Wanpela Kain Wok Singsing i Kamapim Amamas Bilong Oltaim
TAIM MI yangpela yet, mi pasim tok pinis long bel bilong mi bai mi kamap meri bilong singsing, em olsem wok bilong mi. Bihain mi kamap meri bilong wanpela kain singsing ol i kolim fado, na mi kisim nem long dispela long wanpela biktaun em Lisbon. Long Potugal tasol i gat dispela kain musik fado na em wanpela kain musik bilong kirapim tingting bilong ol man long ol gutpela samting i bin kamap long i stap bilong ol long bipo. Na liklik taim bihain mi singsing long ai bilong ol man long ol narapela taun long Potugal, na tu mi singsing long nambawan redio-stesen bilong Potugal, em Emissora Nacional.
Bihain menesa bilong mi i wokim rot bambai mi ken i go long Spen long wanpela raun bilong mekim singsing long ol taun olsem Madrid, na Baselona, na Saragosa, na Bilbao. Mi mekim singsing pinis long Frans na bihain mi go i stap tupela yia long wanpela hap bilong Afrika, em Angola. Long dispela hap mi mekim singsing long planti biktaun, na long yia 1972 ol i makim mi i kamap olsem “Kwin bilong Fado.”
Tasol taim mi singsing nek bilong mi i save antap, olsem na mi laikim tru ol musik bilong bipo, long wanem nek bilong mi i stret long dispela kain singsing. Olsem na taim mi go bek long Lisbon mi kirap stadi long dispela kain musik bilong bipo. Tru mi givim bel olgeta long wok singsing bilong mi, tasol mi no amamas tumas. Bel bilong mi i hangre long ol samting bilong spirit. Mi laik kam klostu long God, tasol mi no save long rot bilong mekim olsem.
Long yia 1973 mi raun singsing long Brasil. Wanpela taim mi mekim singsing long televisen, na long nait ol i singautim mi wantaim ol narapela i bin mekim singsing samting i go long wanpela pati. I no longtaim na meri bilong menesa bilong mi bilong Brasil i kamapim tingting bilong em long ol hevi i save kamap long graun. Em i tok, ating God i save long rot bilong stretim ol hevi na i gutpela sapos mipela tingim dispela samting. Mi kirap nogut, long wanem em i no pret long kamapim dispela tok. Mi tokaut olsem mi bilip long God. Pati i no pinis yet, na dispela meri i mekim gutpela pasin long mi na givim wanpela buk long mi, em Tok i Tru i Bringim Man long Laip Oltaim. Long dispela taim mi no save em i wanpela Witnes Bilong Jehova; tasol bihain mi save.
Laspela Plet Singsing Bilong Mi
Bihain liklik mi go bek long Potugal bilong wokim namba 3 plet singsing bilong mi, na long tingting bilong mi mi gat bikpela laik long go bek gen long Brasil bilong pinisim dispela raun singsing bilong mi. Tasol long dispela taim mi no save liklik olsem dispela plet singsing mi laik wokim em bai laspela plet singsing bilong mi.
Taim mi stap long Lisbon, wanpela yangpela meri i kam long haus bilong mi bilong tokim mi long ol gutpela samting em Kingdom bilong God bai kamapim long graun. Mi putim gut yau taim em i kaunim ol hap bilong Baibel i stori long ol gutpela senis God i tok promis long kamapim bilong helpim ol man i krai long stretpela pasin i mas kamap.
Ol dispela tok mi harim i kirapim tru bel bilong mi. Inap longtaim pinis bel bilong mi i krai tru long kisim ol dispela gutpela samting em dispela meri i stori long en long Baibel. Dispela tok i mekim gut bel bilong mi, long wanem mi yangpela yet tasol mi katim pinis marit bilong mi; man bilong mi i lusim mi na kisim narapela meri.
Mi kirap nogut tru taim dispela meri i askim mi long kisim dispela wankain buk olsem mi kisim pinis long Brasil! Bihain mitupela i stori moa na mi kisim save olsem i gat wanpela samting i winim biknem na mani. Mi gat strongpela laik long lain moa long ol dispela gutpela promis i stap long Baibel.
Wanpela Bikpela Samting Mi Mas Tingim
Wanpela Witnes i stadi Baibel wantaim mi long olgeta wik na mi kisim bikpela amamas long dispela. I no longtaim na mi kirap long kam klostu long dispela Man i bin wokim mi, em God Jehova, na mi pas gut wantaim em olsem wanpela pren.
