Ol Wasman i Go Pas Long Wok—Kuskus
1 Kuskus bilong kongrigesen i save mekim bikpela wok tru bilong helpim kongrigesen long ‘bihainim ol gutpela pasin bilong mekim wok.’ (1 Ko 14:40) Em i insait long Komiti Bilong Lukautim Wok Bilong Kongrigesen, olsem na em i gat wok long raitim ol pas samting na lukautim ol fail bilong kongrigesen. Tru, planti i no inap luksave long ol wok em i mekim olsem bilong ol narapela elda, tasol wok bilong em i helpim tru kongrigesen na yumi pilim tru wok bilong em.
2 Taim kongrigesen i kisim pas i kam long Sosaiti o ol narapela, kuskus i save kaunim na stretim rot bilong bekim pas sapos ol i mas mekim olsem. Em i save givim olgeta pas long ol narapela elda bambai ol i ken kaunim, na bihain em i save putim long fail. Em i save skelim oda bilong ol magasin na litresa na em i salim i go long Sosaiti. Em i lukautim wok bilong ol brata i mekim wok long ol akaun na ol sabskripsen, na tu, olgeta wok samting kongrigesen i mas mekim long ol kibung.
3 Kuskus i mas salim ol ripot bilong kongrigesen i go long Sosaiti paslain long namba 6 de bilong mun, olsem na em i bikpela samting long yumi olgeta i mas putim hariap ripot bilong wok autim tok long pinis bilong mun. Na em i save raitim ol dispela ripot long ol Kat Ripot Bilong Pablisa. Sapos pablisa i laik lukim kat bilong em, em i ken askim kuskus.
4 Taim wanpela pablisa i lusim kongrigesen, kuskus i save raitim pas na stori liklik long pablisa na salim kat ripot bilong pablisa i go long narapela kongrigesen.—Lukim buk Lo, p. 104, 105.
5 Kuskus i save skelim wok bilong ol painia. Na em i toksave long wasman bilong wok autim tok na ol narapela elda, sapos ol painia i gat sampela hevi. Em i save toksave long wasman bilong Buk-Stadi Bilong Kongrigesen long wanem ol pablisa i no mekim wok autim tok long olgeta mun. Kuskus na wasman bilong wok autim tok, tupela wantaim i gat wok long stretim ol samting bilong helpim ol pablisa i lusim wok autim tok.—Lukim Wok Kingdom, Disemba 1987, p. 4.
6 Nau yumi save long gutpela wok kuskus i save mekim, olsem na yumi mas mekim gut wok bilong yumi bambai dispela i helpim em long mekim gut wok God i putim long han bilong em.—1 Ko 4:2.