Sampela Tok i Kam Long Olgeta Hap
Man i Laikim Tru Pis
Wanpela nius (Asiaweek) i tok, ‘Ol Japan i laikim tru sushi.’ (Em wanpela kaikai i gat pis i no tan antap long en.) Dispela nius i tok moa, ‘Ol Japan i winim ol Amerika na ol Indonesia long kaikai pis.’ Bilong inapim dispela laik bilong ol Japan, ol man bilong kisim pis i raun long biksolwara na long ol wara klostu long nambis bilong painim pis na ol i kisim 10 milion ton samting long dispela rot long olgeta yia. Na tu, long ol wara na ol liklik raunwara o tais ol man i save kamapim pis long en, ol i kisim 225 tausen ton. Long ol narapela kantri samting ol i kisim 1 milion ton samting. Narapela kantri i save kaikai planti pis em Rasia. Ol i kaikai 10 milion ton samting na long Saina ol i save kaikai 8 milion ton samting. Saina i winim ol narapela kantri long kamapim planti pis long ol liklik raunwara bilong ol. Amerika i winim ol narapela kantri long salim pis i go long ol narapela kantri na em i kamap namba tu long Japan long baim pis long ol narapela kantri. Dispela nius (Asiaweek) i tok moa, ‘Planti kain liklik pis ol i save kolim olsem sadin (olsem talai), tasol bilong kamapim kain swit bilong sadin, ol i save putim kain kain wel na sayor samting long ol.’
Ol i Tanim Tok Bilong Baibel
Long yia 1990 ol i tanim tok bilong Baibel long ol 4-pela tok ples moa. Olsem na yumi kisim Baibel olgeta long 318 tok ples. Wanpela bikman bilong ol sosaiti bilong wokim Baibel (United Bible Societies) em John D. Erickson, i bin tok olsem. Dispela 4-pela tok ples i olsem: Simboraso Kitsua (Chimborazo Quichura) bilong Ekwado, na Rongmei Naga bilong India, na Ranau Dusun na Kaian (Kayan), em 2-pela tok ples bilong Malesia. Nau Baibel olgeta o sampela hap bilong Olpela na Nupela Testamen i stap long 1,946 tok ples; em i winim bilong yia i go pinis inap 18 tok ples.
Em i Wanpela Santu?
Dispela askim i stap long Misin Katolik. Na ol i gat dispela askim long Kwin Isabela Namba Wan em i bin bosim Spen inap 500 yia bipo. Wanpela nius bilong Frens (Le Monde) i tok, misin i kirap nau long litimapim nem bilong Isabela na tokaut olsem taim em i stap laip em i wanpela meri holi. Dispela i olsem namba wan samting ol i mas mekim pastaim bilong makim em i kamap wanpela “santu.” Planti man i save long Isabela, long wanem em i bin helpim gut Kristofa Kolambas, em dispela man bilong raun long sip bilong painim ol narapela kantri, na em i bin painim Amerika long yia 1492. Taim Misin Katolik i tingim yet wanpela pas i tok misin i mas makim olsem Isabela em i meri holi, olsem santu, ol man i raun na givim ol liklik tanget long ol man na dispela ol tanget i tok Isabela i makim gutpela rot bilong ol yangpela, na ol mama, na ol bikman bilong gavman tu. Tasol ol Juda na ol Muslim i kros nogut tru. Taim Isabela wantaim man bilong em i bosim Spen, Misin Katolik bilong Spen i bin mekim pasin nogut tru long ol man ol i bilong narapela lotu. Misin Katolik i bin subim planti tausen Juda na Muslim long lusim lotu bilong ol na kamap Katolik. Sapos nogat, ol pris samting i bin givim bikpela pen long planti tausen na kukim ol long paia.
Mekim Wok long En, Nogut Em i Lus
Wanpela nius (Science) i tok, ‘insait long 75 i go inap 100 yia moa samting, klostu 3,000 bilong olgeta 6,000 tok ples bilong graun bai pinis.’ Dispela bai i kamap, long wanem i no gat pikinini i save mekim ol dispela tok ples. Na planti ol narapela tok ples tu inap pinis long wanem, ol lain i save mekim ol dispela tok ples ol i pinis o ol i go sindaun wantaim ol narapela lain ol i save mekim narapela kain tok ples. Olsem na 300 tok ples tasol i stap gut. Wanpela lain i save stadi long ol kain kain tok ples, (The Linguistic Society) long Amerika, i kamapim ol dispela namba long wanpela miting bilong ol long kirap bilong yia 1991, na ol i bin toktok long kain kain rot bilong helpim ol dispela tok ples i laik pinis. Wanpela rot ol i bin tokaut long en i olsem: Kamapim sampela skul na lainim ol pikinini long ol dispela tok ples i laik pinis, na kirapim ol dispela pikinini long mekim wok long ol dispela tok ples.