I gat sampela samting i laik traim mi taim mi tingting pinis long lusim dispela wok singsing—em wok mi kisim bikpela mani long en. Sampela i strong long mi mas go bek long Brasil. Na sampela i laik wokim wanpela kontrak wantaim mi long mekim singsing long Poto long hap bilong not long Potugal. Tingting bilong ol i olsem: Sapos mi no stap moa long Lisbon, ating bai mi senisim tingting bilong mi na mekim yet wok singsing.
Tasol mi tingting pinis long samting mi laik mekim. Mi gat tingting long go long Frans na stap wantaim susa bilong mi em i marit pinis, long wanem mi ting long dispela hap bai i no gat wanpela samting inap pulim mi na bai mi go bek long mekim wok singsing gen. Tasol susa wantaim man bilong em i nolaik tru long nupela bilip bilong mi. Mi gat laik yet long ol Witnes i stadi Baibel wantaim mi long olgeta wik, tasol tupela i no larim mi i stadi long haus bilong ol. Tasol mi no pret—mi mekim Baibel-stadi long narapela hap, maski em 30 kilomita i go i kam. Orait bihain tupela i tokim mi long lusim haus bilong ol.
Nau mi stap wanpis, olsem na mi kisim wok long wanpela manimeri. Em i laik kisim malolo inap 3-pela mun long wanpela ailan long hap bilong Grik—ailan em bilong dispela meri yet, na em i singautim mi i go wantaim em. Tasol nogut mi stap longwe long lain bilong Jehova na bilip bilong mi i bagarap; olsem na mi no go wantaim em.
Em nau, mi inap i go long kibung distrik bilong ol Witnes Bilong Jehova bilong yia 1974 long Tulus long Frans. Mi sindaun long hap ol Potugal i sindaun long en na harim ol tok long tok ples Potugal. Winim 12,000 manmeri i kam bung. Long dispela kibung mi kisim baptais bilong makim olsem mi dediket pinis long God Jehova. Em namba wan taim mi bin i go long wanpela kibung, tasol em laspela taim ol Witnes bilong Potugal i mas i go long narapela kantri bambai ol i ken kibung. Long dispela taim bipo long Potugal i gat tambu long ol i mekim ol bikpela kibung. Tasol long yia bihain (olsem 1975) dispela tambu i pinis na ol i larim ol Witnes i mekim ol kibung long Potugal.
Mi Kisim Nupela Wok
Inap wanpela mun mi wok wantaim ol narapela long redim ol samting bilong kibung long Tulus na dispela i strongim bilip bilong mi. Em i gutpela samting tru mi ken bung olgeta de wantaim ol strongpela brata sista Kristen em ol i bin stap strong inap planti yia na ol i holimpas bilip bilong ol taim gavman nogut bilong Salazar i bosim Potugal!
Mi raun wantaim ol brata sista i mekim wok autim tok long olgeta de na dispela i kirapim strongpela laik long bel bilong mi na nau mi tu mi laik mekim dispela wok autim tok long olgeta de. Olsem na 6-pela mun bihain long taim mi kisim baptais mi kirap mekim dispela wok long Potugal. Na liklik taim bihain ol i singautim mi i go mekim dispela wok long narapela hap. Na yu ting husat i poromanim mi? Em Maria Eulalia da Luz; em dispela Witnes i givim buk Tok i Tru long mi long Lisbon!
Ples Ol i Bin Mekim Pait long En
Long Potugal long hap bilong Saut, em namba wan hap ol i salim mitupela i go mekim wok autim tok long en. Long yia 1974 ol man i bin les long gavman na ol i mekim bikpela pait na daunim gavman, na bihain long en ol Komyunis i bosim dispela hap bilong Potugal. Long ol liklik taun long provins bilong Baixo Alentejo—em ol ples mipela autim tok long en—ol man i no sindaun isi. Olsem na i no longtaim na ol i kirap mekim nogut long mipela.
