Tingim Hetpris Bilong Yumi Jisas Em i Save Pilim Tru Hevi Bilong Yumi

1-2. (a) Bilong wanem Jehova i salim Pikinini bilong em i kam long graun? (b) Yumi bai stori long wanem samting long dispela atikol? (Hibru 5:​7-9)

INAP olsem 2,000 yia i go pinis, God Jehova i salim Pikinini em i laikim tumas i kam long graun. Bilong wanem em i mekim olsem? Wanpela risen em long helpim ol manmeri long graun long lusim kalabus bilong sin na dai na pinisim olgeta hevi em Satan i bin kamapim. (Jon 3:16; 1 Jon 3:8) Jehova i save tu olsem ol samting i painim Jisas taim em i stap long graun bai redim em long mekim wok olsem Hetpris bilong yumi husat i pilim tru hevi bilong yumi na sori long yumi. Jisas i kirap mekim wok Hetpris bihain long em i kisim baptais long yia 29 C.E.a

² Long dispela atikol, yumi bai stori long olsem wanem ol samting i painim Jisas long graun i helpim em long winim mak long mekim wok olsem Hetpris husat i pilim tru ol hevi bilong yumi. Taim yumi kliagut moa long olsem wanem Jisas i “kamap gutpela olgeta” long mekim dispela wok, dispela bai helpim yumi long pilim isi moa long beten long Jehova na pas gut wantaim em, maski yumi bel hevi long ol sin na pasin kranki yumi mekim.—Ritim Hibru 5:​7-9.

PIKININI GOD I LAIKIM TUMAS I KAM LONG GRAUN

3-4. Wanem ol bikpela senis i kamap long laip bilong Jisas taim em i kam long graun?

³ I gat planti senis i save kamap long laip bilong yumi, olsem yumi lusim haus yumi laikim tru na lusim famili na ol pren bilong yumi na yumi go stap long narapela hap. Em i no isi long mekim ol kain senis olsem. Tasol ol senis i painim yumi ol man i no wankain long ol senis i kamap long laip bilong Jisas. Em i bin stap long heven olsem nambawan pikinini spirit bilong Jehova. Em i save pilim tru pasin laikim bilong Jehova na oltaim em i amamas long mekim wok long “rait sait” bilong God. (Sng. 16:11; Prov. 8:30) Maski i olsem, Filipai 2:7 i tok em i redi long “lusim olgeta samting em i bin holim,” olsem lusim namba em i gat long heven na em i kam stap long graun wantaim ol man i no gutpela olgeta.

⁴ Tingim tu ol samting i kamap long laip bilong Jisas taim em i bon na taim em i liklik pikinini. Jisas i bon long wanpela famili i no gat planti samting bilong skin, na yumi luksave long dispela long ofa em papamama bilong em i givim bihain long em i bon. (Wkp. 12:8; Luk 2:24) Taim dispela man nogut em King Herot i harim olsem Jisas i bon, em i traim long kilim Jisas i dai. Bilong abrusim dai long han bilong Herot, famili bilong Jisas i ranawe i go stap long Isip olsem ol refiuji inap sampela haptaim. (Mat. 2:​13, 15) Tingim, laip bilong Jisas long graun i narapela kain olgeta long laip bilong em long heven!

5. (a) Taim Jisas i stap long graun, em i lukim wanem ol samting i kamap? (b) Olsem wanem ol samting em i lukim i redim em long mekim wok olsem Hetpris? (Lukim tu piksa.)

⁵ Taim Jisas i stap long graun, em i lukim planti manmeri i karim pen na hevi. Na yumi save, em i pilim samting ol man i save pilim taim wanpela ol i laikim tumas i dai. Taim em i stap long graun, ating sampela manmeri em i save long ol i bin dai, olsem waspapa bilong em Josep. Taim Jisas i autim tok, em i bungim ol lepraman, ol aipas, ol man i paralais, na ol papamama em pikinini bilong ol i dai, na em i sori tru long ol. (Mat. 9:​2, 6; 15:30; 20:34; Mak 1:​40, 41; Luk 7:13) Em tru olsem taim em i stap long heven, em i lukim ol manmeri i karim pen na hevi. Tasol taim em i kam long graun olsem wanpela man, nau em i kliagut moa long ol hevi ol man i save karim. (Ais. 53:4) Ol samting i kamap long Jisas long graun i helpim em long pilim ol samting ol man i save pilim, na kliagut long ol bel hevi bilong ol na ol pen ol i karim. Em i pilim samting ol man long graun i save pilim, olsem pilim taiet, bel hevi, na bel sori.

