Blut—Em Wanpela Samting i Win Tru
Tru taim man i kisim blut, dispela inap bagarapim em; na tu, ol man i save kisim bikpela mani long maketim blut; tasol i no dispela as na ol Witnes Bilong Jehova i save sakim blut. I gat narapela as na ol i mekim olsem, na dispela i bikpela samting tru. Wanem dispela as na ol i sakim blut?
LIKLIK hap blut—ating yumi no tingim tumas. Taim yumi skrapim liklik hap skin, liklik hap blut tru i kamap na yumi rausim, yumi no tingim.
Tasol sapos yumi glasim dispela liklik hap blut bai yumi lukim planti samting long en ol i kolim sel. I gat kain kain lain sel insait long dispela liklik hap blut olsem: I gat 250,000,000 retpela sel, na 400,000 waitpela sel, na 15,000,000 sel ol i kolim pletlet, na i gat sampela kain moa i stap. Ol dispela wan wan lain i gat wok bilong ol yet insait long blut.
Ol retpela sel i wokabaut hariap insait long ol rop bilong blut—ol i bringim win ol i kolim oksijen long wetlewa i go long olgeta wan wan sel bilong bodi, na tekewe win nogut ol i kolim kabon-daioksait long ol dispela sel. Ol retpela sel ol i liklik tru, na sapos yumi hipim olsem 500, bai ol i go antap inap wan milimita tasol. Tasol sapos yumi hipim olgeta retpela sel bilong bodi, bai ol i hip i go antap inap 50,000 kilomita! Long ol wan wan de ol retpela sel i raunim bodi olgeta inap 1,440 taim, na long olgeta 120 120 de ol nupela sel i senisim olpela sel. Long olgeta wan wan sekon, gris insait long bun i wokim 3 milion nupela sel bilong senisim olpela sel. Tasol olsem wanem na bodi i save long taim stret bilong wanpela sel i mas i dai? Ol saintis i no save. Tasol wanpela saintis i tok, sapos i no gat nupela retpela sel bilong senisim olpela sel, ‘blut bilong yumi bai kamap strong olsem simen insait long tupela wik tasol.’
Ol waitpela sel i gat wok long painim na bagarapim ol samting nogut olsem jem i save go insait long skin na givim sik long yumi. Na taim skin i bruk na blut i kapsait, ol sel olsem pletlet i bung wantu na mekim blut long dispela hap i kamap strong na pasim dispela hap skin i bruk. Ol dispela sel i stap long wanpela samting i kain olsem wara, ol i kolim plasma. I gat planti handet kain kain samting i stap long dispela plasma, na planti bilong ol dispela samting i mekim bikpela wok bilong helpim blut long mekim wok bilong en.
Tru ol saintis i gat bikpela save, tasol ol i no save gut long olgeta wok em blut i mekim, na ol i no inap wokim wanpela samting i wankain stret olsem blut. Ating wanpela Man i gat olgeta save na olgeta gutpela tingting i bin wokim, a? Sapos olsem, orait, em i stret dispela Man bilong wokim ol samting em i ken putim lo bilong bosim ol dispela samting, a?
Long bipo na i kamap inap nau, ol Witnes Bilong Jehova i ting olsem. Ol i bilip olsem buk Baibel i olsem wanpela pas i kam long Man bilong wokim yumi, na em i gat gutpela tok i stap long en bilong soim rot long yumi bambai yumi ken i stap gut na i stap amamas. Na dispela buk i tokaut long blut tu. Long Wok Pris 17:14, Baibel i tok: “Laip bilong olgeta man na animal i stap long blut bilong en.” Tru, laip i stap long olgeta hap bilong bodi, tasol blut i mekim bikpela wok bambai yumi ken i stap laip, olsem na blut i makim laip. Blut i olsem samting holi.
Ating sampela man i hatwok long kisim dispela tingting. No gat planti samting ol man bilong graun i ting ol i olsem samting holi, nogat. Olsem na blut i kamap olsem samting bilong maket long en na kisim mani; em i olsem wanpela samting yumi baim long stua. Tasol ol man i tingim ol laik bilong dispela Man i bin wokim yumi, ol i no mekim nabaut long blut. God i tokim Noa na ol lain tumbuna bilong em—em olgeta manmeri, ‘Yupela i no ken kaikai blut.’ (Stat 9:4) Na 800 yia bihain Em i givim dispela lo long ol Israel. Bihain moa inap 1,500 yia em i kolim gen dispela lo na givim long kongrigesen Kristen olsem, ‘No ken kaikai blut.’—Aposel 15:20.
Ol Witnes Bilong Jehova i save bihainim dispela lo, long wanem ol i gat bikpela laik long bihainim tok bilong Man bilong wokim ol. Long rot bilong i dai bilong Pikinini bilong em—em dispela Pikinini em i laikim tumas—Man bilong wokim ol samting i opim rot pinis na bai blut bilong dispela Pikinini i ken givim laip long ol man. Dispela blut i no ken givim laip inap sampela mun o sampela yia tasol, nogat—em bai givim laip i stap oltaim long ol.—Jon 3:16; Efesus 1:7.
Na narapela samting tu yumi ken tingim: Ol Witnes i no save kisim blut na dispela i bin lukautim ol na ol i abrusim kain kain sik na bagarap inap painim man i save kisim blut. Tru ol Witnes i no kisim blut, tasol planti ol narapela man tu i no kisim blut. Isi isi ol dokta tu i kisim dispela tingting na lusim pasin bilong mekim wok long blut long olgeta taim. Na wanpela nius (Pathologist) i tok, longtaim pinis ol Witnes Bilong Jehova i save tokaut olsem, blut i no gutpela rot bilong stretim sik. Na em i tok: ‘I gat planti samting i kamap ples klia bilong helpim dispela bilip bilong ol, maski ol man bilong maketim blut i tokaut strong olsem dispela bilip bilong ol i kranki.’
Tasol olsem wanem long yu yet? Bai yu bilip long husat? Bai yu bilip long dispela Saveman i wokim blut? O bai yu bilip long tok bilong ol man i maketim blut na wokim bikpela bisnis long en?
[Ol Piksa long pes 21]
Ol rop bilong blut i no patpela, i liklik tru, (lukim piksa) olsem na ol sel bilong blut i mas wokabaut wan wan