Ol Man Bilong Sapim Diwai Long Kavango

Wanpela man bilong Kirap! long Namibia i raitim dispela stori

WANEM samting i kamap? Mi kirap nogut na nau mi kirap sindaun. Mi slip na wanpela samting i kirapim mi. Na mi laik save em wanem samting, olsem na mi lukluk i go ausait long bikpela tudak long Afrika. Mi lukim ol sta i lait nogut tru antap long ol diwai.

Nau tingting bilong mi i klia​—olgeta samting i stap isi tru na dispela yet i kirapim mi!

Nau pairap bilong ol kundu i pinis. Long nait olgeta kundu i pairap olsem tasol, na i gat ol kain kain pairap bilong bus i save kamap long nait long Afrika. Tasol nau i no gat wanpela i pairap​—olgeta samting i stap isi tasol. Pastaim ating bai yu pret. Tasol bihain bai yu harim gen krai bilong ol natnat na ol kain kain binatang bilong nait. Nau ai bilong mi i no inap slip moa. Olsem na mi stap long bet na mi wok long tingim ol dispela kundu em mipela bin lukim ol i wokim.

Mi wantaim meri bilong mi, mipela i slip long haus ka bilong mipela long arere bilong wara Okavango. Mipela i kam lukim kongrigesen bilong ol Witnes Bilong Jehova long Rundu, em wanpela liklik ples kanaka em ol i gat liklik wok bisnis long en. Dispela ples i stap long provins Kavango long hap not-is bilong Namibia, long boda bilong Angola. Mipela i bihainim ol rot long bus i go na mipela i kirap nogut long lukim ol woksop i sanap, na ol man bilong sapim diwai ol i wisel na pairap nabaut long katim ol diwai, na ol i katkatim as bilong diwai long so na sapim na skrapim long senpepa.

Ol i save sapim kain kain samting long diwai, na ol i sapim pes bilong man tu, na ol i mekim wok long en long taim bilong ol bikpela danis. Na tu ol i sanapim olsem “mak” arere long haus bilong ol sikman, na bilong toksave long ol nupela man i kam, na bilong rausim ol spirit nogut. Planti i save laikim ol dispela kain samting, tasol ol Kristen long Kavango i no save putim wanpela long haus bilong ol, long wanem, taim ol i sapim ol diwai na wokim ol dispela pes bilong man ol i mekim sampela pasin olsem wok bilong ol spirit nogut. Tasol nau ol i wokim piksa bilong ol narapela narapela samting tu long diwai​—i no ol pes bilong man tasol.

Nem bilong diwai ol i mekim wok long en, em Yati. Sori tumas, i no gat planti moa bilong ol dispela gutpela diwai i stap long Kavango. Ating bai ol i planim planti moa nupela diwai hia, long wanem diwai i mas winim 50 krismas na nau diwai i bikpela na i strong gut tru long mekim wok long en. Em i gutpela diwai i gat naispela mak mak long en, na taim ol i polisim, ol dispela makmak i kamap gut tru. Taim ol i makim diwai pinis, orait ol i katim i go daun o bai ol i kukim as bilong en. Bihain ol i pasim long rop na pulim i kam long woksop na bihain ol i katim sampela long ol raunpela raunpela hap na sampela ol i katim olsem plang, tasol pastaim ol i mas skelim gut piksa o mak bilong samting ol i laik sapim.

Ol i Gat Somil long Bus Tu?

Mi lukim ol man bilong sapim diwai ol i wok i stap, na mi lukim sampela hap plang ol i katim gut tru i stap long wanpela kona. I no gat somil long bus hia na i no gat paua, tasol ol i katim gut tru ol plang. Mi laik save ol i katim plang samting olsem wanem. Olsem na mi askim wanpela man em i wok long sapim kundu, nem bilong en Joakim.

Joakim i tok, “Yu harim, Tatekulu [bikman], em i no hatwok. Mipela slipim diwai long namel stret bilong wanpela bikpela hul. Na Jonas em i go insait long hul na mi sanap antap long diwai. Orait Jonas em i pulim so i go daun, na mi pulim i kam antap. Na mitupela i mekim olsem i go i go inap long mipela katim diwai olgeta.

Mi tok, “Ating dispela i save winim bikpela hap taim tru long katim, na ating skin bilong yupela i les nogut tru, laka?”

Em i tok, “Nogat Tatekulu, i no tumas. Taim san i kam antap mipela i wok. Taim san i go daun mipela i malolo. Tumora bai san i kam antap gen. Na de bihain, na narapela de antap gen. I gat planti de, olsem na i gat bikpela hap taim​—taim bilong wok na taim bilong malolo.”

