Sampela Tok i Kam Long Olgeta Hap
PIKININI NA SIK AIDS
Wanpela oganaisesen i gat wok long helpim ol lain na bai ol i no ken sik tumas (WHO) i tok sik AIDS i painim planti pikinini moa, winim namba ol i bin ting i gat dispela sik. Na ol i tok ating 10 milion pikinini bai kisim sik AIDS kirap long nau na i go inap long yia 2000. Dairekta bilong wanpela lain bilong dispela oganaisesen, em ol i wok long skelim sik AIDS long olgeta hap graun, em Dokta Michael Merson, em i tok, ‘Klostu olgeta bilong ol dispela pikinini bai kisim sik AIDS na dai paslain long yia 2000.’ Ol saveman i skelim dispela samting i ting, insait long dispela hap taim inap olsem 25-30 milion bai kisim sik HIV i save kamapim sik AIDS. Sapos mama i gat sik AIDS, dispela inap nogutim pikinini long tupela rot: Pikinini inap kisim dispela sik, o em inap kamap pikinini i no gat papamama, long wanem sik AIDS i kilim i dai papamama.
OL I WOKIM PLANTI SAMTING LONG PLASTIK
Wanpela nius (Asiaweek) i tok, ‘Long siksti yia i go pinis sapos yu skelim ol samting long haus bilong ol man, yu no inap painim wanpela samting ol i wokim long plastik. Tasol nau long olgeta wan wan rum bilong haus yu inap painim planti samting ol i wokim long plastik.’ Long olgeta hap bilong graun, ol kampani i wokim plastik ol i kisim bikpela mani, olsem 200 bilion kina samting. Ol i mekim bikpela wok long plastik taim ol i wokim botol plastik o karamap bilong wanpela samting. Namba 2 samting ol i wokim long plastik em ol samting bilong wokim haus. Yumi inap mekim planti wok long plastik na i no gat bikpela pe, tasol i gat sampela hevi taim yumi laik tromoi. Sapos yumi kukim, marasin nogut bilong plastik bai go long win. Na narapela samting tu, taim yumi tromoi long ples pipia em i no save bagarap kwik. Sampela i ting long kisim ol dispela plastik na mekim wok gen long en. Em gutpela rot, tasol taim ol i bungim na mekim olsem em i gat bikpela pe.
OL MAMA I WOK MANI I PAINIM GUTPELA HELPIM
Klostu long taun Regensbek long Jemani wanpela kampani i stap, em kampani bilong wokim ol toksave bilong ol narapela kampani bilong baim ol samting bilong ol, ol i painim gutpela rot bilong helpim ol mama i no inap painim wanpela bilong lukautim pikinini bilong ol taim ol i wok mani. Bikman bilong dispela kampani i tok, ‘Wok haptaim tasol na bringim pikinini i kam wantaim yu.’ Wanpela nius (Nürnberger Nachrichten) i stori long dispela samting. Bos bilong dispela kampani i tok: ‘Planti meri i wok long kampani bilong mipela, na i hatwok long painim ol gutpela wokman bilong mekim kain wok olsem dispela kampani i mekim. Olsem na mi no laik bai ol dispela meri i wok long kampani bilong mipela i lusim wok.’ Tru, sapos 5-pela o 6-pela pikinini i pilai i stap long opis, ating i hatwok liklik long ol mama i tingim gut wok bilong ol. Tasol ol dispela mama i tok, ol i laik tru long helpim kampani, long wanem kampani i bin helpim ol long hevi bilong ol, olsem na ol i save givim bel long mekim wok bilong ol, na i wankain tasol sapos ol i wok long haus. Wanpela mama em yet i mekim bikpela long pikinini, no gat papa, em i tok: ‘Sapos ol i no helpim mi olsem, bai mi no gat rot long mekim wok mani.’
HEVI LONG WARA
Wanpela nius (Time) i tok, ‘Long nau planti kantri i laik pait long wanem i gat hevi long wel, tasol long bihain ating bai yumi gat hevi long wara na ol kantri inap pait long dispela.’ Dispela nius i tok moa, ‘Planti man i kamap long graun nau na ol i wok long pinisim wara bilong dring. Ol man i wok long bagarapim dispela gutpela samting i helpim yumi long i stap laip, em wara. Ating yumi kirap nogut long save, wara bilong dring i wok long go liklik nau, long wanem dispela graun yumi stap long en i gat planti wara, olsem wara i karamapim 70 pesen bilong dispela graun. Tasol yumi mas tingim, 98 pesen bilong olgeta wara i stap, em yumi no ken dring long en na yumi no ken mekim wok long en long wokim gaden samting o lukautim bulmakau samting, long wanem wara i gat sol. I no gat planti gutpela klinpela wara nau, olsem na sik inap kamap, na planti gaden samting inap bagarap na ol pisin na animal bilong bus samting tu inap bagarap. Na tu, planti man bai sot tru long kaikai na bai ol i stap hangre. Ol man i ting long olgeta hap graun bikpela wara i lus nating, long wanem tep o paip samting i bagarap o san i pulim wara i go antap o narapela samting.