Yu Save Kaunim Ol Magasin?
1 Tupela marit i mekim wok misineri long Afrika, ol i tok olsem long ol magasin bilong yumi: “Wastaua i save helpim mitupela long stap strong long spirit na inapim mipela long mekim gut wok autim tok. Olgeta wan wan magasin i save strongim mitupela.” Olsem wanem? Yu gat wankain tingting long ol magasin bilong yumi? Yu gat bikpela laik tu long kaunim ol magasin?
2 Ol brata i save lusim bikpela hap taim bilong redim ol tok bilong ol magasin em yumi inap kaunim insait long sampela minit tasol. Sapos yu tingim dispela samting, bai yu opim ol pes hariap hariap, lukim ol piksa, o wan wan taim yu kaunim tasol ol stori i pulim tingting bilong yu? Yumi bihainim savepasin sapos yumi no mekim olsem. Yumi mas lusim hap taim long kaunim na skelim gut ol tok bilong olgeta wan wan magasin bilong yumi. Wastaua em nambawan magasin i helpim yumi long kisim kaikai bilong spirit long taim stret bilong en. Kirap! i save kamapim ol gutpela gutpela stori bilong ol kain kain samting i givim save long yumi. Ol save yumi kisim taim yumi kaunim ol dispela magasin i save strongim yumi long ol samting bilong spirit, na tu, dispela save i helpim yumi long mekim gut wok autim tok. Sapos yumi yet i kaunim ol magasin long olgeta taim, dispela bai kirapim yumi long givim bel tru long tilim long ol narapela.
3 Rot Bilong Kaunim Gut Ol Magasin: Olsem wanem? Pasin bilong yu long kaunim magasin em inap kamap gutpela moa? Tupela rot mipela i kamapim hia i bin helpim planti. (1) Makim taim bilong kaunim ol magasin long olgeta taim. Taim yu makim 10 o 15 minit tasol long olgeta wan wan de bilong kaunim ol magasin, bai yu kirap nogut long ol stori yu bin kaunim insait long wanpela wik. (2) Kamapim wanpela rot bilong helpim yu long save long ol magasin yu kaunim pinis na ol magasin yu no kaunim yet. Ating yu ken putim mak samting long kirap bilong olgeta stori yu kaunim. Sapos yu no mekim olsem, ating bai yu lusim tingting long kaunim sampela stori. Em i bikpela samting long yu mas bihainim wanpela pasin bilong kaunim ol magasin em i gutpela long yu na bihainim dispela pasin long olgeta taim.—Skelim wantaim Filipai 3:16.
4 “Wokboi i gat gutpela tingting” i skelim gut ol samting i wok long kamap long nau na ol i kamapim ol stori i stret long helpim tru ol manmeri. (Mt 24:45) Tru tumas, ol magasin i bin helpim tru yumi. Pasin bilong yumi long kaunim ol magasin long olgeta taim, dispela em i bikpela samting bilong helpim yumi long kamap strong long ol samting bilong spirit. Ol man i lusim hap taim bilong kaunim olgeta magasin, bai ol i kisim planti gutpela blesing.