JISAS I PILIM TRU HEVI BILONG OL MANMERI

6. Ol tok piksa bilong Aisaia i givim wanem skul long yumi long pasin bilong Jisas long sori na pilim hevi bilong yumi? (Aisaia 42:3)

⁶ Long wok autim tok bilong Jisas, em i soim olsem em i pilim tru hevi bilong ol man i no gat strong na ol man em ol narapela i rabisim ol. Taim em i mekim olsem, em i truim ol tok profet bilong Baibel. Planti taim Ol Skripsa Hibru i stori long ol man i gat gutpela sindaun na ol man i gat strong ol i olsem ol bikpela diwai na olsem gaden em graun bilong en i gat planti gris. (Sng. 92:12; Ais. 61:3; Jer. 31:12) Tasol ol man i stap rabis na ol man em ol narapela i daunim ol, Baibel i tok ol i olsem pitpit i no gat strong na i laik bruk na olsem lam em paia long wik bilong en i laik pinis em ol samting ol man i no inap yusim. (Ritim Aisaia 42:3; Mat. 12:20) Holi spirit i kirapim profet Aisaia long mekim ol dispela tok piksa bilong tok profet long pasin laikim na pasin sori em Jisas bai soim long ol man nating em ol narapela i tingim ol olsem ol i samting nating.

7-8. Long wanem rot Jisas i truim tok profet bilong Aisaia?

⁷ Matyu em man bilong raitim Gutnius, em i soim olsem Jisas i truim tok profet bilong Aisaia, olsem: “Em bai i no inap brukim pitpit i no gat strong na i laik bruk, na em i no inap kilim i dai lam em paia long wik bilong en i laik pinis.” Sampela mirakel Jisas i bin wokim i helpim ol man em ol narapela i daunim ol na ol i pilim wankain olsem pitpit i no gat strong na i laik bruk, na tu, ol man i no gat hop olsem lam em paia long wik bilong en i laik pinis. Wanpela man Jisas i bin helpim em man i gat sik lepra long bodi olgeta bilong em. Ating dispela man i ting olsem i no gat rot moa long em i kamap orait na em i no inap bung na amamas gen wantaim ol wanfamili na ol pren bilong em. (Luk 5:​12, 13) Na tu, Jisas i bin oraitim wanpela man husat i yaupas na maus bilong em i hevi. Tingim, ating dispela man i save bel hevi tru taim em i lukim ol narapela i amamas long stori wantaim narapela narapela na em i no kliagut long tok ol i mekim. (Mak 7:​32, 33) Tasol i gat sampela samting moa Jisas i mekim.

⁸ Long taim bilong Jisas, planti Juda i bilip olsem pen na hevi man i karim, dispela em i panismen em i kisim long God bikos long ol sin em yet o papamama bilong em i bin mekim. (Jon 9:2) Dispela bilip giaman i mekim na planti em ol i karim hevi, ol i pilim olsem ol i no gutpela tumas. Jisas i truim tok profet bilong Aisaia taim em i oraitim ol man i karim pen na hevi na em i helpim ol long save olsem God i tingim tru ol. Dispela i givim wanem skul long yumi long tingting Jisas i gat long yumi long nau?

