“Yu Man i Dia Tumas”!

1-2. Wanem samting i ken helpim yumi long bilip tru olsem yumi dia tumas long ai bilong Jehova?

NAMEL long ol gutpela wokman bilong Jehova, i gat sampela em ol i pilim olsem ol i no gutpela tumas long ai bilong Jehova. Ating ol i bin pilim olsem, long wanem, ol narapela i mekim ol i pilim olsem ol i samting nating. Yu tu i bin pilim olsem? Sapos olsem, yu ken mekim wanem na bai yu ken save tru olsem yu dia tumas long ai bilong Jehova?

² Yu ken kisim helpim long rot bilong ritim ol stori bilong Baibel we i kamapim klia tingting Jehova i laik bai ol manmeri i mas i gat long ol narapela na pasin ol i mas mekim long ol. Pikinini bilong em Jisas i bin mekim gutpela pasin long ol narapela na rispektim ol. Taim em i mekim olsem, em i soim olsem em na Papa bilong em i tingim tru ol manmeri i gat pasin daun em ol i pilim olsem ol i samting nating long ai bilong ol narapela. (Jon 5:19; Hib. 1:3) Long dispela atikol, yumi bai stori long (1) hau Jisas i helpim ol manmeri long luksave olsem ol i dia tumas, na (2) hau yumi ken bilip tru olsem yumi dia tumas long ai bilong Jehova.—Hag. 2:7.

HAU JISAS I HELPIM OL MANMERI LONG LUKSAVE OL I DIA TUMAS

3. Jisas i mekim wanem long ol Galili em ol i kam long em bilong helpim ol?

³ Long namba 3 raun bilong Jisas long mekim wok autim tok long Galili, planti manmeri i kam painim Jisas na ol i putim yau long ol tok em ol i skulim ol long en na em i oraitim sik bilong ol manmeri. Jisas i luksave olsem “ol man i bin mekim nogut long ol na ol i stap nogut tru olsem ol sipsip i no gat wasman.” (Mat. 9:36) Ol hetman bilong lotu bilong ol i bin tingim ol dispela manmeri olsem ol i samting nating na kolim ol olsem “ol i lain bilong bagarap tasol.” (Jon 7:​47-49) Tasol Jisas i mekim gutpela pasin long ol na soim rispek long ol long rot bilong lusim haptaim long skulim ol na oraitim ol sik bilong ol. (Mat. 9:35) Na tu, bilong helpim planti manmeri moa, em i trenim ol aposel bilong em long autim tok na givim strong long ol long oraitim ol sikman na mekim orait ol man i gat bagarap long bodi.—Mat. 10:​5-8.

4. Yumi inap kisim wanem skul long pasin Jisas i mekim long ol manmeri i gat pasin daun em ol i putim yau long em?

⁴ Jisas i mekim gutpela pasin na pasin rispek long ol dispela manmeri i gat pasin daun, na long dispela rot em i soim olsem em na Papa bilong em i tingim tru ol dispela manmeri olsem ol i dia tumas, maski ol narapela i luk daun long ol. Sapos yu lotuim Jehova, tasol yu pilim olsem yu no gutpela tumas long ai bilong em, orait tingim pasin Jisas i mekim long ol dispela manmeri em ol i gat pasin daun na ol i laik kisim skul i kam long em. Taim yu tingim samting Jisas i mekim, dispela bai helpim yu long tingim olsem yu dia tumas long ai bilong Jehova.

5. Wanem samting i bin painim wanpela meri long Galili em Jisas i bungim em?

⁵ Jisas i skulim bikpela lain manmeri, tasol em i lusim haptaim tu long helpim olgeta wan wan bilong ol. Olsem, taim Jisas i mekim wok autim tok bilong em long Galili, em i bungim wanpela meri husat i bin karim blut inap 12-pela yia. (Mak 5:25) Sik bilong em i mekim na dispela meri i stap doti olsem Lo i makim, so sapos ol narapela i tatsim em, ol inap kamap doti tu. Dispela i mekim na em i no bung wantaim ol narapela na em i save stap em yet. Na tu, em i no inap joinim ol narapela long mekim lotu long Sinagog na long ol narapela bikpela bung bilong lotu. (Wkp. 15:​19, 25) So i klia tru olsem dispela meri i karim bikpela hevi long sait bilong skin na bel na tingting.—Mak 5:26.