Ol i laik pretim mipela na bai mipela i lusim wok bilong mipela long autim tok, olsem na planti taim ol i tromoi ston long haus mipela slip long en na mipela i no slip gut long nait. Bihain ol i tromoi bom na dispela i bagarapim lok long dua bilong haus. Na wanpela samting i kamap na mipela kirap nogut long en, olsem: Wanpela man em pastaim em i birua long wok bilong mipela, em i givim narapela haus slip long mipela i winim namba wan haus, long wanem em i save dispela namba wan haus mitupela i bin slip long en i no stap long gutpela hap. Tasol wanpela taim mipela i no stap long haus na ol birua i kam brukim dua, na taim mipela i kam bek mipela i kirap nogut tru long lukim dispela papa bilong haus i was i stap, nogut ol birua i kam bek na bagarapim haus! Mipela i tok tenkyu long Jehova long Em i bin lukautim mipela.—Buk Song 145:18, 19.
Tasol maski ol man i mekim pasin birua long mipela, wok bilong mipela long dispela hap i karim kaikai. Taim mipela lusim dispela hap, mipela i amamas long lukim tupela nupela kongrigesen bilong ol Witnes Bilong Jehova i kamap; em ol i gat gutpela Haus Kingdom bilong ol yet.
Nupela Ples Wok Bilong Mipela
Long yia 1977 ol i salim mipela i go autim tok long ol ailan bilong Madera. Ol dispela ailan i gutpela tru, i gat ol gutpela traipela maunten, na gutpela bus, na nambis, tasol taim mipela i wokabaut autim tok mipela mas wokabaut long ol ples maunten na mipela i sotwin stret.
Ol manmeri long dispela hap ol i narapela kain stret long ol manmeri bilong dispela hap bipo mipela mekim wok long en. Ol i lotu long “ol santu.” Planti manmeri ol i no save long rit rait, na bilip bilong ol tumbuna i bosim wokabaut na tingting bilong ol. Ol bos bilong lotu giaman i bin “pasim karamap i hevi tumas na putim antap long sol bilong ol man,” na nau mipela lukim ol samting dispela i bin kamapim. Olsem na dispela i kirapim mipela long wok strong long helpim ol man em ol i “hatwok tru na i karim ol bikpela hevi,” na bai ol i ken kisim ol gutpela samting bilong spirit, olsem gutpela tok bilong Baibel, bilong mekim gut bel bilong ol.—Matyu 11:28, 29; 23:4.
Planti taim ol man i save tok ol i Katolik na em inap; i no gat wok long mipela i mas helpim ol. Mi askim ol, ol i save kolim yet “Beten bilong Bikpela”? Taim ol i tok yes, mi tok yumi olgeta i wetim laik bilong God i kamap long graun, long wanem ol man long graun i no inap stretim ol hevi na helpim yumi. Sapos ol i wanbel long dispela tok mi mekim, mi tokim ol long kamapim tingting bilong ol olsem: God i gat wanem laik long yumi ol manmeri? Planti taim dispela i opim rot bilong ol man i harim gut ol tok bilong mipela, na nau ol i amamas long toktok wantaim mipela.
Wanpela taim mi toktok i stap wantaim wanpela meri i gat bikpela laik long harim ol tok bilong Kingdom, na wantu wanpela man i kukim paura na tromoi klostu long lek bilong mi na i pairap, na mi kirap nogut. Dispela man bilong kros na belhat, em pikinini bilong dispela meri. Em i kros nogut tru na em i tromoi wanpela buk long mi, na buk i sutim lek bilong mi. Em i holim wanpela kain naip bilong katim banana na em i tok em bai kilim mi i dai; em i holim dispela naip klostu long het bilong mi. Em nau, long dispela taim stret wanpela man i bin i stap insait long lain banana i kam ausait—tasol man i laik kilim mi i dai em i save pret tru long dispela man na em i save daun long em. Dispela man i singaut strong: “Yu mekim wanem?” na em i pasim dispela man nogut na em i no inap bagarapim mi.
Long dispela hap i gat tupela taim moa ol man i laik kilim mi i dai, tasol long dispela tupela taim mi pilim olsem Jehova i sambai long mi na lukautim mi. (Buk Song 68:19, 20) Bihain, planti manmeri long dispela hap ol i harim gut ol tok bilong Kingdom bilong God, na taim mipela lusim dispela hap planti moa i save kam long ol miting.
