Tingim Gut Pe Bilong Baim Bek Man
1 Ol Kristen long olgeta hap bai bihainim tok bilong Jisas, na long Sarere, Mas 22, 2008, taim san i go daun pinis, ol bai bung bilong tingim indai bilong Jisas Krais. (Lu. 22:19; 1 Ko. 11:23-26) Yumi redi long mekim olsem, long wanem, yumi tenkyu tru long ol samting i bin kamap long dispela det inap 1,975 yia i go pinis. Jisas i stap gut long Jehova i go inap long taim em i kisim bikpela pen na i dai long diwai pos, na long dispela rot em i litimapim nem bilong Papa bilong em, na em i kamapim klia olsem ol tok Satan i sutim i giaman.—Jop 1:11; Snd. 27:11.
2 Blut bilong Jisas i strongim nupela kontrak, na i opim rot long God inap makim ol man i no gutpela olgeta long kamap olsem ol pikinini bilong em na ol inap mekim wok king wantaim Krais long Kingdom long heven. (Jer. 31:31-34; Mk. 14:24) Na tu, taim God i givim gutpela Pikinini bilong em olsem ofa, dispela i kamapim klia olsem em i laikim tru ol man, olsem Jisas yet i bin stori long dispela samting long Nikodemus.—Jo. 3:16.
3 Singautim Ol Narapela: Wok Kingdom bilong Janueri i bin kirapim yumi long wokim wanpela lista i gat nem bilong ol man yumi save long ol na yumi laik singautim ol i kam long Memorial. Olsem wanem? Yu kirap pinis long singautim ol man em yu raitim nem bilong ol long lista? Yu stretim rot pinis bilong insait long wok bilong singautim ol man i kam long Memorial em dispela wok bai kirap long Mas 1? Ol man i kam long Memorial bai harim ol gutpela tok bilong Baibel em ol dispela tok bai strongim bilip bilong ol long pe bilong baim bek man, na bai ol i gat rot long kisim laip oltaim.—Ro. 10:17.
4 Olgeta husat inap, ol i mas kam paslain tru long Memorial i kirap na bai ol i ken tok welkam long ol man i bin kisim invatesen pepa na kam. Planti manmeri tru i save kam long Memorial, olsem na em i bikpela samting long yumi mas wok strong long tingim ol nupela man na ol man i save kam wan wan taim long ol miting.
5 Redim Bel Bilong Yu: Buklet Skelim Tok Bilong Baibel Long Olgeta De—2008 na 2008 Calendar i gat sediul bilong ol skripsa ol i makim bilong ritim long taim bilong Memorial, kirap long Mas 17. Taim yu skelim ol bikpela samting i bin painim Jisas paslain long indai bilong em, dispela bai helpim yu long redim bel bilong yu long Memorial. (Esr. 7:10) Pasin bilong beten na tingim tingim long bel ol dispela tok bilong Baibel bai helpim yu long pilim tru pasin laikim bilong Jehova na Pikinini Man bilong em long givim pe bilong baim bek ol man.—Sng. 143:5.
6 Taim bilong Memorial i wok long i kam klostu, olsem na yumi mas redim yumi yet na ol narapela long dispela bikpela bung. Taim yumi tingim gut pe bilong baim bek man, dispela bai strongim pasin bilong yumi long pas gut wantaim Jehova na Pikinini bilong em. (2 Ko. 5:14, 15) Na tu, em bai kirapim yumi long bihainim pasin bilong tupela long laikim tru ol narapela.—1 Jo. 4:11.
[Askim Bilong Stadi]
1, 2. I gat wanem ol as na yumi mas tingim gut pe bilong baim bek man?
3. Taim ol man i kam long Memorial, dispela bai helpim ol olsem wanem?
4. Bilong wanem yumi mas i go paslain tru long Memorial i kirap?
5. Olsem wanem yu ken redim bel bilong yu long Memorial?
6. Olsem wanem pasin bilong tingim gut pe bilong baim bek man bai helpim yumi?