6. Dispela meri i karim blut i bin mekim wanem bilong kamap orait?

⁶ Dispela meri i gat sik i laik olsem Jisas i oraitim em. Tasol em i no kam stret na lukim Jisas. Bilong wanem? Long wanem, ating em i pilim sem o ol narapela i semim em long sik bilong em. O ating em i pret olsem Jisas bai sakim em bikos long em i kam namel long bikpela lain manmeri taim em i doti yet olsem Lo i makim. Olsem na em i tatsim tasol liklik hap bilong klos bilong Jisas na em i bilip tru olsem dispela samting bai mekim em i kamap orait. (Mak 5:​27, 28) Tru tumas, gutpela samting i kamap long bilip bilong em na em i kamap orait. Na taim Jisas i askim long husat i tatsim klos bilong em, meri i tokaut olsem em i bin mekim olsem. Jisas i mekim wanem pasin long em?

7. Jisas i mekim wanem long dispela meri i bel hevi tru? (Mak 5:34)

⁷ Jisas i mekim gutpela pasin na pasin rispek long dispela meri. Em i luksave olsem meri “i pret na guria.” (Mak 5:33) So Jisas i tingim samting meri i pilim long bel na em i mekim gutpela tok long em. Em i kolim em long “pikinini,” em wanpela tok i makim olsem Jisas i mekim gutpela tok long em, na tu, em i pilim tru ol samting meri i pilim long bel. (Ritim Mak 5:34.) Stadi nout bilong dispela tok pikinini i tok dispela em “wanpela taim tasol long Baibel we Jisas i kolim wanpela meri olsem ‘pikinini,’ ating Jisas i mekim olsem bikos long sik meri i gat na em i ‘pret na guria.’” Piksaim long tingting bikpela bel isi tru dispela meri i pilim long bel! Sapos Jisas i no bin mekim kain gutpela tok bilong mekim isi bel bilong em, ating meri bai go bek na bel hevi yet long samting em i mekim, maski sik bilong em i kamap orait. Tasol Jisas i helpim em long tingim em yet olsem God i tingim em, olsem wanpela pikinini meri i dia tumas long gutpela Papa bilong yumi long heven.

8. Wanpela sista long Brasil i karim wanem ol hevi?

⁸ Long nau tu, ol gutpela wokman bilong God i save karim ol hevi long sait bilong helt na dispela i save bagarapim tru bel na tingting bilong ol. Mariaa em wanpela painia sista long Brasil, em i bin bon wantaim ol bagarap long bodi, dispela i mekim na em i no gat tupela lek na left han bilong em. Em i tok: “Long skul ol i save buli long mi bikos long ol bagarap mi gat long bodi. Ol i save kolim mi long kain kain nem na dispela i save bagarapim tru bel bilong mi. Na insait long famili bilong mi tu, ol i save mekim mi pilim olsem mi samting nating tasol.”

9. Wanem samting i helpim Maria long tingim em yet olsem em i dia tumas long Jehova?

⁹ Maria i kisim helpim long wanem rot? Taim em i kamap wanpela Witnes Bilong Jehova, ol wanbilip Kristen i mekim gut bel bilong em na ol i helpim em long holim wankain tingting olsem Jehova i gat long em. Em i tok: “Mi no inap long kolim nem bilong olgeta wan wan bilong ol em ol i bin helpim mi! Mi tok tenkyu long Jehova long em i givim mi dispela naispela famili em ol wanbilip bilong mi.” Ol bratasista Kristen i bin helpim Maria long pilim olsem em i dia tumas long ai bilong God.

10. Maria Makdala i bin karim wanem ol hevi? (Lukim tu ol piksa.)

¹⁰ Skelim hau Jisas i bin helpim narapela meri em Maria Makdala. Em i gat 7-pela spirit nogut i stap long em! (Luk 8:2) So ating em i mekim ol toktok na ol pasin i narapela kain bikos long ol samting em ol dispela spirit nogut i stiaim em long mekim na dispela i mekim na ol narapela i save sakim em o abrusim em tasol. Long dispela haptaim em i karim dispela hevi, em i pilim olsem ol narapela i no laikim em, em i pret, na em i pilim olsem em i no gat helpim. I luk olsem Jisas i bin rausim ol dispela spirit nogut i putim hevi long em na em i kamap wanpela disaipel bilong Jisas. Wanem narapela rot Jisas i helpim Maria Makdala long kliagut olsem em i dia tumas long God?

