Yu Inap Insait Long Wok Autim Tok Long Apinun?
1. Wanpela saveman i tok, aposel Pol i save mekim wok autim tok long ol haus long wanem taim?
1 Buk Daily Life in Bible Times i tok, aposel Pol i gat pasin bilong autim tok long ol haus “kirap long 4 klok apinun i go inap long biknait.” Yumi no save sapos dispela em sediul bilong em long autim tok, tasol yumi save Pol i redi long “mekim olgeta samting bilong helpim gutnius.” (1 Kor. 9:19-23) Dispela i makim olsem em i mas stretim ol samting bambai em inap wok autim tok long ol haus taim planti man i stap long haus.
2. Bilong wanem apinun em i gutpela taim bilong autim tok?
2 Long planti hap, ol pablisa i save autim tok long ol haus long moningtaim namel long wik. Tasol olsem wanem long hap bilong yupela, dispela em i gutpela taim yet long autim tok? Wanpela painia i tok long teritori bilong em olsem: “Long moningtaim, i hatwok long painim ol man long ol haus. Tasol planti man i save stap long ol haus long apinun.” Taim yumi autim tok long ol haus long apinun, dispela i gutpela rot long yumi inap bungim planti man na autim gutnius long ol. Planti taim ol man bilong haus i stap isi na ol i amamas long toktok. Sapos dispela em i gutpela taim bilong autim tok, orait ol elda i mas stretim rot na bai i gat ol bung bilong autim tok long ol apinun.
3. Olsem wanem yumi ken bihainim savepasin taim yumi autim tok long apinun?
3 Bihainim Savepasin: Taim yupela i autim tok long apinun, em i bikpela samting long bihainim savepasin. Olsem, sapos yu go long wanpela haus na yu lukim olsem em i no gutpela taim long toktok wantaim ol, ating ol i kaikai i stap, i gutpela long tokim ol olsem yu laik kam bek bihain. Sapos em i tudak, i gutpela long sanap long ples klia na man bilong haus inap lukim yu, na wantu toksave long yu husat na wanem as na yu kam long haus bilong em. Na tu, em i savetingting long wok tupela tupela o wantaim bikpela lain, na stap long rot we i gat lait na no ken stap longwe long grup. No ken go autim tok long haus taim ol man bilong haus i redi long slip. (2 Kor. 6:3) Sapos wanpela hap we i no seif long autim tok taim tudak i kamap pinis, i gutpela long autim tok long taim san i sanap yet.—Snd. 22:3.
4. Yumi kisim wanem ol gutpela samting taim yumi autim tok long apinun?
4 Ol Gutpela Samting: Yumi save kisim bikpela amamas moa long wok autim tok taim yumi toktok wantaim man. Na taim yumi autim tok long planti man moa, rot i op long yumi helpim planti man na bai God i ken ‘kisim bek ol’ na ol inap “kisim stretpela save long tok i tru.” (1 Tim. 2:3, 4) Yu ting yu inap stretim sediul bilong yu bambai yu inap insait long wok autim tok long apinun?