Ol Bikpela Wok Bisnis i Kamap Na i Pinis Gen
Bilong Wanem Yumi Skelim Pasin Bilong Mekim Wok Bisnis?
TRAIM long tingim wanpela graun i no gat ol lain politik i pait long narapela narapela, na i no gat ol lotu i tok pait nabaut, na i no gat hevi long mani. Ating i hatwok long tingim kain pasin olsem inap kamap, a? Long wanem, long olgeta wan wan de yumi pilim ol samting em wok politik o lotu o wok bisnis i mekim. Sapos yumi rausim ol dispela 3-pela samting long graun, bai i gat bikpela hevi tru.
Taim ol lain man i stap wantaim, ol i mas stretim sampela samting bilong bosim sindaun bilong ol—olsem wok bos long haus—na ol inap kisim ol kaikai samting em ol i laikim. (Lukim blok daunbilo.) Olsem na olgeta famili i save wok strong long skelim gut mani samting bilong ol. Olsem tasol i gat 4-pela samting ol gavman i mas mekim long bosim gut mani bilong kantri. Em olsem: (1) ol i mas skelim wanem ol kago na kaikai samting ol i mas kamapim bilong ol man, (2) ol i mas save long wanem ol rot ol bai kamapim dispela samting, (3) ol i mas save long wanem rot ol i ken tilim ol dispela samting, na bihain (4) ol i mas stretim gut ol samting na bai ol wok bisnis samting i ken wok gut na olgeta man i gat wok.
Pasin bilong wok bisnis em ol man i bin kamapim i bin helpim sindaun bilong yumi, na yumi inap kisim ol kaikai na ol narapela samting bilong amamasim yumi, em yumi yet i no inap kamapim. Na yumi inap kisim sampela samting moa bilong helpim sindaun bilong yumi. Ol i wokim gut ol masin long nau, na long rot bilong telefon, kwiktaim yumi inap toktok wantaim man i stap long narapela hap, na salim tok long rot bilong ol masin samting insait long sotpela taim tu.
Olsem na yumi mas skelim pasin bilong ol long mekim wok bisnis na long wanem rot em i save bosim wokabaut bilong yumi. Wok bisnis na lotu na wok politik inap senisim sindaun bilong yumi.a Olsem na yumi mas skelim namba 3 samting i save bosim sindaun bilong ol man, em ol bikpela wok bisnis. Olsem wanem strong bilong en i go bikpela moa yet? Wanem samting bai painim ol bikpela wok bisnis long bihain? Dispela i mekim wanem long yumi olgeta wan wan?
[Ol Futnot]
a Kirap! i kamapim tupela bikpela stori long olsem wanem dispela i stret long ol lotu na pasin bilong ol wok politik bilong nau, olsem: “Ol Samting Ol Lotu i Bin Mekim Bipo i Makim Samting Bai Painim Ol Long Bihain,” kirap long Ogas 8, 1989 i go inap Julai 8, 1990; “Skelim Wok Bilong Ol Gavman,” kirap long Mas 8 i go inap Novemba 8, 1991.
[Blok long pes 5]
Sampela Tok Bilong Bisnis
Ating bai yu hatwok long kamapim gut insait bilong ol tok bilong mekim wok bisnis. Em ol tok olsem “commerce” na “trade” na “industry” na “bisnis” na “economics.” Wanpela buk (Collins Cobuild English Language Dictionary) i tok, dispela tok “commerce” i makim “ol wok na ol pasin ol man i bihainim taim ol i baim ol samting i go long ol narapela lain na baim ol samting long ol.” Na dispela tok “trade” i makim ‘pasin bilong baim i go na baim i kam, o salim ol kago na kaikai na ol narapela samting i go na kisim ol narapela samting olsem senis bilong en long ol dispela kantri.’ Tasol pastaim ol kampani na bisnis i mas wokim ol dispela samting; ol i kolim dispela olsem “industry.” Na dispela tok i makim wok bilong wokim ol kaikai na laplap na masin samting. Na taim ol man i baim o salim ol dispela samting i go long ol narapela kampani, i olsem ol i mekim wok “bisnis.”
Na dispela tok “economics” i makim pasin bilong skelim ol samting ol man i wokim bilong kisim mani na hamas samting ol wan wan i baim, na long wanem rot ol man i bosim mani, na pasin bilong ol long mekim wok bisnis. Dispela tok “economics” i kam long wanpela tok Grik na em i makim pasin bilong bosim ol samting long haus o long ol fam samting.