Mauswara Nabaut i Gat Bikpela Strong
LONG wanpela taun long Inglan em ol man i stap isi long en, ol i kirap nogut tru taim ol i harim olsem wanpela yangpela meri i kilim i dai skin bilong em yet. Na ol i kirap nogut moa yet long harim kot i tok, ‘Mauswara nabaut bilong ol man i mekim na em i kilim i dai skin bilong em!’ Ol man bilong dispela taun ol i mauswara nabaut long ol samting bilong dispela yangpela meri na ol i bagarapim nem na i stap bilong em.—Buk Rumor and Gossip—The Social Pyschology of Hearsay, bilong Ralph L. Rosnow na Gary Allan Fine.
Tru, dispela kain samting i no save kamap planti taim sapos wanpela i mauswara nabaut long narapela, tasol yumi save, kain toktok olsem i gat bikpela strong. Sampela tok i olsem toktok tasol, olsem man i givim toksave o tok win long narapela man; tasol sampela taim dispela toktok inap bagarapim samting bilong gavman, o brukim ol famili, o bagarapim wok mani bilong ol man.
Sampela man i no inap slip gut long nait o ol i bel hevi, long wanem narapela i bin tok baksait long em. Na ating dispela kain tok i bin putim hevi long yu tu sampela taim. Wanpela man bilong raitim buk, em William M. Jones, i stori long ol man i holim wok bisnis na em i tok, ‘yu mas save olsem wanpela bai putim hevi long yu long wok mani bilong yu, olsem tok baksait long yu.’
Long olgeta hap ol man i no laikim man i save tok baksait long narapela. Wanpela lain Indian bilong Amerika ol i tok, sapos man i tok baksait long narapela man, dispela i wankain pasin nogut olsem man i stil o tok giaman. Long wanpela lain long Wes Afrika, sapos man i mauswara nabaut na tok baksait long ol narapela, em bai kisim bikpela strafe, olsem ol bai katim arere bilong maus bilong em, o ol inap kilim em i dai! Tru tumas, insait long planti yia ol man i bin wok strong long pasim dispela pasin bilong tok baksait.
Namel long yia 1450 na 1750 samting, long Inglan, ol i wokim wanpela kain sia na ol i sindaunim dispela kain man long en na subim sia i go insait long wara na litimapim gen i kam antap. Bihain ol i mekim olsem long Jemani na Amerika. Ol i laik mekim olsem bilong semim ol manmeri i save tok baksait. Sapos ol i save wanpela man i mekim tru dispela pasin, orait ol i mas pasim em long dispela sia na subim em i go insait long wara inap planti taim.
Long nau yumi no gat dispela kain sia bilong mekim save long ol man bilong tok baksait, tasol ol man i wok strong yet long pinisim pasin bilong tok baksait. Long yia 1965 samting, gavman bilong Amerika i makim sampela lain bilong was long ol man i toktok nabaut na dispela kain tok inap bagarapim samting bilong gavman. Na gavman bilong Noten Aialan na Inglan i bin mekim wankain samting. Na i gat sampela lo bilong pasim tok baksait bambai sampela wok bisnis i no ken kisim bikpela hevi long dispela kain toktok.
Tasol maski gavman na ol lain man i mekim ol dispela samting bilong pasim ol man long tok baksait, dispela pasin i stap yet, na em i wok long i go bikpela moa yet. Kain kain lo o kain kain samting ol man i bin wokim i no pasim dispela pasin—em i strongpela samting tumas. Ol man bilong olgeta hap i save mauswara nabaut, olsem long ples, o long ol ofis na ol narapela ples wok, na stua, na long ol pati samting, na insait long famili tu. Maski ol man i bilong wanem ples o lain, na ol i maniman o rabisman, ol i save mauswara wantaim ol narapela. Olsem wanpela saveman i tok, ‘Pasin bilong tok baksait i stap long olgeta lain man.’
Tru tumas, kain toktok olsem tok baksait i save kamapim bel bilong dispela man, olsem em i amamas long bagarapim gutpela nem bilong narapela, na paulim tok i tru, na bagarapim i stap bilong sampela man. Tasol i no olsem olgeta tok win o mauswara i nogut tasol, nogat. I no gat rong long mekim toktok nating o stori nating. Yumi mas save wanem kain toktok i nogut na wanem toktok i gutpela. Sapos yumi save gut long dispela, bai yumi inap abrusim pasin bilong bagarapim nem bilong narapela man o nem bilong yumi yet.
[Piksa long pes 4]
Em wanpela pasin gavman i bin kamapim bilong mekim save long ol man bilong tok baksait
[Kredit Lain]
Historical Pictures Service