Painim Ol Manmeri i Gat Gutpela Bel

1. Olsem wanem yumi soim olsem yumi amamas long gutpela wok yumi mekim long autim tok?

¹ Taim Jisas i autim tok em i mekim bikpela wok tru long autim gutpela tok i mekim gut bel bilong ol man i stap rabis. (Ais. 61:​1, 2) Olsem ol mausman bilong Krais, yumi long nau i gat dispela gutpela wok long bihainim pasin bilong Krais long wok strong na yumi no ken les long painim ol man i gat gutpela bel i stap long teritori bilong yumi.​—⁠Mt. 10:11; 2 Ko. 5:⁠20.

2. Pol i mekim wanem na em i kamapim klia olsem em i redi long senis? Wanem gutpela samting i kamap?

² Redi Long Senis: Aposel Pol i save go pastaim long haus lotu bilong ol Juda na autim tok long ol Juda na ol man bilong ol narapela lain. (Ap. 14:⁠1) Long Filipai, em na Sailas i go painim ol man long hap we ‘ol i ting i gat ples bilong mekim prea.’ Ol i kirap autim tok long wanpela lain meri, na wanpela bilong ol, em Lidia, em i kirap bihainim tok i tru.​—⁠Ap. 16:​12-15.

3. Yumi save autim tok long ol haus, tasol i gat wanem ol narapela hap tu em yumi ken autim tok long en?

³ Yu save autim tok long ol haus, tasol yu ting yu inap autim tok tu long ol man em yu bungim ol long bas stop, ples balus, long wof, maket, pak, ples wok, long ol rot we planti man i go i kam, ol ples bisnis, na long ol stua? Ating long rot bilong raitim pas o long telefon yumi ken autim tok tu long ol haus na ol flet i gat strongpela tambu na ol sekiuriti long en. Taim yu skelim ol samting na redi long senisim tok na bai i stret long sindaun bilong ol man long teritori, dispela bai opim rot long yu mekim bikpela wok moa ‘long wok bilong Bikpela.’​—⁠1 Ko. 15:⁠58.

4. Yumi gat wanem ol narapela rot bilong autim tok sapos teritori bilong yumi i liklik?

⁴ Planti pablisa i mekim bikpela wok moa bilong autim tok taim ol i go sindaun long ol narapela kongrigesen we i sot long ol man bilong autim tok. Sampela taim ol i mas lainim ol nupela tok ples. Sampela i bin lainim nupela tok ples bambai ol i ken autim tok long ol man i kam long narapela kantri.

5. Yumi mas i gat wanem tingting long taim nau yumi stap long en? Yu mas tingting strong long mekim wanem?

⁵ Yumi olgeta i mas tingim olsem “gaden em i dispela graun.” (Mt. 9:37; 13:38) Yumi save olsem pinis bilong pasin nogut bilong dispela graun i kam klostu tru, olsem na yumi wan wan i mas tingting gut long ol samting yumi mekim, save bilong yumi long mekim wok, wanem ol rot i op long yumi, na yumi inap long mekim bikpela wok moa bilong autim tok. Jehova i tok promis olsem sapos yumi tingim Kingdom pastaim, em bai blesim hatwok bilong yumi long mekim bikpela wok moa long autim tok.​—⁠Mt. 6:⁠33.