Winmoni—Pilai Laki Bilong Planti Man
“YU MAS i gat 1 dola tasol na strongpela tingting bilong kisim wanpela samting—olsem wanpela gutpela driman.” Em wanpela tok gris bilong wanpela kampani bilong winmoni long Amerika. Planti man i gat strongpela laik long win long wanpela bikpela winmoni bilong Nu Yok em ol i putim prais olsem 45 milion dola. Na taim ol i sanap long lain ol i stori long ol samting ol i laik baim sapos ol i winim dispela winmoni—ol samting olsem bot, na ol saket ol i wokim long skin bilong ol animal samting, na ol bikpela bikpela haus. Wanpela taim insait long wanpela provins ol man i mekim save long baim laki-tiket bilong winmoni long wanpela kampani bilong winmoni—ol i baim inap 28,000 laki-tiket insait long olgeta wanpela wanpela minit. Na 3-pela de paslain long ol i kolim nem bilong husat manmeri i win, ol manmeri i bin baim inap olsem 37 milion tiket.
Long Japan i gat 10,000 ol haus bilong winmoni em ol i gat laisens long mekim dispela kain bisnis, na i gat planti manmeri ol i bung bilong baim tiket bilong winmoni bilong pinis bilong yia—ol i kolim Takarakuji. Long wanpela kain haus olsem, i gat inap olsem 300 manmeri i sanap pinis long lain long bikmoning tru bilong baim laki-tiket bilong winmoni, long wanem bipo inap 5-pela taim wanpela laki-tiket bilong dispela stua i win. Wanpela yangpela meri em i ting sapos em i kirap long bikmoning tru na i go baim laki-tiket long dispela stua, laki-tiket bilong em bai i win. Olsem na em i kirap long 1 klok long bikmoning tru na i go sanap long lain. Long yia i go pinis, ol i makim inap 100 milion yen em man inap winim long winmoni—dispela mani em inap olsem 714,285 kina.
Long wanpela biktaun bilong Wes Afrika, i gat wanpela hap ol as ples yet i save pilai laki long en, na planti manmeri i save kam bung bilong baim ol laki-tiket, na sampela i kam bilong lukim namba bilong ol tiket bilong winmani i bilong bihain. Na sampela i kam bilong lukim ol man i save mekim wok bilong ol spirit nogut bilong soim ol long wanem namba em bai win bihain.
Olsem wanem? Winmoni i kamap long wan wan hap bilong graun tasol? Nogat, a? Em i kamap bikpela tru long planti hap bilong graun—long ol kantri i gat planti wok bisnis long en na ol kantri i no gat planti wok mani long en. Na em i kirapim ol yangpela na ol manmeri i bikpela pinis na ol lapun wantaim, maski ol i gat narapela narapela kain sindaun o save.
Tru tumas, wok bisnis long winmoni i kamap bikpela bisnis tru long nau. Long Amerika long 1989, gavman i kisim mani inap olsem 18 tausen milion kina. Inap 27 yia bipo gavman i no bin kisim mani long rot bilong winmoni. Tasol long nau winmoni em i namba tu bikpela kain laki, na dispela bisnis i go bikpela tru, winim wok bisnis long ol kompyuta samting.
Wanpela nius (Gaming and Wagering Business) i tok, long 1988 ol i tromoi bikpela mani tru inap olsem 56.38 tausen milion kina long pilai laki na winmoni samting. I olsem olgeta man meri pikinini wan wan long graun i tromoi 10 kina 10 kina long winmoni na laki. Na dispela namba i bilong wanpela yia tasol!
Dispela pasin bilong pilai winmoni i kamap bikpela tru, olsem na planti man i gat tok long en. Olsem na long narapela tupela stori i kamap bihain bai yumi stori moa long en na bai yumi kamapim sampela tok ol man i bin mekim long dispela samting. Na taim yu kaunim ol tok long dispela stori, em bai i helpim yu long kisim stretpela tingting long pasin bilong pilai winmoni. Yu ting em i savepasin long mekim dispela kain pilai? Na yu ting i no gat hatwok long win? Na bai yu lus long mani tasol o sampela samting moa tu?