‘Ol Witnes Bilong Jehova Long Rasia—Gutpela Samting Bai Kamap’

DISPELA tok i kamap long het-tok bilong wanpela nius (The Warsaw Voice) bilong Ogas 19, 1990, ol i wokim long Polan. Meri i raitim dispela nius, nem bilong em Anna Dubrawska, em i stori long “Gutpela Tok Ples” Kibung bilong ol Witnes Bilong Jehova i bin kamap long Ogas, 1990. Em i toktok wantaim sampela Witnes long Rasia, em ol i bin i stap long ol haus kalabus na long ol kem nabaut inap olsem 15-pela yia samting. Nau ol i stori long sampela ol senis i bin kamap long kantri bilong ol.

Wanpela man nem bilong em Grigor Goryachek, em i bilong hap bilong Kraimia na em i wok wantaim wanpela lain bilong wokim ol haus samting. Em i go bikpela insait long lain Witnes, na em i stap kalabus long Saiberia inap olsem 15-pela yia. Em i tok olsem: “Mipela pilim olsem nau i gat ol gutpela samting bai i kamap.” Narapela Witnes, em Anton Pohanich, i tok olsem: “Ol gutpela samting i kirap long kamap nau. Mi inap autim tok long ol wan wan haus na i no gat hevi i painim mi long dispela wok, tasol long bipo mi hatwok tru long mekim olsem.”

Dubrawska i kolim tok bilong wanpela yangpela, nem bilong em Igor Cherny, na em i gat 17 krismas. Em i tok olsem: “Inap 70 krismas i go pinis ol manmeri i no save long God, na planti bilong ol em ol yangpela manmeri. Olsem na nau ol i laik i kam bek long God na kisim save long em.”

Wanpela nius bilong Polan (Dziennik Wieczorny) het-tok bilong en Radość braci (Amamas Bilong Ol Brata), i stori long wanpela wokman bilong Zawisza Stediam long biktaun Bydgoszcz em i tok olsem: “Mi amamas tru long lukim ol yangpela manmeri i mekim ol gutpela toktok​—i no gat wanpela tok nogut i kamap, na ol i mekim ol gutpela pasin tasol.”

Wanpela meri nem bilong em Zofia Uszynska, em i mekim stori long wanpela nius (Trybuna), na aninit long het-tok Głosiciele Królestwa (Lain Bilong Autim Tok Bilong Kingdom), em i stori long dispela kibung olsem: “Insait long wanpela hap aua tasol ol i givim liklik kaikai na kopi long mi inap 10-pela taim. Na inap 5-pela taim wanpela i lusim sia bilong em bambai mi ken sindaun long en. Long ol dispela 4-pela de bilong kibung inap 30,000 manmeri i kam bung long Dziesieciolecia Stediam long Woso. Namel long ol dispela lain manmeri i gat sampela ol meri i gat bel na taim bilong ol long karim pikinini i klostu, tasol ol i sindaun i stap, na planti ol famili wantaim ol pikinini bilong ol, na ol pikinini i bikpela liklik na ol yangpela manmeri ol i stap. Na tu, i gat sampela manmeri ol i kisim baptais, wanpela yangpela tru bilong ol em i gat 11 krismas na wanpela lapun i gat olsem 80 krismas.”

Nius i tok moa olsem: “I gat sampela tausen ol Rasia [winim 16,000] ol i bin kam long kibung long dispela yia. Long yia i go pinis i gat 6,000 tasol i bin kam. Ol wasman i lukautim ol boda long hap bilong Rasia ol i larim ol bas i karim ol Witnes ol i ken i kam tasol na ol i no ken wet wet i stap wantaim planti ol narapela ka ol i lain i go inap planti kilomita bambai ol sekuriti i sekim ol. Ol lain bilong Rasia i kam long dispela kibung ol i bilong Vladivostok na Khabarovsk na Vorkuta. Sampela ol i lusim inap 4-pela o 5-pela de long tren bilong i kam long kibung.”

Na long dispela nius yet wanpela man Ivan M. Grevniak em i tok: “Mi lukim pasin i no stret ol pris pasto i mekim, olsem na mi kirap long painim wanpela lain i gat stretpela pasin. Mi harim tok ol Witnes i mekim na mi lukim ol i bihainim tru long pasin bilong ol. Olsem na mi tok tenkyu long God long helpim mi long painim tok i tru.”

Nius (Trybuna) i tok, Ivan Grevniak em i wanpela elda long wanpela kongrigesen long Lvov na “i gat 13 kongrigesen long dispela hap, na i gat samting olsem 2,000 manmeri i bilip long dispela lotu . . . olgeta i kam bung ol i bilong narapela narapela hap, tasol olgeta i stap wanbel. Na Grevniak i tok, ‘Pasin bilong litimapim ples i no bin kamap namel long ol wanlotu bilong mi.’ ”

Dispela gutpela pasin bilong i stap wanbel wantaim i bin kamap long kibung bilong ol Witnes Bilong Jehova long Woso. Na i gat wankain program ol i bin mekim long tok ples Polan na long tok ples Rasia long ol narapela narapela hap bilong stediam. Pasin bilong litimapim ples samting i no bin kamap liklik long dispela kibung.

Na Zofia Uszynska em i kirap nogut taim olgeta i wok gut wantaim long stretim ol ples slip na redim kaikai samting bilong lukautim olgeta inap olsem 35,000 manmeri ol bai i kam long dispela kibung. Em i tok: “Mi no bin bung wantaim wanpela gutpela lain olsem long bipo.”

Wanpela nius bilong Polan (Sztandar Młodych) i tok long wok ol i bin mekim bilong redim ples kibung bambai ol lain bilong ol narapela hap i ken kam long en. Nius i tok: ‘Lain bilong Jehova i mekim ol wok i helpim dispela ples na ol i wokim gen ol sia bilong sindaun, na ol i stretim ol rot ol i wokim aninit long graun, na ol i klinim gut ol smolhaus nabaut, na ol i katim gras. Ol i tromoi mani bilong ol yet long mekim ol dispela samting. Ol i redim ol ples slip bilong ol manmeri inap olsem 22,000 samting i ken i stap long en, na ol i lukautim ol manmeri i kam long Rasia. I gat hap bilong kisim marasin samting tu.’

Tru tumas, hevi bilong ol Witnes Bilong Jehova long Is Yurop i laik pinis nau, na ol i kirap pinis long kisim ol “gutpela samting,” na mipela i beten long God bambai ol gavman bilong ol kantri olsem Sekoslovakia, na Albenia, na Bulgeria, na Rasia bai ol i rausim tambu long wok bilong ol Witnes Bilong Jehova long ol dispela hap tu, olsem ol gavman bilong Romenia na Hangari na Polan i mekim.​—2 Tesalonaika 3:1; 1 Timoti 2:​1, 2.

[Ol Piksa long pes 29]

Ol Witnes bilong Rasia long “Gutpela Tok Ples” Kibung long Woso, wantaim ol manmeri i laik kisim baptais (antap), brata bilong Rasia i mekim tok, program, ol Witnes bilong Rasia i sanap long ai bilong ol bas ol i bin kam long en