Ol Teksi Bilong Ol Okavango

Yu ting i gat ol teksi long bus bilong Afrika? Em nau, tasol dispela i no wankain teksi olsem bilong Amerika o olsem wanpela kain wilka ol man i save pulim long hap bilong ol Saina. Ol man bilong wara Okavango ol i gat narapela kain samting tu ol i save sapim. Em ol kanu, ol i olsem teksi bilong ol Okavango, na ol i kolim olsem mawato. Ol i katim namel bilong diwai bilong wokim ol dispela kanu.

Wara Okavango i olsem boda long hap not namel long Kavango na Angola, na i no hatwok long painim rot long i go antap long wara o go long hap i go daun long wara o brukim wara i go long hapsait​—yu ken kisim kanu tasol na i go. Maski yu laik go antap long het bilong wara long Owambo, o yu laik i go daun long hap bilong Botswana, o yu laik brukim wara na i go long hap bilong Angola, dispela mawato o teksi bilong wara bai kisim yu i go i kam, maski long ol boda o mak bilong graun ol man i bin putim.

I gat tupela samting i stap long dispela wara, na ol man i kalap long kanu ol i mas was gut. Long wanem maski ol man i kam i stap long dispela hap inap longpela taim, i gat ol pukpuk na ol traipela animal ol i kolim hipopotamus i stap yet na ol man i mas lukaut long ol! Bipo liklik, kanu bilong wanpela i kapsait klostu long hap bilong Rundu, na man hia i no sua hariap, olsem na pukpuk i kaikaim em!

Tasol “bikman bilong wara,” em dispela traipela animal ol i kolim hipopotamus, maski em i stap longwe tru, tasol taim em i singaut, man long kanu bai givim siksti long teksi bilong em na i go sua, na bai em i stap inap long em i save tru olsem hipopotamus i go pinis, orait em i ken kalap long kanu gen na i go. Long wanem em i save, hipopotamus bai i brukbrukim kanu long strongpela maus bilong en, na kanu bai i bruk olgeta.

Ol dispela teksi i save stap inap sampela yia. Taim wanpela kanu o teksi bilong wara Okavango i winim planti yia pinis, na i gat ol bikpela hul i kamap, olsem na ol i mas pulim i kam antap long wesan na i no moa mekim wok olsem teksi na i kamap olsem wilka antap long graun. Mipela i lukim planti long ol dispela kanu i stap em ol i pulimapim ol diwai na ol kago bilong stua long en, na ol i pasim baksait long ol bulmakau o long donki, na ol i pulpulim long ol wesan bilong Kavango.

Dispela ol teksi bilong Okavango, nau donki i wok long pulim long wesan, em i teksi bilong karim ol kago i go i kam. Ol i save go long ples i gat maunten, em ol ka na trak nabaut i save pas long wesan na i no inap i go, maski strong bilong ol i winim tru strong bilong dispela wanpela donki. Tru ating bai yu tok, ol i mekim wok long ol samting bilong bipo bipo tru, na i hatwok tru long pulim, na i ran isi isi tru. Tru em i isi isi tumas. Tasol long Afrika ol i no save sot long taim! Olsem Joakim em man bilong sapim diwai i tok: ‘Tumora bai san i kam antap gen. I gat planti de moa i stap.’

Em nau, dispela em ol man bilong sapim diwai long Kavango. Em i gutpela samting tru long mipela inap stori long bel isi na gutaim bai kamap long rot bilong Kingdom bilong God! (Matyu 24:14) Pasin na bilip bilong ol tumbuna i pas tru long planti lain bilong ol, tasol sampela tok i tru bilong Baibel i go daun long bel bilong sampela.

Long Kongrigesen Rundu inap 3-pela yia i go pinis i bin i gat 23 Witnes i baptais pinis. Ol i save bung long Haus Kingdom bilong ol, em ol i bin wokim long plang na i gat kapa long rup bilong en. Wanpela wasman bilong raun bilong ol Witnes Bilong Jehova long dispela hap, em Kristo, em i tok, “Sapos inap 40 manmeri i kam bung long miting bai ol i mas pas pas tru long Haus Kingdom, tasol 56 manmeri olgeta i kam bung bilong harim pablik-tok i kamap. Dispela hap bilong Afrika i gat bikpela san, olsem na haus i hat nogut tru. Taim mi mekim tok, man! Siot bilong mi i waswas nogut tru long tuhat bilong mi. Haus Kingdom i liklik tru, olsem na em i hat tumas.”