11. Jisas i mekim wanem bilong soim Maria Makdala olsem em i dia tumas long God? (Lukim tu ol piksa.)

¹¹ Jisas i singautim Maria Makdala long go wantaim em long ol raun bilong em long mekim wok autim tok.b Long dispela rot, Maria i wok yet long kisim gutpela helpim taim em i harim Jisas i wok long skulim ol narapela manmeri. Na tu, Jisas i kamap long em long de stret em i kirap bek. Na Maria em wanpela bilong ol fes disaipel em Jisas i bin toktok wantaim em long dispela de. Na Jisas i givim wok long em long i go tokim ol narapela aposel olsem em i kirap bek pinis. Ol dispela samting Jisas i mekim long Maria i soim olsem Maria i dia tumas long Jehova!—Jon 20:​11-18.

12. Wai na bekgraun bilong Lidia i mekim na em i pilim olsem i no gat wanpela i laikim em?

¹² Wankain olsem Maria Makdala, planti long nau i pilim olsem i no gat wanpela i laikim ol. Lidia em wanpela sista long Spen, em i tok taim em i stap yet long bel bilong mama, mama i bin tingting long rausim bel. Na taim Lidia i liklik meri, em i tingim mama i bin givim baksait long em na mekim ol tok i rabisim em. Em i tok: “Mak mi putim long winim long laip bilong mi em long mekim ol narapela i orait long mi na laikim mi. Mi pret olsem i no gat wanpela bai laikim mi bikos ol pasin mama i mekim long mi i mekim na mi pilim olsem mi meri nogut tru.”

13. Wanem samting i helpim Lidia long tingim em yet olsem em i dia tumas long Jehova?

¹³ Bihain long Lidia i kisim save long tok i tru, em i save beten, stadi, na tu, ol wanbilip Kristen i save mekim ol gutpela tok na pasin long em, na dispela i helpim em long kliagut olsem em i dia tumas long ai bilong Jehova. Em i tok: “Planti taim man bilong mi i save tokim mi olsem em i laikim mi. Na olgeta taim, em i save tokim mi olsem mi gat ol gutpela pasin. Ol narapela gutpela pren i mekim wankain pasin tu long mi.” Yu inap tingim wanpela husat i nidim helpim long kliagut olsem em i dia tumas long ai bilong Jehova?

HOLIM WANKAIN TINGTING OLSEM BILONG JEHOVA LONG YUMI

14. Olsem wanem 1 Samuel 16:7 i helpim yumi long holim wankain tingting olsem Jehova i gat long yumi? (Lukim tu blok “Wai na Jehova i Save Tingim Tru Lain Bilong Em?”

¹⁴ Tingim olsem Jehova i no gat wankain tingting long yu olsem ol man bilong graun i gat long yu. (Ritim 1 Samuel 16:7.) Jehova i no save skelim yu na ting yu dia tumas long em bikos long gutpela lukluk bilong yu, biknem na namba yu gat, o bikpela ediukesen yu kisim, nogat. (Ais. 55:​8, 9) So holim wankain tingting olsem Jehova i gat long yu, na i no ken holim kain tingting em ol man bilong graun i save skelim ol narapela long en. Yu inap ritim ol stori bilong Baibel we i soim olsem Jehova i save tingim tru ol manmeri em ol i pilim olsem ol i samting nating, olsem Elaija, Naomi, na Hana. Na yu ken raitim tu ol samting i painim yu na i soim olsem Jehova i laikim yu na i tingim yu tru. Na tu, yu ken mekim riviu long ol tok long ol pablikesen bilong yumi we i stori long tingting Jehova i gat long yu.c

