Sik Bilong Tingting i Go Bikpela Long Olgeta Hap
“Mi save tingting planti, maski i no gat as bilong en.”
“Taim mi pilim olsem mi orait, mi save tingting planti. Mi save olsem taim mi amamas tru, i no longtaim mi bai bel hevi.”
“Mi traim long putim tingting long ol samting i kamap long wan wan de, tasol sampela taim, wantu mi tingting planti long planti samting.”
Dispela em ol tok bilong ol manmeri husat i karim hevi bilong sik bilong tingting. Yu—o wanpela yu laikim—i pilim wankain olsem?
Yu ken save olsem, i no yu tasol i karim dispela hevi. Planti manmeri long nau i karim hevi long sik bilong tingting, ating ol yet i gat dispela sik o wanpela long famili i gat dispela sik.
Tru tumas, yumi stap long dispela “taim nogut” we i “givim hatwok long ol man” na i kamapim kain kain hevi. (2 Timoti 3:1) Long wanpela wok painimaut ol i mekim long olgeta hap bilong graun, ol i kisim save olsem long ol 8-pela 8-pela manmeri, 1-pela i karim hevi long sik bilong tingting. Long 2020, COVID-19 pandamik i mekim na namba bilong ol man i karim hevi bilong tingting planti na wari, na namba bilong ol man i kisim sik bilong tingting i go antap olsem 78 milion samting.
Em i bikpela samting long save hamas manmeri long nau i gat hevi long tingting planti na wari, na long sik bilong tingting. Tasol em i bikpela samting moa long save hau yu na famili bilong yu inap karim hevi bilong ol dispela sik.
Tingting i stap gut i makim wanem samting?
Taim tingting bilong yu i stap gut, yu pilim gutpela na yu inap mekim gut ol samting. Yu inap karim hevi bilong presa, wok gut, na amamas long laip bilong yu.
Sik bilong tingting . . .
I NO makim olsem man i no gat strong o em i gat asusa long sampela samting, o em i mekim sampela samting na em i kisim dispela sik, nogat.
EM wanpela sik we i putim presa long man na i bagarapim tingting bilong em na tingting i no wok gut, na em i no inap kontrolim filings na pasin bilong em.
Planti taim dispela inap mekim na i hatwok long man i pas gut wantaim ol narapela, na em i hatwok long mekim ol nomal samting we yumi save mekim long olgeta de.
Dispela sik inap painim ol man i gat kain kain krismas, kalsa, skin kala, traib, lotu, wanem kain ediukesen ol i gat, o hamas mani ol i save kisim.
Kisim helpim long karim hevi long sik bilong tingting
Sapos yu luksave olsem pasin bilong yu o wanpela long famili i wok long senis, olsem yu save slip tumas, o yu no save slip longpela taim, o yu save kaikai planti o yu save kaikai liklik tasol, o yu bel hevi, wari na tingting planti inap longpela taim. I gutpela long go lukim dokta bilong kisim save long sik bilong yu na kisim helpim long stretim dispela sik. Tasol yu inap go we bilong kisim helpim?
Man husat i gat gutpela savetingting tru i bin stap long graun, Jisas Krais, i tok: “Ol man i no gat sik ol i no save go lukim dokta, tasol ol sikman ol i save go lukim dokta.” (Matyu 9:12) Taim ol lain i gat sik bilong tingting i kisim helpim na marasin i stret, dispela inap daunim sik bilong ol na ol inap stap gut na stap amamas. Em i savepasin long ol i kisim kwik marasin sapos ol i luksave olsem ol mak bilong dispela sik i go bikpela o i stap longpela taim.a
Tru Baibel i no wanpela buk bilong helt, tasol ol tok bilong en inap helpim yumi long sait bilong tingting i stap gut. Mipela i laik kirapim yu long ritim ol atikol long dispela magasin na kisim save long hau Baibel inap helpim yumi long karim ol hevi bilong ol sik bilong tingting.
a Wastaua i no tok wanpela marasin i gutpela o wanpela rot bilong oraitim sik i winim ol narapela. Wan wan man yet i mas skelim gut wanem kain helpim ol i laik kisim, na ol yet i mas wokim disisen bilong ol.