Ol Pasin i Save Bagarapim Skin Bilong Man
Wanpela dokta (Dr. Ivan Gyarfas), i wok long wanpela oganaisesen i gat wok long helpim ol lain na bai ol i no ken sik tumas (World Health), na em i tok, planti bilong ol man i dai pinis long sik samting ol i no ken i dai sapos ol i bin senisim pasin bilong ol. Long ol kantri i gat planti mani samting, klostu olgeta man i dai (olsem 70-80 pesen) long sik kensa long waitlewa bilong ol, o mak bilong blut i antap tru, o klok i kisim sik, o sik ol i kolim strok. Planti bilong ol dispela sik i kamap long wanem ol dispela man i mekim ol samting i bagarapim skin, olsem ol i smok, o ol i no kaikai gut, o ol i no eksasais—em pasin bilong planti maniman. Tasol wanpela nius (International Herald Tribune) bilong Paris i tok, ol dispela kain sik i kamap long man i no lukautim gut skin bilong em, ol dispela sik i as bilong 40-50 pesen bilong ol man i dai long ol kantri i no gat planti wok bisnis long en, na i no long ol kantri i gat planti wok bisnis na gutpela sindaun.
Planti Man i No Gat Ples Slip long Jemani
Wanpela asosiesen long Jemani bilong ol man i no gat ples slip i tok, winim 1 milion manmeri long Jemani i no gat haus bilong ol yet.
Kuskus bilong dispela oganaisesen (Heinrich Holtmannspotter) i tok, long dispela 1 milion manmeri i no gat ples slip, 130,000 i olsem dripman na ol i no gat wok mani. Na planti ol narapela i no gat ples slip em ol man i bin kam long ol narapela kantri na nau ol i sindaun long Jemani, o ol i bin ranawe long kantri bilong ol yet na nau ol i laik sindaun long Jemani. Tasol dispela man Holtmannspotter i tok, planti ol i no gat ples slip, long wanem pe bilong wanpela rum samting i antap tru. Wanpela nius bilong Jemani (Frankfurter Allgemeine Zeitung) i tok, ol man i no gat ples slip i kamap planti nau long dispela taim na ol man i drip nabaut i stap long planti biktaun long Jemani.
Weil i Holim Pikinini Bilong Em
Long Saut Afrika long sampela mun long olgeta yia, ol manmeri i stap klostu long nambis bilong hap bilong saut tru (Cape of Good Hope) ol i amamas long lukim ol traipela weil (longpela bilong ol i olsem 18 mita samting) i drip i kam klostu long nambis na ol i bung olsem long famili famili na olgeta long wanpela famili i pilai wantaim. Ol man i sanap na i lukim dispela samting na ol i lukim wanpela mama i pilai wantaim pikinini bilong em, olsem em i laikim tru dispela pikinini bilong em. Dispela pikinini weil, hevi bilong en olsem 5-pela ton samting, i pilai pilai na taim em i kalap long baksait bilong mama bilong em, em i no inap sindaun gut na em i pundaun i go bek long solwara. Taim em i mekim olsem, mama weil i save baut na slip long baksait bilong em na holim pikinini long bel bilong em. Em i holim wantaim tupela pul bilong em. Wanpela man bilong dispela hap i tok, dispela samting ol i lukim ol weil i mekim i winim ol narapela yia ol weil i bin kam klostu long nambis bilong ol.
Hevi Bilong Ol Meri i Gat Bel
Wanpela oganaisesen (World Health) i tok, long olgeta yia winim 500,000 meri i save dai taim ol i gat bel o long taim ol i laik karim pikinini. Wanpela nius (World Watch) i tok, sampela man i gat bikpela save long dispela ol i ting namba tru i olsem 2 milion samting. Dispela hevi i bikpela moa long ol kantri i no gat planti wok bisnis long en na ol man i no gat gutpela sindaun. Ol i ting, long dispela yia 1991 long olgeta 73 73 meri i gat bel long Saut Amerika, wanpela bai i dai; long olgeta 38 38 long Saut Esia, wanpela bai i dai; long Afrika, long olgeta 21 21 meri, wanpela bai i dai. Tasol long not Yurop, long olgeta 10,000 meri i gat bel, wanpela tasol bai i dai. Dispela nius (World Watch) i tok, asua bilong dispela i olsem ol dispela meri i no bin kaikai gut, olsem ol i sot long kaikai i save helpim skin, o ol i no gat gutpela klinik o haus sik. Sampela meri i rausim bel, olsem na 200,000 bilong ol i dai long olgeta yia. Em nau, ol pikinini i stap na no gat mama, ol tu i no kisim gut kaikai, na ol inap i dai. Olsem na 15 milion pikinini i no winim 5-pela krismas yet ol i dai long ol kantri i no gat planti wok bisnis samting long en.