9. Olsem wanem Hibru 4:​15, 16 i soim klia olsem Hetpris bilong yumi long heven i save pilim tru hevi bilong ol sinman?

⁹ Ritim Hibru 4:​15, 16. Yumi ken bilip tru olsem oltaim Jisas bai pilim tru ol hevi bilong yumi. Dispela i makim wanem? Man i pilim tru hevi bilong narapela, em i tingim pen na hevi em i karim na em i tingim tu hau dispela man i pilim. Long tok Grik, dispela tok ol i tanim olsem “pilim tru” i makim olsem yumi pilim tru bel sori na pen wanpela i pilim. Pol i bin yusim dispela wankain tok Grik long Hibru 10:34 bilong kamapim klia olsem yumi save pilim hevi bilong ol lain i stap long kalabus. Ol stori bilong ol mirakel Jisas i wokim i kamapim klia olsem em i pilim tru ol pen na hevi ol narapela i karim. Em i no oraitim ol man bikos em i tingim dispela olsem wok em i mas mekim. Em i tingim tru ol dispela man na em i laik helpim ol. Olsem, taim Jisas i oraitim dispela lepraman, em inap stap longwe long em na wokim dispela mirakel. Tasol em i no mekim olsem, em i go klostu long em na tatsim em, na ating em festaim insait long planti yia long wanpela i tatsim dispela lepraman! Na tingim tu yaupas man em Jisas i bin oraitim em. Jisas i bringim em i go longwe long bikpela lain manmeri long hap i no gat nois na taim tupela yet i stap, Jisas i oraitim em. Na taim wanpela Farisi i luk daun long meri husat i tanim bel long ol sin bilong em na wasim lek bilong Jisas wantaim aiwara bilong em na draim wantaim gras bilong em, Jisas i mekim ol tok bilong difendim dispela meri. (Mat. 8:3; Mak 7:33; Luk 7:44) Jisas i no heitim ol man i gat ol bagarap long bodi na ol man i bin mekim ol bikpela sin. Em i welkamim ol na mekim gut long ol na em i soim olsem em i sori tru long ol. Yumi ken bilip tru olsem Jisas i save pilim tru ol hevi bilong yumi wankain olsem em i bin mekim long ol dispela manmeri long bipo.

BIHAINIM PASIN BILONG HETPRIS BILONG YUMI LONG NAU

10. Yumi ken yusim wanem ol samting long nau bilong helpim ol yaupas na ol aipas? (Lukim tu ol piksa.)

¹⁰ Olsem ol gutpela disaipel bilong Jisas, yumi wok strong long bihainim pasin bilong em long soim pasin laikim, pilim hevi bilong ol narapela, na sori long ol. (1 Pita 2:21; 3:8) Em tru olsem yumi no inap oraitim ol yaupas na ol aipas, tasol yumi ken helpim ol long sait bilong bilip. Olsem, long nau ol buk na nius bilong Baibel em yumi gat i stap long winim 100 tokples sain. Na bilong helpim ol man i gat hevi long ai, ol i wokim ol brel pablikesen bilong ol aipas long winim 60 tokples, na tu, ol vidio bilong yumi we i gat stori bilong odio long winim 100 tokples. Olgeta dispela samting i helpim ol yaupas na ol aipas long go klostu long Jehova na Pikinini bilong em.

11. Olsem wanem oganaisesen bilong Jehova i bihainim pasin bilong Jisas long tingim tru ol manmeri bilong kain kain bekgraun? (Aposel 2:​5-7, 33) (Lukim tu ol piksa.)

¹¹ Oganaisesen bilong Jehova i laik tru long helpim ol manmeri bilong olgeta kain bekgraun. Tingim olsem bihain long Jisas i kirap bek, em i kapsaitim holi spirit na bai olgeta manmeri i go long bung bilong Pentikos, olgeta wan wan i ken harim gutnius “long tokples bilong ol” yet. (Ritim Aposel 2:​5-7, 33.) Oganaisesen i bihainim pasin bilong Jisas na ol i wokim ol buk na nius bilong Baibel long winim 1,000 tokples, na sampela bilong ol dispela tokples em liklik lain manmeri tasol i save mekim. Olsem, liklik lain manmeri tasol long Not na Saut Amerika i save mekim ol tokples Amerindian. Maski i olsem, ol i wokim moa long 160 pablikesen long ol dispela tokples na bai planti manmeri moa i ken harim gutnius. Na tu, ol i wokim ol pablikesen bilong yumi long winim 20 Romani tokples. Em as na planti tausen manmeri i mekim ol dispela tokples i kirap long lotuim Jehova.

12. Oganaisesen bilong Jehova i givim wanem narapela helpim long ol manmeri?

¹² Oganaisesen bilong Jehova i stiaim wok bilong autim gutnius long olgeta hap bilong graun, na tu, ol i mekim rilif wok bilong helpim ol manmeri i karim hevi bilong ol netrol disasta. Bilong mekim olsem, planti tausen volantia i redi long mekim ol samting bilong helpim ol bratasista em ol i sot long ol samting. Na tu, oganaisesen i stiaim wok bilong sanapim ol simpol haus o bilding bilong lotuim Jehova na bai planti manmeri moa i ken kam bung long ol dispela haus na kisim sampela save moa long pasin bilong God long laikim ol.

