Skelim Wok Bilong Ol Gavman
Skelim Wok Bilong Ol Gavman—Bilong Wanem?
Nau inap sampela mun dispela nius “Kirap!” bai stori long “Skelim Wok Bilong Ol Gavman”
YUMI olgeta i save, wok politik i bin mekim bikpela samting long sindaun bilong ol man na long yumi wan wan tu. Tok ples bilong yumi, na sindaun bilong yumi, na wok yumi holim, na ating lotu bilong yumi tu, em wok politik bilong ol gavman i bin mekim sampela samting long ol dispela samting bilong yumi.
I mas i gat wanpela gavman i stap, na yumi laik bai em i ken inapim ol laik bilong yumi. Orait wanem kain gavman i gutpela moa? Dispela i samting bilong yumi o nogat?
Nau mipela laik toksave olsem inap sampela mun dispela nius Kirap! bai stori long “Skelim Wok Bilong Ol Gavman,” na em bai toktok long ol gavman olsem gavman monaki, na aristokrat, na oligaki, na plutokrat, na demokrat, na ripablik, na otokrat, na Fasis, na Natsi, na Soselis, na Komyunis.
Taim ol man i bosim graun ol i save mekim kain kain pasin, tasol yumi ken stori long sampela pasin tasol ol i mekim. Na ol stori i no ken toktok long olgeta samting bilong politik; ol bai stori long sampela tasol; na ol stori i no bilong helpim sampela lain politik na daunim sampela lain, o kirapim ol man long bihainim sampela, nogat. Kirap! bai bihainim tok i stap long pes 5, i tok: “Em i kamapim long ples klia as bilong ol samting nau i kamap long graun, tasol em i no helpim wanpela lain politik, o litimapim ol man bilong wanpela kain skin na daunim ol narapela, nogat.”
Ol dispela stori “Skelim Wok Bilong Ol Gavman” ol bai “kamapim . . . as bilong ol samting nau i kamap long graun,” na bai yumi ken save long ol hevi nau i painim ol gavman em ol man i bosim.
Wanpela buk (The Columbia History of the World) i tok: ‘Sapos yumi skelim ol samting, olsem gavman na lotu na pasin bilong ol man na ol lain bilong ol na ol tok ples na ol wok samting bilong ol man na ol samting ol i wetim i kamap, bai yumi save, nau em taim bilong bikpela hevi. Ol gavman bai pilim dispela hevi. Ol man i save sakim ol lo na sakim ol gavman i kamapim ol dispela lo; tasol 100 yia bipo i no olsem. Nau long planti hap sampela lain i redi long bagarapim ol bikpela haus bilong gavman, na bagarapim ol kot, na bagarapim ol yunivesiti, na tromoi bom long ol haus embasi. Ol man i belhat na i laik daunim ol lo. Ol i laik bruk bruk na i stap narapela narapela lain na bai i no gat gavman samting i bosim ol.’
Sapos tru ol man i mekim dispela samting, olsem wanem long bihain? Ol samting bai bagarap, o olsem wanem? Tru tumas, nau i olsem ol gavman i sanap long kot, tasol i no ol man tasol i skelim wok bilong ol, nogat; nau God yet i skelim ol. Ol man i bin traim kamapim gutpela gavman inap planti handet yia, tasol yumi lukim ol gavman i sot. Olsem na nau God yet i gat tok long ol. Sapos yumi tingim wok ol gavman i bin mekim inap planti handet yia pinis, yu ting i stret ol i mas i stap na mekim olsem yet i go? O yu ting God bai skelim na em bai rausim ol dispela gavman ol man i as bilong en? Na sapos God i rausim, wanem samting em bai putim olsem senis bilong ol?
Inap sampela mun Kirap! bai stori long “Skelim Wok Bilong Ol Gavman,” na dispela bai helpim yu long save long wok bilong ol gavman, na bai yu amamas, long wanem, bai yu save i gat wanpela gutpela gavman bai kamap bihain. Na gutpela samting tru, em yu inap i stap na lukim dispela gutpela samting i kamap!
[Ol Piksa long pes 9]
Taim God i skelim wok ol gavman i bin mekim, em bai amamas, o nogat?
[Kredit Lain]
WHO photo/PAHO by J. Vizcarra