Bilong Wanem Ol i Mekim?
‘Mi meri bilong smok, tasol mi save pinis, man i smok i mekim pasin longlong tru. ol man i gat tingting ol i save, smok inap bagarapim skin bilong ol. Em pasin i doti na man i mas tromoi bikpela mani long baim smok. Na pipia bilong smok i save pulap long haus na oltaim ol i mas rausim ol dispela pipia, na marasin nikotin long smok i mekim doti tit na skin, na smok i save kukim klos, na tu smel nogut bilong smok i pas tru long klos.’—Diane Francis i tok olsem long wanpela nius (Macleanˈs) bilong Kanada.
‘Ol man i save smok ol i no ken ting ol bai stap longtaim olsem ol man i no save smok. Ol man i save smok, planti bai dai long sik kensa, winim moa yet ol man i no save smok.’—The Columbia University College of Physicians and Surgeons Complete Home Medical Guide.
‘Long olgeta yia smok i kilim i dai planti man bilong Amerika, winim ol Amerika i bin i dai long Namba Wan Pait na Pait Bilong Korea na Vietnam wantaim. Long Amerika long olgeta yia, planti ol i save dai long sik ol i kisim long smok, winim moa yet ol man i save kisim bagarap long ka na ol i dai. Na sik kensa bilong waitlewa i save kilim i dai planti man, wankain olsem ol man em birua long rot i painimol na ol i dai. Wok mani long smok i olsem wok bilong baim dai i go long ol man.’ (Wanpela bikman bilong gavman, em Robert F.Kennedy, i bin tok olsem long wanpela kibung, World Conference on Smoking and Health, Septemba 11, 1967)—The Cigarette Underworld, em Alan Blum M.D. i bin raitim.
‘Long olgeta hap bilong graun, long olgeta yia smok i kilim i dai olsem 2 na hap milion manmeri. Maski wanem kain smok ol i kisim, smok inap nogutim ol, na ol i mas tromoi bikpela mani bilong baim, na em inap kalabusim skin na oltaim ol i mas smok.’—Bos bilong wanpela lain (Hong Kong Council on Smoking and Health ), em Dokta Judith Mackay, i tok olsem long wanpela nius (World Health).
‘Wok bisnis bilong smok i bin helpim mi na mi gat mani bilong baim ol kaikai samting bilong mi, tasol em i bin kilim i dai planti milion man, na em bai mekim olsem yet long planti milion man moa sapos ol i no laik save olsem smok bai bagarapim ol. Mi laik helpim ol man long save, smok inap nogutim tru ol.’—Tok bilong Patrick Reynolds, em tumbuna pikinini bilong man i bin kamapim wanpela kampani bilong wokim tabak (R J. Reynolds Tobacco Company ).
Olsem na bilong wanem planti milion man na meri na ol yangpela i save smok? Ating sampela i mekim long wanem, ol wanlain bilong ol i smok, O ol i laik bai ol narapela i ting ol i gat stail. Tasol planti ol i smok long wanem, smok i kalabusim pinis ol na long olgeta taim ol i laik kisim. Wanpela saveman bilong ol dokta i tok: “As tru na planti man i smok i olsem, ol i kalabus long wanpela strongpela drak i stap long tabak—em nikotin.”
Orait, man inap lusim smok olsem wanem? Em i mas kisim wanpela strongpela tingting o laik long bel bilong kirapim em long lusim, na dispela i mas strong moa, winim laik bilong skin i krai long nikotin. Sapos man i laik bihainim ol lo bilong Kristen, orait em i mas wok long kisim pasin bilong laikim tru God na ol narapela man na bai dispela i karamapim na daunim laik nogut bilong skin.—Matyu 22:37-40; 1 Korin 13:5,7,8.
‘Ol man i laik lusim smok ol i mas save olsem drak nikotin em inap kalabusim ol na ol i mas redi long karim pen na hevi long skin taim ol i laik lusim. Tru dispela pen na hevi i no samting bilong amamas, tasol em i bilong i stap sotpela taim tasol, na em i no inap nogutim ol. Olgeta man i save smok, maski ol i kalabus tru long smok, ol inap lusim.’—The Columbia University College of Physicians and Surgeons Complete Home Medical Guide.
Sapos yu laik bai narapela i ken helpim yu long strongim bel na bai yu lusim smok, yu ken lukim ol Witnes Bilong Jehova long Haus Kingdom bilong ol o yu ken raitim pas na salim i kam long atres bilong Papua Niugini i stap long pes 5 bilong dispela nius.