bilong pasin sori na dispela i bin mekim bikpela samting tru long Pikinini bilong God!—1 Jo. 4:8.
3 Jehova i save olsem i mas i gat wanpela samting bilong kisim bek ol man long sin na indai, olsem na em i makim dispela wanpela Pikinini bilong em—em man i laikim tumas ol man bilong graun—long givim ofa bilong baim bek man long sin, em wanpela rot tasol bilong helpim yumi. (Snd. 8:31) Jehova na Pikinini bilong em ol i wanbel long mekim wanpela wok tasol, na olsem tasol pasin sori i helpim yumi long i stap wanbel na amamas long mekim laik bilong God.
4 Kamapim Olsem Yumi Pilim Tru Long Bel: Taim yumi stap long bung long Memorial na putim gut yau long ol tok i kamap, yumi inap kamapim olsem yumi pilim tru pasin sori bilong Jehova na ofa bilong Pikinini bilong em bilong helpim yumi. Bikpela tok long dispela bung bai stori long gutpela pasin Jisas i makim bilong yumi ken bihainim, pasin bilong em long stap gut long God i go inap long taim em i dai na givim laip bilong em olsem ofa bilong baim bek man, na wok bos em i mekim olsem King long Kingdom bilong God, na ol blesing dispela Kingdom bai kamapim long ol man. Na tu, bai yumi kisim ol tok bilong kirapim yumi long tingim gen olsem em i bikpela samting long yumi mas kamapim bilip bilong yumi long olgeta taim, na givim bel long bihainim laik bilong Jehova, olsem ol “wanwok” bilong strongim wok bilong tok i tru.—3 Jo. 8; Jems 2:17.
5 Helpim Ol Narapela Long Kamap Wanbel Wantaim Yumi: Ol lain elda i mas wok strong long kirapim olgeta Witnes em ol i bin lusim wok autim tok long i kam long Memorial bilong tingim indai bilong Krais. (Mt. 18:12, 13) Raitim nem bilong olgeta dispela lain long wanpela lista na bai yupela i no ken abrusim wanpela. Go long wan wan bilong ol na singautim ol long i kam long Memorial.
6 Yu save long sampela em ol inap kam long Memorial? Mekim ol samting bilong kirapim ol long pilim tru dispela bung. Long gutpela pasin, singautim ol long i kam long dispela bung na mekim ol i amamas taim ol i kam. Yumi mas wok strong tru long singautim olgeta Baibel-stadi bilong yumi, na ol man i amamas long harim tok, na famili na pren bilong yumi long i kam long dispela nambawan bikpela bung. Olgeta man i kisim “save long Krais Jisas . . . dispela save tasol em i samting tru,” ol inap kisim ol gutpela blesing i kamap long rot bilong ofa bilong Krais bilong baim bek man. (Fl. 3:8) Ol man i bilip long ofa bilong Krais, ol inap wet long kisim laip oltaim.—Jo. 3:16.
7 Yumi no ken ting olsem Memorial i no inap kamapim gutpela samting long ol man i gat gutpela bel. Inap tupela yia i go pinis long Papua Niugini, 11-pela manmeri em ol i gat laik long harim tok bilong ol Witnes, ol i kalap long wanpela liklik bot na inap 17 aua ol i raun long bot long taim bilong biksi bambai ol tu inap stap long bung bilong Memorial. Bilong wanem ol i mekim olsem? Ol i tok: “Mipela i laik mekim bung bilong Memorial bilong Krais wantaim ol man ol tu i save lotuim Jehova, olsem na dispela hatwok bilong mipela long raun long bot i kamapim gutpela samting.” Tingim pasin bilong dispela lain long givim bel na amamas bilong ol long i stap wanbel wantaim Jehova, Pikinini bilong em, na ol lain brata Kristen!
8 Tokim olgeta man i laik kisim sampela save moa long yu laik mekim Baibel-stadi wantaim ol. Tokim ol long kam oltaim long ol miting bilong kongrigesen, na long tokim ol narapela long ol tok i tru ol i wok long lainim. Helpim ol long “wokabaut long lait” na “long pasin i tru” long rot bilong bihainim ol stiatok bilong Baibel long i stap bilong ol. (1 Jo. 1:6, 7) Helpim ol long kamapim pasin bilong pas gut wantaim Jehova na wok yet long pilim tru gutpela samting ol i holim bilong i stap wanbel long mekim laik bilong em.
9 Yumi ‘stap wanbel, na long wanpela tingting tasol yumi wok wantaim bilong kirapim ol manmeri long bilip long gutnius,’ na dispela i wanpela gutpela samting tru! (Fl. 1:27, 28) Yumi tingim dispela de na yumi amamas long bung wantaim long Memorial long Mas 28, na oltaim yumi ken tenkyu tru long Jehova na Pikinini bilong em!—Lu. 22:19.