Mekim Gut Wok Autim Tok
1. Olsem wanem tok bilong 1 Korin 9:26 i stret long wok autim tok?
1 Aposel Pol i tok: “Mi mekim olsem man i ran strong na i no lukluk nabaut. Na mi mekim olsem man i boksen na i no paitim nating win.” (1 Kor. 9:26) Pol i mekim dispela tok long pasin bilong em long holim wanpela tingting tasol long inapim ol mak em i putim long mekim gut wok bilong Jehova. Tasol dispela stiatok i stret tu long wok autim tok. Yumi laik wok strong na bai yumi inapim wok bilong yumi long autim gut tok. Olsem wanem bai yumi mekim olsem?
2. Olsem wanem yumi ken bihainim pasin bilong Pol na ol narapela long taim bilong em, long makim wanem taim na ples bilong autim tok?
2 Autim Tok Long Ol Hap i Gat Ol Man: Pol na ol narapela long taim bilong em ol i save autim gutnius long ol hap we i gat ol man i stap long en. (Apo. 5:42; 16:13; 17:17) Olsem na sapos planti man long teritori bilong yumi i save stap long haus long apinun, ating dispela i gutpela taim long autim tok long ol haus. Olsem wanem? Planti man i save pulap long bas stop long ol moning na long ol apinun? Wanem taim ol stua i save pulap long ol manmeri? Ating i gutpela long tilim nius long ol dispela taim na ples.
3. Yumi ken mekim wanem na bai yumi autim gut tok long ol teritori bilong yumi?
3 Mekim Gut Wok Long Teritori: Yumi mas skelim gut ol samting na bai yumi inap autim gut tok long ol teritori bilong yumi. Olsem, sapos grup bilong autim tok i bikpela, orait i gutpela long brukim long tupela lain na bai i no hatwok long brata i lukautim grup na taim i no ken lus nating. Taim yumi go long ol teritori i stap longwe, bai yumi inap toktok wantaim planti man na pinisim hariap teritori sapos liklik lain tasol i wok long wanpela teritori. Olsem wanem? Yumi inap kisim wanpela teritori bilong autim tok klostu long haus bilong yumi na bai yumi no ken lusim bikpela hap taim bilong go longwe long autim tok?
4. Wanem samting bai helpim yumi long “kamap ol man bilong kisim ol manmeri”?
4 Jisas i tok ol man bilong autim tok ol i kain olsem “ol man bilong kisim pis.” (Mak 1:17) Tingting bilong man bilong painim pis, em long kisim pis. Olsem na em i save long wanem hap na taim i stret bilong painim pis, na em i no westim taim long kisim pis. Tru tumas, ol i save mekim gut wok bilong ol long painim pis. Yumi tu i mas bihainim wankain pasin long wok bilong yumi long autim tok.—Hib. 6:11.