Long narapela hap bilong ol ailan bilong Madera mi kirap stadi Baibel wantaim wanpela meri na mipela i mekim long olgeta wik; man bilong em i no amamas tumas long mipela ol Witnes. Tasol em i daun long tok bilong Baibel. Em i wok mani long kukim bret na em i save wok nait. Taim em i slip pinis na kirap em i hait na putim yau long harim ol samting mitupela meri bilong em i stadi long en; tasol long dispela taim mitupela i no save em i mekim olsem. Olgeta wan wan stadi i kirapim dispela man long kisim save moa, tasol em i no klia gut long nem bilong God em Jehova.
Em i wok long painim Baibel bilong em yet na bai em i ken save gut long dispela samting, tasol em i no painim. Em i gat bikpela laik long save tru long nem bilong God, olsem na em i laik painim “olpela Baibel” bilong em, em i ting em Baibel tru, bilong stretim dispela samting. Liklik taim bihain em i klinim haus kuk long ples wok na em i painim dispela Baibel bilong em. Em i lukim sampela hap bilong Baibel na em nau, nem bilong God i stap. Nem tru bilong God, em Jehova! Em i kirap nogut long dispela samting. (Buk Song 83:18) Insait long sotpela hap taim em i wok long kamap strong tru na em i kisim baptais. Long nau em i mekim gutpela wok long kongrigesen.
Wok Bilong Mi long Nau
Long nau mi mekim wok autim tok long Potugal long hap bilong not long biktaun Braga. Inap planti yia ol manmeri i save kam long dispela taun long lotu na long dispela taun i gat wanpela liklik ples lotu bilong ol Katolik i gat wanpela alta na piksa samting long en bilong mekim lotu, na i gat wanpela yunivesiti. Long dispela taim bipo i no gat wanpela man i ting bihain ol lain bilong go long lotu bai i wok long i go liklik. Tasol nau dispela samting i kamap pinis.
Mipela bungim planti manmeri i bilip olsem ol samting i gat laip i kamap nating. Ol i no klia gut, God i stap o nogat. Wanpela buk (Life—How Did It Get Here? By Evolution or by Creation?) i kamapim sampela tok na bai ol man i ken save i gat wanpela Man i bin wokim ol samting, na buk i gat ol strongpela tok bilong “daunim olgeta kain tingting na giaman tok i save pasim rot bilong ol man i laik kisim save long God.”—2 Korin 10:5.
Wanpela Wok i Win Moa
Mi tingting bek long 15 yia i go pinis na ol wok mi bin mekim na mi save dispela wok i winim ol narapela wok. Mi no mekim wok moa long nek bilong mi long mekim singsing na amamasim ol man, nogat; mi mekim wok long en bilong tokim ol man long ol gutpela tok promis bilong God. Em Jehova yet i singautim yumi long mekim wok long nek bilong yumi long autim ‘gutpela tok bilong kingdom,’ na em i singautim olgeta man em ol i gat laik long mekim dispela wok.—Matyu 24:14; Rom 10:13-15.
Gutpela rot tru i op long yumi na yumi inap wok long putim tok i tru i go daun long bel bilong ol man, em ol i save hatwok tru na ol i karim ol bikpela hevi; na yumi mas wok long kirapim ol long ‘kam na kisim wara bilong givim laip, em i presen bilong God’! (Kamapim Tok Hait 22:17) Em dispela gutpela tok yet bilong Baibel i kirapim tru bel bilong ol man i gat pasin daun, na bel bilong ol i pilim tru ol dispela gutpela tok. Mi wantaim poroman bilong mi i mekim yet dispela wok autim tok na mipela amamas long mekim wok long nek bilong mipela, tasol mipela i no mekim bilong kisim biknem o mani, nogat. Mipela mekim wok long nek bilong mipela bilong litimapim nem bilong God na helpim ol man long kisim ol gutpela blesing bilong stap oltaim.
Mi pilim olsem wok “singsing” nau mi mekim i winim tru wok singsing bilong mi long bipo, long wanem nau mi mekim ol samting olsem wanpela song long Baibel i toktok long en: “Singim song long [Jehova]. Litimapim nem bilong en! Em i bin kisim bek yumi. Long olgeta de yumi mas autim tok long dispela long ol manmeri.” (Buk Song 96:2)—Em stori bilong Madalena Ferraz Martins.
[Piksa long pes 26]
Em Madalena Ferraz Martins wantaim poroman bilong em long wok autim tok, em Maria Eulalia da Luz