HETPRIS BILONG YUMI I KEN HELPIM YU

13. Wanem sampela rot Jisas i helpim yumi?

¹³ Jisas em i gutpela wasman bilong yumi na em i save tingim tru ol samting yumi wan wan i nidim bilong stap strong long bilip. (Jon 10:14; Efe. 4:7) Sampela taim, ol samting i kamap long laip inap mekim na yumi pilim olsem lam em paia long wik bilong en i laik pinis o olsem pitpit i no gat strong na i laik bruk. Yumi inap bel hevi tru bikos yumi gat wanpela bikpela sik, o samting yumi laik mekim i no kamap gut, o ating yumi gat hevi wantaim wanpela wanbilip na yumi no pas gut moa wantaim em. Ating yumi inap pilim hatwok long lusim tingting long ol pen yumi karim long nau na putim tingting long ol gutpela samting yumi bilip na wet long ol bai kamap bihain. Tasol tingim olsem Jisas i luksave long ol hevi yu karim na em i kliagut long samting yu pilim long bel. Pasin sori bilong Jisas i kirapim em long mekim samting bilong helpim yu. Olsem, em i ken yusim holi spirit bilong em long strongim yu taim yu no gat strong. (Jon 16:7; Tai. 3:6) Na tu, Jisas i ken yusim “ol man olsem ol presen” na ol narapela wanbilip long strongim, sapotim, na helpim yu.—Efe. 4:8.

14. Yumi ken mekim wanem taim yumi bel hevi?

¹⁴ Sapos bel hevi i daunim yu tru, orait tingim tingim long bel wok Jisas i mekim olsem Hetpris bilong yumi. Tingim olsem Jehova i salim em i kam long graun bilong givim laip bilong em olsem pe bilong baim bek yumi na helpim em long kliagut moa long ol hevi em ol sinman i save karim. Taim yumi bel hevi long ol sin bilong yumi o ol pasin kranki yumi mekim, Jisas i save redi na em i laik tru long helpim yumi “long taim stret.”—Hib. 4:​15, 16.

15. Wanem samting i helpim wanpela brata husat i bin lusim lain sipsip bilong Jehova long kam bek long kongrigesen? Stori long dispela.

¹⁵ Jisas i save stiaim tu ol manmeri em ol i wok strong long painim na helpim ol lain em ol i lusim lain sipsip bilong Jehova. (Mat. 18:​12, 13) Tingim ekspiriens bilong Stefano.b Em i bin seperet long kongrigesen inap 12-pela yia, na wanpela taim em i go long miting. Em i tok: “Em hatwok tru long mekim olsem, tasol mi laik kam bek insait long lain famili bilong Jehova. Ol elda i bin bung wantaim mi long dispela taim, ol i welkamim mi. Sampela taim, mi save bel hevi olsem mi bin lusim Jehova inap sampela haptaim na dispela i mekim na mi laik givap. Tasol ol brata i helpim mi long tingim olsem Jehova na Jisas i laik olsem mi mas sanap strong na mi no ken givap. Taim kongrigesen i kisim mi bek, olgeta long kongrigesen i welkamim mi na famili bilong mi. Bihain meri bilong mi i tok orait long stadi long Baibel, na long nau mipela famili olgeta i lotuim Jehova.” Yumi ken save tru olsem gutpela Hetpris bilong yumi i save amamas tru long lukim ol man i tanim bel na kisim helpim ol i nidim bilong kam bek long kongrigesen!

16. Bilong wanem yu tenkyu olsem yumi gat Hetpris husat i save pilim tru hevi bilong yumi?

¹⁶ Taim Jisas i stap long graun, em i helpim planti manmeri long taim stret ol i nidim helpim. Long nau tu, yumi ken bilip tru olsem Jisas bai helpim yumi long olgeta kain taim yumi nidim helpim. Na long nupela taim klostu nau bai kamap, em bai helpim ol man i daun long God long kamap fri olgeta long ol pen na hevi em sin i kamapim. Yumi tenkyu tru long God bilong yumi Jehova, em bikpela pasin laikim na pasin marimari i kirapim em long makim Pikinini bilong em long stap olsem Hetpris bilong yumi husat i save pilim tru ol hevi bilong yumi!