Pas Bilong Tok Tenkyu
SAMPELA mun i go pinis, nius Kirap! i kisim wanpela pas i kam long wanpela sumatin, na em i mekim dispela tok:
“Ol nius bilong yupela i stori long ol gutpela samting bilong givim save long man, na i no hatwok long kaunim na kisim save, na ol i kamap long taim stret bilong helpim man, na ol i save strongim man. Ol i kamapim gut tok i tru bilong God. Ol i stori gut long as bilong ol samting i wok long kamap long nau, na long gutpela samting bai kamap long bihain.
“Na tok bilong ol dispela nius i klia na ol yangpela inap kaunim na kisim gut save, winim ol narapela nius na ol bikpela buk. Na ol tok i kamap long taim stret bilong helpim man. Sampela taim mi gat askim long wanpela samting, na taim mi kisim nupela nius long mun bihain, em nau, bekim bilong dispela askim i stap long en.
“Mi wanpela sumatin long hai-skul, olsem na mi mas raitim planti ripot samting. Mi mas skelim ol tok i stap long planti bikpela buk samting. Tasol mi no save hatwok, long wanem, ol dispela nius bilong yupela i save helpim mi. Mi amamas long tok olsem, ol save mi kisim bilong raitim ol ripot i save kam long dispela nius. Olgeta taim tisa i laik bai mipela i raitim wanpela ripot long wanpela samting, o sapos mipela lain long wanpela nupela samting, stori bilong dispela i stap pinis long ol dispela nius.
“Olsem: Tisa i laik bai mipela i raitim wanpela stori bilong saiens. Mipela mas wokim 3-pela bikpela piksa na raitim wanpela stori long dispela. Mi tingting long raitim wanpela stori em planti man long nau i save tingting planti long en: em hevi bilong ol samting bilong graun i wok long bagarap. Nius Kirap! [tok Inglis] bilong Septemba 8, 1989, em i stori long dispela samting. Mi mekim wok long piksa i stap long pes 2 na pes 7 bilong wokim tupela bikpela piksa. Na bilong namba 3 piksa, mi wokim piksa bilong ol win i stap antap. Mi mekim wok long stori i stap insait long raitim ripot bilong mi. Olgeta long klas i laikim dispela stori na tisa i laikim moa yet. Tisa i givim bikpela mak long mi, na mi kisim namba wan prais long dispela ripot.
“Long mun Mas, mi mas raitim narapela ripot i stori long ol samting yumi inap mekim sapos wanpela man i sik. Mi lukim stori long Kirap! [tok Inglis] bilong Mas 22, 1990, em i stori long pasin bilong helpim man i gat sik asma. Mi mekim wok long piksa i stap long pes 17 na mi wokim wanpela bikpela piksa, na mi mekim wok long dispela stori bilong raitim wanpela ripot. Tisa i givim bikpela mak long mi long dispela ripot.
“Long wanpela klas bilong mipela, mipela i stori long ol lain i stap long bipo, olsem ol lain Maya na lain Astek na lain Inka. Taim mi go long haus long apinun, mi kisim Kirap! [tok Inglis] bilong Me 8, 1990, em i stap long bokis bilong holim ol pas. Mi rausim karamap bilong en na mi wok long lukim ol stori i stap insait. Long pes 13 mi lukim stori bilong lain Maya i stap insait, na mi amamas tru. Wantu mi kaunim dispela stori na mi givim wanpela long tisa.
“Tenkyu long olgeta dispela gutpela save. Dispela i mekim na ol homwok samting i no hatwok moa, olsem na mipela i no hevi taim tisa i givim homwok long mipela. Ol dispela nius i olsem ol gutpela ston i dia tumas. Mi laik kaunim oltaim. Ol inap helpim tru ol yangpela olsem mi, na ol narapela samting i no ken pulim tingting bilong mipela. Taim mipela i kaunim ol stori na ol hap olsem “Ol Yangpela i Laik Save . . .” dispela i strongim tru bilip bilong mipela na rausim ol dispela samting i laik pulim tingting bilong mipela, olsem na mipela i ken tingim tasol prais bilong laip oltaim. Mi laik tok tenkyu tru long bikpela hatwok yupela i save mekim bilong redim ol dispela nius, na mipela inap amamas long kaunim bilong kisim save.”—Wanpela meri i salim dispela pas i kam.