Ol Samting i Kamapim Klia Ol i Gat Bilip!
1 Ol aposel i putim gut yau taim Jisas i toktok long em bai i kam i stap na pinis bilong pasin nogut bilong dispela graun. Ol hevi bai painim ol man—ol bikpela pait, kaikai i sot, graun i guria, na ol bikpela sik. Orait bihain Jisas i tokim ol disaipel olsem ol man bai i birua long ol na mekim nogut long ol na kilim ol i dai. Bai i gat ol giaman profet na ol bai i giamanim planti man. Planti man bai i no kamapim moa pasin laikim.
2 Taim Jisas i stori pinis long ol dispela samting, em i tok ol man bai autim gutnius bilong Kingdom Bilong God long olgeta hap bilong graun. Ating ol disaipel i kirap nogut taim Jisas i mekim dispela tok. (Mt. 24:3-14) Long nau yumi lukim truim bilong dispela tok profet. Tru, yumi stap long dispela taim nogut, tasol ol Witnes Bilong Jehova i save givim bel long autim gutnius. Ol man bilong graun i no gat pasin laikim, tasol pasin bilong yumi long laikim ol arapela i go bikpela. Maski “olgeta lain manmeri” i nolaik tru long yumi, yumi autim tok long klostu olgeta hap.
3 Yumi amamas tru long lukim wok ol Witnes Bilong Jehova i bin mekim long sevis yia i go pinis em sat long pes 3 i go 6 i kamapim, a? Inap 16 yia nau, ol i bin lusim winim 1 bilion aua long mekim wok autim tok na kamapim ol disaipel. Dispela i kamapim klia olsem ol Witnes Bilong Jehova i gat strongpela bilip. Namba bilong ol painia i go antap olsem 5.8 pesen, na namba bilong ol pablisa i go antap olsem 3.1 pesen, na namba bilong ol Baibel stadi i go antap inap olsem 4.4 pesen. Namba bilong ol man i kisim baptais i go antap, winim 20.1 pesen bilong lain i kisim baptais long las sevis yia. Yumi amamas tru long lukim olsem klostu 7 milion manmeri ol i stap gut long wok bilong Jehova—namba bilong ol i go antap moa winim olgeta taim bipo. Taim yu skelim sat, wanem samting long sat i strongim yu?
4 Tru, ol namba long sat i bikpela, tasol yumi mas tingim olsem ol dispela namba i kamapim klia olsem ol manmeri i mekim ol dispela wok ol i gat strongpela bilip. Tingim Guillermo husat i kamap bikpela long Bolivia. Mama i karim em long 1935, na taim em i gat 9-pela krismas em i kirap wok long wanpela koka plantesen. Kirap long taim em i liklik yet, em i save kaikai lip koka bilong daunim bel hevi em i kisim long strongpela wok em i mekim. Bihain em i dring strongpela dring na smok. Taim em i kisim save long ol samting Jehova i laik em i mas mekim, Guillermo i lusim smok na em i no kisim strongpela dring moa. Wanpela samting em i hatwok tru long lusim em pasin bilong em long kaikai lip koka. Em i wok strong long beten olgeta taim i go na em i daunim dispela pasin. Taim em i lusim pinis ol pasin nogut, em i kisim baptais. Em i tok: “Nau mi pilim olsem mi stap klin na mi amamas tru.”
5 Jehova i save laikim tru ol manmeri. Em i laik bai olgeta man i tanim bel. (2 Pi. 3:9) Yumi tu i gat wankain laik. Bel bilong yumi i mas kirapim yumi long mekim olgeta samting yumi inap mekim bilong helpim ol man i gat gutpela bel long kisim save long Jehova na laikim em wankain olsem yumi i save mekim.
[Askim Bilong Stadi]
1. Jisas i tok profet long wanem ol hevi bai i kamap?
2. Bilong wanem yumi kirap nogut olsem ol i autim gutnius long olgeta hap?
3. Yu lukim wanem gutpela samting long ripot bilong olgeta hap?
4. Wanpela man i winim wanem ol hevi na bai em i ken kisim baptais?
5. Yu gat laik long mekim wanem?