Maski em i hatwok liklik, tasol namba bilong ol man i kam long ol miting i wok long i go bikpela. Olsem na ol i tingting strong long ol i mas wokim wanpela bikpela Haus Kingdom. Wanpela Witnes bilong dispela hap yet i givim graun bilong wokim dispela Haus Kingdom.

Ol narapela Witnes long hap bilong Namibia na bilong Saut Afrika, ol i harim dispela singaut bilong i kam helpim ol na ol i baim rot bilong ol yet long kam long dispela ples em i stap longwe tru bilong helpim ol. Ol man bilong dispela hap yet, ol tu i laik insait long dispela wok. Olsem tupela yangpela em Ambiri na Wilem, ol i no bilong lain Witnes, tasol ol tu i kam na helpim ol Witnes. I no longtaim na tupela i kirap long stadi long Baibel na kam long ol miting. Nau, tupela i baptais pinis na i kamap Witnes.

Wanpela ranaweman bilong Angola, em Pedro, em tu i bin helpim ol Witnes long wokim nupela Haus Kingdom. Em i wanpela strongpela Katolik, na em i kamapim sampela askim bilong Baibel long sampela Witnes long ples wok bilong em. Bihain em i tingting: ‘Olsem wanem na ol Witnes Bilong Jehova i gat gutpela save long Baibel?’ Nau em i kisim wanpela tingting​—em bai i askim wanpela long stadi wantaim em. Na taim em i gat save inap pinis, orait em i ken lusim stadi na mekim wok long Baibel bilong soim olsem ol Witnes i giaman. Olsem wanem? Dispela tingting i wok gut? Pedro yet i tok, “Bihain long namba 3 stadi, mi go bek long haus na mi tokim mama bilong mi olsem: ‘Mama, kirap long nau na i go, mi no bilong Misin Katolik moa.’ ” Famili bilong em i birua tru long em, tasol Pedro em i wok strong long kisim save moa, na liklik taim bihain em i rausim nem bilong em long Misin Katolik. Na long “Givim Bel long God” Kibung long Windhuk, Namibia long 1989, em i kisim baptais.

Na i gat ol narapela nupela man ol i helpim wok bilong nupela Haus Kingdom. Wasman bilong raun, em Kristo, em i tok: “Mi tingim taim mipela i wok strong long kapsaitim simen bilong wokim haus, na wanpela samting i bin kamap. Mipela olgeta inap 40, mipela wok i stap. Na mi lukim wanpela yangpela man i stap narapela. Olsem na mi go bungim em na mi askim em: ‘Husat i save stadi wantaim yu long Baibel?’ Nem bilong dispela yangpela man em Mateus. Em i tok, ‘Yu mas toktok wantaim dispela ol lain ya, long wanem ol i no laik stadi wantaim mi. Planti taim pinis mi bin askim ol long mekim stadi wantaim mi, tasol ol i no mekim wanpela samting.’ Dispela samting i kamap long wanem, ol Witnes long dispela hap i mekim stadi wantaim planti manmeri, olsem na ol i larim Mateus i wet pastaim. Tasol mi stretim rot bilong wanpela i ken stadi wantaim Mateus, na nau Mateus em wanpela Witnes i baptais pinis.”

Na long Julai 1989, Kongrigesen Rundu i dediketim nupela Haus Kingdom bilong ol. Kirap long taim ol i mekim wok long nupela Haus Kingdom, i gat 10-pela nupela man ol i kisim baptais, na namba bilong olgeta Witnes i baptais pinis, em inap olsem 33 manmeri. Planti moa i wok strong bambai ol inap winim dispela mak, na long laspela raun em wasman bilong raun i bin mekim long dispela kongrigesen, 118 manmeri i kam bung long harim pablik-tok.

Mipela i ting yu bin amamas long dispela liklik raun bilong yumi i go long Kavango​—na long dispela gutpela wara bilong en, na ol gutpela bus bilong en, na save long ol man i gat gutpela save tru long sapim ol diwai, na lukim ol kanu olsem “teksi” bilong ol, em ol i wokim long diwai​—na tu yumi bungim ol Witnes Bilong Jehova long dispela hap, nau ol i painim planti ol man i gat laik tru long harim gutnius na ol i givim bel tru long dispela tok.

[Ol Piksa long pes 16, 17]

Kirap long han kais na i go raun:

▪ Ol pablisa i sanap long ai bilong olpela Haus Kingdom

▪ Nupela Haus Kingdom long Rundu

▪ Pukpuk na hipopotamus long wara Okavango

▪ Pes bilong man na ol narapela narapela samting ol i sapim long diwai