15. Wai na Jehova i tingim Daniel olsem “man i dia tumas” long em? (Daniel 9:23)

¹⁵ Luksave olsem pasin bilong yu long stap gut long Jehova i mekim na yu dia tumas long em. Wanpela taim, ating em long taim profet Daniel i gat 90 krismas samting, em i “taiet tru na strong bilong [em] i pinis.” (Dan. 9:​20, 21) Jehova i mekim wanem bilong strongim em? God i salim ensel Gebriel i go bilong strongim Daniel olsem em i “man i dia tumas” long em na God i bin harim ol beten bilong em. (Ritim Daniel 9:23.) Wanem samting i mekim na Daniel em i dia tumas long God? Long olgeta gutpela pasin bilong Daniel, God i tingim pasin bilong em long laikim stretpela pasin na pasin bilong em long stap gut long God. (Ese. 14:14) Jehova i larim stori bilong em i stap long Baibel bilong mekim gut bel bilong yumi. (Rom 15:4) Na tu, em i save harim ol beten bilong yumi na tingim tru pasin bilong yumi long laikim stretpela pasin na pasin bilong yumi long stap gut long wok bilong em.—Mai. 6:8; Hib. 6:10.

16. Wanem samting i ken helpim yu long tingim Jehova olsem wanpela Papa i gat pasin laikim?

¹⁶ Tingim Jehova olsem wanpela Papa i laikim yu tru. Em i laik helpim yu, na em i no laik painim ol popaia bilong yu. (Sng. 130:3; Mat. 7:11; Luk 12:​6, 7) Planti wokman bilong God i tingim tingim dispela long bel na dispela i helpim ol long daunim kain tingting olsem ol i samting nating. Olsem, tingim Michelle em wanpela sista long Spen, em i pilim olsem i no gat wanpela i laikim em na em i pilim yusles bihain long man bilong em i save kolim ol tok bilong rabisim em inap planti yia. Em i tok: “Taim mi pilim yusles, mi save piksaim long tingting olsem Jehova i karim mi long han bilong em na em i laikim mi tru na lukautim mi gut.” (Sng. 28:9) Lauren em wanpela sista long Saut Afrika, em i save tokim em yet olsem: “Sapos Jehova i ken bringim mi i go klostu long em wantaim pasin laikim, na larim mi stap klostu long em inap planti yia na yusim mi long skulim ol narapela, orait dispela i makim olsem em i tingim mi olsem samting i dia tumas.”—Hos. 11:4.

17. Wanem samting i ken helpim yu long bilip tru olsem Jehova i orait long yu? (Buk Song 5:12) (Lukim tu piksa.)

¹⁷ Bilip tru olsem Jehova i orait long yu. (Ritim Buk Song 5:12.) Devit i tok pasin bilong Jehova long orait long ol wokman bilong em i wankain olsem “bikpela hap plang bilong pait” na i save lukautim ol stretpela man. Taim yu save olsem Jehova i orait long yu na lukautim yu, dispela i ken banisim yu na yu no inap i gat tupela tingting olsem Jehova i no orait long yu. Hau yu ken save olsem Jehova i orait long yu? Olsem yumi stori pinis, Jehova i givim yumi Baibel bilong helpim yumi long bilip tru olsem em i orait long yumi. Na tu, em i yusim ol elda, ol gutpela pren, na ol narapela long rimaindim yumi olsem yumi dia tumas long ai bilong em. Yu yet i mas mekim wanem taim yu kisim ol kain tok olsem bilong strongim yu?

18. Wai na yu mas orait long kisim gutpela tok amamas em ol narapela i mekim long yu?

¹⁸ No ken sakim ol gutpela tok amamas i kam long ol narapela em ol i save gut long yu na ol i laikim yu. Tingim olsem Jehova i yusim ol long helpim yu long save olsem em i orait long yu. Michelle em yumi stori pinis long em, em i tok: “Isi isi mi lain long bilip long ol gutpela tok bilong ol narapela. Tru mi hatwok long mekim olsem, tasol mi save olsem em samting Jehova i laik mi mas mekim.” Michelle i kisim gutpela helpim long pasin bilong ol elda long helpim em. Nau em i mekim wok painia na em i volantia long wok long Betel.

19. Wai na yu ken bilip tru olsem yu dia tumas long ai bilong God?

¹⁹ Jisas i kirapim yumi long tingim olsem yumi dia tumas long ai bilong Papa bilong yumi long heven. (Luk 12:24) So yumi ken bilip tru olsem Jehova i lukim yumi olsem samting i dia tumas. Na yumi no ken tru lusim tingting long dispela! Na yumi ken wok strong long helpim ol narapela long lukim olsem ol i dia tumas long ai bilong God!