Mi Go Bikpela Long Wanpela Biktaun Long Afrika

Long ol kantri bilong Afrika i stap daunbilo long ples wesan bilong Sahara ol lain manmeri i go bikpela moa, olsem sampela kantri moa bilong graun. Long ol dispela kantri bilong Afrika planti meri i karim 6-pela pikinini, na sampela taim, winim 6-pela. Planti hevi i kamap long wanem, planti ol i stap rabis, na ples i wok long bagarap, na ol i no gat planti samting bilong helpim sindaun bilong ol. Nau mipela kamapim stori bilong wanpela em i bin i go bikpela long dispela hap bilong Afrika.

MI GO bikpela long wanpela biktaun bilong Wes Afrika. Long famili mipela i 7-pela pikinini, tasol 2-pela i dai taim ol i liklik. Haus bilong mipela em wanpela rum slip na wanpela rum bilong sindaun long en, na mipela i save baim long olgeta wik samting. Mama na papa i save slip long dispela rum slip na mipela olgeta pikinini i save slip long ol mat long plua bilong dispela narapela rum​—ol pikinini man long narapela hapsait bilong rum na ol pikinini meri long narapela hapsait.

Mipela i wankain olsem ol narapela manmeri long ples​—mipela i gat liklik mani tasol, na planti taim mipela i no gat samting bilong helpim sindaun bilong mipela. Sampela taim i no gat kaikai inap long skel bilong mipela. Sampela taim long moningtaim mipela gat rais tasol bilong kaikai, em hap rais mipela i no bin kaikai long asde, na mipela save hatim gen. Sampela taim mipela save sot long rais tu. Tingting bilong sampela man i olsem: Papa i save wok mani, olsem na em i mas kaikai planti, na bihain mama, na sapos hap kaikai i stap, ol pikinini i ken kaikai dispela. Tasol papamama bilong mipela i no gat dispela tingting. Papamama i larim mipela ol pikinini i kaikai liklik kaikai bilong mipela, na papamama i no kaikai. Mi tingim yet dispela gutpela pasin bilong papamama.

Go Long Skul

Sampela manmeri long Afrika i ting sapos pikinini man tasol i go long skul, em i gutpela. Ol i ting i no bikpela samting long ol pikinini meri i go long skul, long wanem, ol bai marit na man bilong ol bai lukautim ol. Tasol papamama bilong mipela i no gat dispela kain tingting. Mipela olgeta 5-pela pikinini i bin go long skul. Dispela i putim bikpela hevi long papamama, long wanem, ol i no gat planti mani. Long baim pen na pepa i no bikpela hevi, tasol long baim ol buk na yunifom bilong skul, dispela i putim hevi long papamama.

Taim mi kirap long go long skul mi no gat su. Taim mi gat 14 krismas na mi stap long namba 2 yia long hai-skul, rot i op long papamama i baim su bilong mi. I no olsem mi no gat su tru, nogat; mi gat su bilong putim taim mi go long lotu, na papamama i no larim mi i putim dispela su long taim mi go long skul o raun samting. Mi raun lek nating tasol. Sampela taim papa inap baim bas bilong mipela, tasol sapos nogat, mipela sampela i mas wokbaut long lek i go long skul, inap olsem 3-pela kilomita.

Wasim Laplap na Karim Wara

Mipela wasim ol laplap long wanpela liklik wara. Mi tingim taim mi go wantaim mama long dispela liklik wara. Mama i save karim baket na sop na ol laplap. Mipela save pulimapim wara long baket na putim ol laplap insait long en na rapim sop long ol laplap. Nau mama i save paitim ol laplap long ol stretpela ston na bihain em i putim laplap i go insait long wara bilong rausim sop. Taim dispela i pinis em i putim ol laplap long narapela ston bilong ol i ken drai, long wanem, ol klos i hevi sapos ol i gat wara na mipela i mas karim i go bek long haus. Long dispela taim mi liklik yet, olsem na mi mas sindaun na was long ol laplap i wok long drai long san, nogut sampela i stilim. Mama i save mekim planti wok.

Sampela manmeri tasol i gat wara long haus bilong ol, olsem na wanpela wok mi mas mekim em bilong kisim baket na go ausait long wanpela tep bilong kisim wara. Long taim bilong bikpela san wanpela hevi bilong mipela i olsem: Ol man i bosim wara ol i save pasim planti tep na bai bikpela wara i no ken lus. Wanpela taim ol i pasim wara na long dispela de olgeta mipela i no gat liklik wara bilong dring! Sampela taim mi mas wokabaut planti kilomita bilong painim wara na pulimapim long baket. Mi save karim wara long het bilong mi na wokabaut longwe, olsem na hap gras bilong mi i tekewe long ples baket i sindaun long en! Tasol bihain gras i kamap gen.

Kamapim Pikinini Bilong Lukautim Papamama

Mi tingting bek long taim mi liklik yet na i go inap long taim mi bikpela, na mi ken tok, sindaun bilong mipela i gutpela liklik; ating em i winim sindaun bilong planti man long dispela hap bilong Afrika. Mi save long planti famili, sindaun bilong ol i nogut tru. Planti pren bilong mi long skul i mas i go long maket paslain na bihain long skul na maket long kaikai samting bilong helpim famili bilong ol long kisim liklik mani. Sampela i rabis tru, olsem na paslain long ol i go long skul ol i no kaikai, na ol i sindaun long skul long de olgeta na bel bilong ol i no gat kaikai. Planti taim long skul ol dispela kain pikinini i bin kam na askim mi long kaikai taim mi sindaun na kaikai hap bret bilong mi. Olsem na mi save brukim hap na givim long ol bilong kaikai.

Tasol maski sindaun bilong ol i nogut na planti hevi i stap, ol manmeri i laik kamapim planti pikinini. Long dispela hap planti ol i save tok, “Wanpela pikinini tasol i no olsem wanpela pikinini tru.” Na ol i tok moa, “Tupela pikinini i olsem wanpela, na 4-pela pikinini i olsem tupela.” Ol i save tok olsem, long wanem, planti pikinini ol i save dai taim mama i karim ol o taim ol i liklik yet. Papamama i save olsem sampela pikinini bilong ol bai dai, tasol ol i save sampela bai stap laip na kamap bikpela, na ol bai kisim wok mani na bringim mani i kam long papamama. Na tu, ol dispela kain pikinini i gat rot long lukautim lapun papamama bilong ol. Dispela i bikpela samting long wanpela kantri em gavman i no save helpim ol lapun long mani samting.​—Donald Vincent i kamapim dispela stori.