Olsem Wanem Long Bihain?
Bilong wanem em i bikpela samting bel isi i mas i stap namel long ol man na ol animal? Long wanem, God i wokim man bilong i stap bel isi wantaim ol animal, maski sampela long nau i stap birua.
Long namba wan taim God i wokim man na meri, na em i putim ol long wanpela gutpela gaden, bambai ol i ken i stap amamas. Em wok bilong man long kamapim planti pikinini na bai ol i skruim dispela paradais i go bikpela inap long olgeta hap bilong graun i kamap olsem paradais. Na long olgeta hap bilong graun ol animal bai stap gutpela poroman bilong ol man.
Baibel i stori olsem long Stat: “Bai yumi putim ol i stap bos bilong ol pis na ol pisin na bilong olgeta kain animal na bilong olgeta samting bilong graun. . . . God i lukim olgeta dispela samting i gutpela, na em i amamas tru.”—Stat 1:26-31; 2:9.
Tru man i mas bosim ol animal, tasol em i no ken mekim nogut long ol. God i wokim ol man na ol animal bilong i stap wanbel na i stap gut wantaim. Dispela samting i kamap ples klia long taim ol animal i kam long Adam na bai em i ken makim nem bilong ol—Adam i no bin pret na holim wanpela hap stik bilong lukautim em yet na bai ol animal i no ken bagarapim em, nogat. Adam i no pret long ol animal na ol animal tu i no pret long em.—Stat 2:19, 20.
Truim Bilong Laik Bilong God Long Pastaim
Yumi ken amamas long wanem liklik taim na bai God i kamapim laik bilong em bilong pastaim tru. Taim Kingdom bilong God long heven i bosim graun, em bai i rausim ol gavman bilong ol man. (Daniel 2:44; Matyu 6:9, 10) Em nau, laik bilong em long pastaim bai kamap tru.
Baibel i stori olsem long ol bikpela senis bai kamap long rot bilong stretpela gavman bilong God. Aisaia i stori long en olsem: “Ol wel dok na ol pikinini sipsip bai i stap gut wantaim, na ol lepat bai i slip wantaim ol pikinini meme. Ol pikinini bulmakau wantaim ol yangpela laion bai i raun na kaikai wantaim, na ol liklik manki bai i was long ol. Ol bulmakau na ol bea bai i kaikai wantaim, na ol pikinini bilong ol bai i slip wantaim. Na ol laion bai i kaikai gras olsem ol bulmakau. Long olgeta ples antap long maunten bilong Bikpela [Jehova], olgeta samting bai i stap gut wantaim. Bai i no gat wanpela i mekim nogut long narapela, long wanem, olgeta samting long graun bai i save tru long Bikpela. Dispela save bai inapim olgeta hap graun olsem solwara i inapim mak bilong en olgeta.”—Aisaia 11:6, 7, 9.
Ol narapela tok profet tu i stori long bel isi bai i stap long nupela taim God bai i kamapim. Maika em i tok profet long en olsem: “Na bai ol i paitim bainat bilong ol i kamap olsem ain bilong brukim graun, na paitim spia bilong ol i kamap olsem naip. Na olgeta lain manmeri bai i no pait moa, na bai ol i no skul moa long pait. Na olgeta man wan wan bai i sindaun gut klostu long gaden wain na diwai fik bilong ol, na i no gat wanpela man bai i mekim ol i pret.”—Maika 4:3, 4.
Na i no gat ol animal nogut i stap bilong bagarapim sindaun bilong ol manmeri, long wanem God i tok profet olsem: “Na mi bai mekim kontrak wantaim ol, bilong ol i ken i stap gut. Na bai mi rausim olgeta wel animal i save kilim ol sipsip na ol bai i no inap i stap moa long dispela graun. Olsem na bai ol dispela ples nogut, olsem ples nating na bikbus, ol bai i kamap gutpela ples bilong ol sipsip i stap long en. . . . Na bai ol i stap gut long graun bilong ol yet.”—Esekiel 34:25, 27.
Taim paradais i kamap bek long graun, nau bel isi na pasin wanbel bai stap. Olsem na laspela hap bilong Baibel i stori long dispela nupela paradais olsem: “[God] bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta. Na dispela Man i sindaun long sia king, em i tok olsem, ‘Harim. Mi mekim olgeta samting i kamap nupela.’ Na em i tok moa olsem, ‘Yu raitim dispela tok. Dispela tok em i tru olgeta, inap olgeta man i ken bilip tru long en.’ ”—Kamapim Tok Hait 21:4, 5.
Tru tumas, dispela ol tok em i tru olgeta na olgeta man i ken bilip tru long en. Olsem na yumi ken bilip na wetim truim bilong ol dispela tok profet bilong God i kamap. I no olsem ol tok promis bilong ol man bilong graun. God em i gat bikpela strong na save na bai em i mekim kamap ol laik bilong em. Wanpela bilipman bilong God long bipo em i tok olsem: “Yupela i save pinis, God, Bikpela bilong yumi i bin givim yupela olgeta gutpela samting em i bin promis long givim yupela. Olgeta samting em i bin promis long mekim, ol i kamap pinis, na i no gat wanpela promis i popaia.”—Josua 23:14; lukim tu Aisaia 55:11.
Olsem na i gutpela yumi tu i kisim wankain strongpela bilip olsem God bai i truim laik bilong em long stretim sindaun bilong ol man na bilong ol animal long taim em i kamapim nupela taim long bihain. Bel isi i kam long God bai inapim tru olgeta hap bilong graun. Na bel isi bai kamap namel long ol animal tu, i no long ol manmeri tasol.